Наш час — час размывання межаў і разбурэння стэрэатыпаў, час нечуваных магчымасцяў і балючых страт. У ідэалогіі — постмадэрнізм, а ў кулінарыі — fusіоn (фьюжн), сплаў, амальгама, анаграма, гібрыд, эклектыка. Старыя каноны цешаць хіба што музейшчыкаў, усім хочацца парушаць звыклыя традыцыі, куражыцца, эпаціраваць, блюзнерыць і піярыцца. Самыя дарагія і рэйтынгавыя рэстараны — «малекулярныя», якія раскладаюць звыклыя прадукты і ідэі ледзь не да ўзроўню амінакіслот, каб сінтэзаваць з іх ніколі не бачаныя дагэтуль бялковыя малекулы, з астранамічнымі рахункамі. Як доўга працягнецца гэты сусветны спажывецкі фэст — нікому невядома. Але заставацца зусім убаку ад такога моднага трэнду наўрад ці магчыма. Зразумела, такіх грандаў, як іспанскі рэстаран Еl Bullі або дацкі NоMа нам не дагнаць. Таму давайце арыентавацца на ўзоры больш сціплыя і блізкія нам па духу.
Напрыклад, на ірландскую кухню. Чаму менавіта на яе? А таму што гістарычна нашыя лёсы досыць падобныя, таму што кухня ірландская — ніякая не арыстакратычная, а зусім свойская. Таму надта саромецца побач з ёй нам не прыйдзецца, як таму голаму ў правінцыйнай лазні.
Вучыцца менавіта ў ірландцаў сялянскай кааперацыі і байкотам нелаяльных землеўладальнікаў беларусаў заклікалі яшчэ ідэалісты-грамадоўцы 1920-х, але нашы недаверлівыя людзі дагэтуль чэшуць патыліцы, нетаропка разважаючы над сэнсам гэтых, як, зрэшты, і любых іншых ідэалістычных заклікаў... Але ж я тут выключна пра кухню. Яшчэ зусім нядаўна асновай харчавання ірландцаў была бульба — яны сапраўдныя бульбашы! Ды і іншыя прадукты з ірландскага рацыёну былі да болю знаёмыя нашым продкам: авёс, жыта, шчаўе, капуста, буракі, бабы... Натуральна, свініна, а яшчэ болей — бараніна. Нашы дзяды таксама да сярэдзіны ХХ стагоддзя елі той бараніны нашмат болей, чым мы сёння. Карацей, амаль нічога такога, чаго б не было і ў нас, сярод інгрэдыентаў ірландскага традыцыйнага меню няма. Хаця наша забыццё і абыякавасць да культурнай спадчыны непрыемна ўразіла б нават ірландцаў. Ну, хіба што з рыбай нашым далёкім бульбяным кузэнам пашчасціла болей: вакол Смарагдавага вострава — бурапеннае мора, і таму, якім бы цяжкім ні быў прыгнёт англійскіх лендлордаў, заўжды заставалася магчымасць або ўвогуле паплысці з радзімы ў шырокі свет, або, прынамсі, адплыць на некалькі міляў, каб закінуць невад у нязведаныя глыбіні на ўзор галілейскіх апосталаў, а там — селядцы або траска, або ласось...
А ў іх — ёд і фосфар, без якіх ніякія хітрыкі малекулярнай кухні не маюць «зялёнага» сэнсу. Вось таму і прыдумалі ірландцы апошняга часу розныя мудрагелістыя бізнес-схемы, кшталту бюджэтнай авіякампаніі Rуаn Аіr, пачалі бязмежна багацець і нават займелі рэпутацыю «кельцкага тыгра...» Ну і мы ўжо, няспынна багацеючы, пачынаем рыкаць, мерачыся быць «балотным тыграм», крызіс нас пакуль што не палохае... Бачыце, колькі ў нас агульнага?
Ну і як жа не згадаць пра Ірландыю ў Дзень святога Патрыка, сусветнае свята не толькі ірландцаў, але і ўсіх п'яніц, прасцякоў, авантурыстаў, аптымістаў і аматараў мультсерыяла «Губка Боб»? Таму апранем у гэты дзень што-небудзь зялёнае і пад нярэдкія ўжо ў нас гукі ірландска-беларускай дуды выправімся ў найбліжэйшы традыцыйны беларуска-літвінскі паб годна адсвяткаваць. А пачастуюць нас няхай тымі стравамі ў стылі ірландска-беларускага fusіоn, якія цалкам маглі б быць на сталах нашых продкаў — а калі яны да іх не дадумаліся, дык я не здолею патлумачыць, чаму. Зрэшты, часам трапляюцца і зусім аналагічныя рэцэпты. Напрыклад, у нашай аграсядзібе мы часта робім гэтую простую, але вельмі смачную страву:
Фаршыраваныя бульбяныя лупіны
Спосаб прыгатавання: Чыста вымытая бульба адварваецца «ў мундзірах» (або запякаецца ў мікрахвалевай печцы) да крыху няпоўнай мяккасці. Разразаецца напалам, лыжкай або нажом выдаляецца большая частка мякаці — асцярожна, каб не пашкодзіць лупіну. Мякаць размінаецца ў кашу (можна прапусціць праз мясарубку). Адначасова на адной патэльні падсмажваюцца шампіньёны з цыбуляй, а на другой — скваркі. Смажаныя грыбы, скваркі і пюрэ перамешваюцца, і гэтай сумессю начыняюцца (з «горкай») бульбяныя лупіны. Наверх кладзецца трохі маянэзу (прыкладна па 1 лыжачцы на лупіну), затым «бульбіны» выкладваюцца на бляху, змазаную алеем, і запякаюцца прыкладна пры 180 °С каля 30 хвілін. У посным варыянце можна абысціся без скварак.
Між іншым: Гэты рэцэпт, з невялікімі адрозненнямі, ёсць у «Кухарцы Літоўскай» Вінцэнты Завадскай. Але вельмі падобны, таксама з пэўнымі адрозненнямі, лёгка знайсці ў інтэрнэце як ірландскі нацыянальны, пад назвай Іrіsh Роtаtо Skіns. Таксама, наколькі я разумею, з 1974 года гэтая страва ёсць у меню сусветнай сеткі фастфуду T.G.І. Frіdау's. Вось так: хочаце — назавіце рэцэпт ірландскім, хочаце — беларускім або «літвінскім».
Суп са шчаўя — Аnrаіth sаmhаіdh
(чыста ірландскі рэцэпт,
які ну вельмі цяжка прызнаць чужым для беларусаў)
Складнікі: 1 фунт (450 г) шчаўя, 75 г масла, 1 вялікая пакрышаная цыбуля, 2 лыжкі мукі (з «горкай»), 2,5 літра булёну, 2 лыжкі сухароў, соль і перац, 2 жаўткі, 150 г вяршкоў.
Спосаб прыгатавання: Старанна вымыць шчаўе і дробна пасячы яго. Разагрэць у патэльні масла і крыху падсмажыць на невялікім агні разам шчаўе і цыбулю, каб апошняя толькі зрабілася крыху празрыстай. Пасыпаць мукой, перамяшаць і смажыць яшчэ 1 хвіліну, накрыўшы патэльню. Асобна давесці да кіпення булён. Дабавіць у яго падсмажаныя шчаўе і цыбулю, а таксама сухары. Пасаліць і паперчыць на смак. Давесці да кіпення, а затым варыць на вельмі слабым агні яшчэ гадзіну. (Можна дадаць крыху вады, калі зробіцца занадта густым.) Узбіць жаўткі з вяршкамі і дадаць у гарачы суп, выключыўшы гарэлку пліты і старанна перамешваючы.
Чытайце яшчэ:
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.