Песня «Сон-трава» Руслана Белага і Пятра Ліпая адлюстроўвае абуджэнне нашага краю, якое штогод адбываецца з вясновым сонцам, з першымі кветкамі. Радасць адчування зменаў у навакольных краявідах суседнічае са шчымлівым водгаласам крывавых падзей мінулай вайны. З мяккім лірызмам, задушэўнай цеплынёю музыка перадае напружанасць пачуццяў — і песня ўспрымаецца баладна, як драматычны роздум-успамін.
У прыпеве асвятляецца вобраз магічнай расліны, якую ў народзе з развагаю пяшчотна называюць сон-травою. У красавіку—маі яна цвіце ў сухіх сасновых лясах, на пясчаных схілах. Яе пухкія разлапістыя лісцікі і сцябло нібы пацвярджаюць, што іх ахінулі душы нашых папярэднікаў. І на лясных прагалінах, ля абеліскаў і былых акопаў гэтыя чароўныя кветкі з касмічным — фіялетавым — водблескам і сонечна-жоўтай сарцавінай суадносяцца з вечна маладымі душамі абаронцаў беларускай зямлі.
Напрыканцы мінулага стагоддзя песня «Сон-трава» Руслана Белага і Пятра Ліпая загучала на канцэртах, у праграмах радыё- і тэлеперадач. У выкананні заслужанага артыста Беларусі Леаніда Нікольскага яна чуецца героіка-лірычным казаннем пра мужнасць і каханне, пра самаахвярную вернасць Радзіме і светла-суровую памяць.
Верш Пятра Ліпая
Музыка Руслана Белага
Да тых палян шляхі няблізкія,
І ў сэрцы болю не стрываць,
Як пад ляснымі абеліскамі
Цвіце ў маі сон-трава...
Прыпеў:
І цвіце сон-трава,
І звініць сон-трава —
Гэта памяць зямлі прарастае...
І цвіце сон-трава,
І звініць сон-трава —
Нашы душы гукае, гукае...
А не расой — слязой матулінай
Дол акрапляе з даўніх дзён,
І сніцца хлопцам, што паснулі там,
Трывожны сіні майскі сон.
Прыпеў.
Яны нясуць букеты майскія
Сваім дзяўчатам — з той пары!
Лясныя кветкі партызанскія,
Што не паспелі падарыць...
Прыпеў.
О кветкі сон-травы! Над доламі
Ім не заснуць і ў цішыню.
Яны трапечуцца, як полымя
Зямнога Вечнага агню.
Прыпеў.
Падрыхтаваў Міхась ШАВЫРКІН
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».