23 Верасень, нядзеля

Вы тут

Хочаш жыць — пазбаўся ілюзій пра спайсы


Шчырая размова прайшла днямі з удзелам студэнцкага актыву БДУІР. А ініцыятарам гутаркі стаў рэктар універсітэта Міхаіл БАТУРА, які запрасіў на сустрэчу старастаў груп і паверхаў універсітэцкіх інтэрнатаў, прадстаўнікоў студэнцкіх саветаў, куратараў груп і намеснікаў дэканаў факультэтаў. У актавай зале не засталося ніводнага свабоднага месца.

24-48

24-48

 

— Як бы ні было складана ў гэтым прызнавацца, але наркатычная хваля закранула і наш універсітэт. За 2014 год два студэнты БДУІР трапілі ў поле зроку праваахоўных органаў. Курсант ваеннага факультэта быў асуджаны за распаўсюджванне наркотыкаў на 10,5 года. Яшчэ адзін наш студэнт атрымаў умоўны тэрмін, і мы далі яму другі шанц — пакінулі ва ўніверсітэце, — паведаміў прысутным Міхаіл Батура. — Я лічу, што два выпадкі — гэта больш чым сур'ёзная падстава для трывогі. Старасты груп — гэта людзі, якія павінны заўважаць усё, што адбываецца ў калектыве. Яны не могуць заставацца абыякавымі да гэтай праблемы і павінны рэагаваць на ўсе трывожныя сігналы. Таму я хачу раздзяліць адказнасць у гэтым пытанні менавіта з вамі. Безумоўна, можна было проста ўзяць з усіх студэнтаў подпісы, што тыя азнаёмлены з Дэкрэтам Прэзідэнта №6 «Аб неадкладных мерах па супрацьдзеянні незаконнаму распаўсюджванню наркотыкаў». Але сур'ёзнасць пытання не дапускае фармальных падыходаў. І мы невыпадкова запрасілі на гутарку са студэнтамі спецыялістаў — каб вы маглі ўсю пачутую тут інфармацыю данесці да сваіх аднагрупнікаў і сяброў. Хацелася, каб мы сталі з вамі аднадумцамі ў гэтым пытанні...

— Пра рэальныя маштабы распаўсюджвання наркаманіі меркаваць даволі складана, — канстатаваў начальнік упраўлення аховы правапарадку і прафілактыкі ГУУС Мінгарвыканкама Аляксандр КУПЧЭНЯ. — Магу толькі сказаць, што калі я 15 гадоў таму пачынаў сваю службу ў міліцыі, сярод наркаманаў, што стаялі на ўліку, непаўналетніх не было. А сёння толькі ў сталіцы на ўліку знаходзяцца 150 непаўналетніх. Яшчэ некалькі гадоў таму аб праблеме спайсаў баяліся гаварыць уголас або не ведалі, што казаць. Але Дэкрэт Прэзідэнта Рэспублікі Беларусь №6 паставіў рэальную заслону распаўсюджванню гэтай навалы. Сёння парог крымінальнай адказнасці за захоўванне наркотыкаў зніжаны з 16 да 14 гадоў. Дэкрэтам прадугледжаны шэсць відаў адміністрацыйнай адказнасці: за знаходжанне ў грамадскім месцы ў стане наркатычнага ап'янення, за спажыванне наркатычных сродкаў і псіхатропных рэчываў і іх аналагаў у грамадскім месцы, за знаходжанне на працоўным месцы ў стане наркатычнага ап'янення, адказнасць кіраўнікоў клубаў і забаўляльных устаноў, дзе будуць выяўлены факты распаўсюджвання або спажывання наркотыкаў... А калі кагосьці на працягу года пасля накладання адміністрацыйнага спагнання затрымаюць у грамадскім месцы за спажыванне наркотыкаў або ў стане наркатычнага ап'янення другі раз, наступае крымінальная адказнасць (прадугледжаны арышт тэрмінам да трох месяцаў або абмежаванне свабоды на тэрмін да двух гадоў).

Загадчык 21-га рэабілітацыйнага наркалагічнага аддзялення РНПЦ псіхічнага здароўя Уладзімір ІВАНОЎ таксама лічыць, што дэкрэт прынёс заўважны эфект:

— Упершыню са спайсамі мы сутыкнуліся недзе чатыры гады таму. А з 2012 года пацыенты пайшлі да нас вялікім патокам. Летась у маім аддзяленні пастаянна знаходзіліся 10—12 пацыентаў з залежнасцю ад спайсаў, але пасля снежня 2014 года (г.зн. пасля прыняцця дэкрэта. — Аўт.) рака пераўтварылася ў ручай. Мяркую, што гэта вынік працы нашай міліцыі. Цяпер у аддзяленні ў розны час знаходзяцца ад аднаго да чатырох пацыентаў з залежнасцю ад спайсаў. Частка іх страчвае розум, і яны пераводзяцца ў іншыя аддзяленні...

Асобна спецыяліст спыніўся на медыцынскіх аспектах.

— Усе маладыя людзі павінны ведаць і перадаць гэтую інфармацыю іншым: у адрозненне ад алкаголю і нават ад гераіну спажыванне спайсаў вельмі хутка развівае прыдуркаватасць. У псіхіцы адбываюцца грубыя парушэнні, і асоба дэградуе. Прычым залежнасць ад спайсаў развіваецца імкліва: у кагосьці за тры-чатыры эпізоды спажывання, а камусьці для незваротных наступстваў хапае і адной сустрэчы са спайсамі. Ніхто не ведае, што прадаецца пад назвай «спайс», нават яго прадаўцы. У маёй практыцы былі хранічныя гераінавыя наркаманы, якія паспыталі спайс і казалі, што «не дай Бог мне яшчэ раз з гэтай дрэнню сутыкнуцца». Кантраляваць спажыванне спайсу вы не зможаце, гэта ілюзія. У вас будзе пагаршацца памяць, уважлівасць, знізіцца інтэлект, вы дакладна можаце забыцца пра вучобу, бо сканцэнтравацца на чымсьці будзе проста немагчыма. Усё прыемнае, што было ў важым жыцці, таксама знікне...

У маім аддзяленні лячыліся як маладыя людзі, якія яшчэ нічога не паспелі пабачыць у сваім жыцці, так і людзі, якія ўжо мелі свой бізнес, сям'ю, але ўсяго пазбавіліся праз сваю залежнасць. Які шлях выбераце вы — думайце самі.

Надзея НІКАЛАЕВА

Дадаць каментар

Выбар рэдакцыі

Грамадства

75 год таму пачалося вызваленне Беларусі

75 год таму пачалося вызваленне Беларусі

23 верасня 1943 года, савецкімі войскамі быў вызвалены ад нямецка-фашысцкіх захопнікаў першы населены пункт Беларусі — раённы цэнтр Камарын.

Грамадства

Каму і чым дапаможа ТЦСАН

Каму і чым дапаможа ТЦСАН

Ад дапамогі дома пажылым і да стварэння крызісных пакояў для ахвяр хатняга гвалту.

Грамадства

Маштабныя вучэнні прайшлі ў краіне

Маштабныя вучэнні прайшлі ў краіне

Актыўная фаза камандна-штабнога вучэння Узброеных Сіл прайшла ў Беларусі ў верасні.