Вы тут

Наркотык — у пасылках


За сем месяцаў гэтага года супрацоўнікі Мінскай рэгіянальнай мытні выявілі 22 факты незаконнага перамяшчання праз мяжу наркатычных сродкаў і псіхатропных рэчываў. Заведзена 11 крымінальных спраў. Аб гэтым у гутарцы з карэспандэнтам «Звязды» паведаміла Ксенія ШАРЭНДА, намеснік начальніка аддзела мытных расследаванняў Мінскай рэгіянальнай мытні.

Ад марыхуаны да шпіёнскіх фотаапаратаў

— Наркатычныя вырабы выяўляем выключна ў паштовых адпраўленнях, — кажа Ксенія Шарэнда. — Больш за палову з іх складаюць тавары, набытыя праз інтэрнэт у Кітаі, Сінгапуры, Малайзіі, Перу, ЗША. У рэйтынгу краін, з якіх у Беларусь перасылаюць наркотыкі, яны ў лідарах.

Мытнікі найчасцей выяўлялі марыхуану, ЛСД, дымецілтрыптамін, гармалін... Спайсаў пакуль не знаходзілі. Апошнія спробы перасылкі наркотыкаў зафіксаваны зусім нядаўна. Пад выглядам электрапрылады ў Мінск з Кітая спрабавалі пераслаць псіхатропнае рэчыва. Падчас агляду мытнікі знайшлі крыштальныя кавалкі празрыста-белага рэчыва, якія важылі звыш 500 грамаў. У іншым выпадку жыхар адной з афрыканскіх краін спрабаваў пераслаць у Беларусь 16 грамаў марыхуаны. Раслінная маса была адпраўлена на адрас аднаго з замежных студэнтаў, які пражывае і вучыцца ў сталіцы.

Але выяўляліся не толькі наркотыкі. За першае паўгоддзе мытня канфіскавала 53 манеты розных гістарычных перыядаў, якія ўяўляюць гістарычную і культурную каштоўнасць. Іх кошт ацэньваецца ў 24 мільёны беларускіх рублёў. Ксенія Шарэнда таксама адзначыла, што з пачатку года ў пасылках выяўлена каля дзесяці сапраўдных ордэнаў і медалёў, канфіскаваны нажы, касцеты, дубінкі, каля 300 сродкаў для незаконнага завалодвання інфармацыяй, то бок ручкі, бірулькі, флэшкі, у якія ўмацаваны дыктафоны ці фотакамеры. А на мінскі адрас з Ізраіля наогул накіроўвалася пасылка, у якой выявілі гадзіннік, дзе замест лічбаў умацавалі патроны. Агулам у такім гадзінніку знайшлі 16 боепрыпасаў: 10 — для пісталета «Парабелум», 6 — да вінтоўкі.

— Я магу прыгадаць толькі адзін падобны выпадак са сваёй практыкі, — працягвае Ксенія Шарэнда. — У 2012-м у Беларусь прыслалі вялізную скрыню з прадуктамі, вопраткай, бутэлькай віна... Але пры дэталёвым аглядзе ў пасылцы знайшлі... затвор магазіна вінтоўкі сістэмы «Маўзер» 1898 года вырабу. Адрасат сказаў, што гэта быў падарунак.

На заметку кожнаму

Нагадаем, з 23 ліпеня пачалі дзейнічаць змены ў Кодэксе адміністрацыйных правапарушэнняў.

— Паводле іх, тым, хто перадаў мытніку пашпарт, у якім ляжаць грошы, ужо пагражае адказнасць. Усё гэта зроблена для барацьбы з карупцыяй на мяжы, — адзначае спадарыня Шарэнда. — На пасту таксама забараняецца здымаць відэа, фатаграфаваць, размаўляць па мабільным тэлефоне, знаходзіцца ў службовых памяшканнях, падбухторваць супрацоўнікаў мытні. За ўсё гэта прадугледжаны штраф да 50 базавых велічынь, папярэджанне альбо дэпартацыя. У паўторным выпадку — штраф ад 10 да 100 базавых велічынь з дэпартацыяй.

Тарас ШЧЫРЫ

Выбар рэдакцыі

Грамадства

Аповед жанчыны, якая здолела вярнуць дачку з сацыяльнага прытулку

Аповед жанчыны, якая здолела вярнуць дачку з сацыяльнага прытулку

Жанчыну, якая здолела не толькі вярнуць дзіця з прытулку, але і далей выхоўвае яго, знайсці аказалася не проста. 

Грамадства

Чаму зараз варта далей трымацца ад вадаёмаў?

Чаму зараз варта далей трымацца ад вадаёмаў?

Люты больш нагадвае пазачарговы вясновы месяц.

Грамадства

Капыльскі раён. Мінулы год можна назваць стабільным

Капыльскі раён. Мінулы год можна назваць стабільным

Чым Капыльскі раён жыве сёння і якія планы на перспектыву?

Грамадства

Якую літаратуру здаюць у букіністычныя крамы?

Якую літаратуру здаюць у букіністычныя крамы?

Калі звычайныя кнігарні працуюць па формуле «кніга — чалавек», то букіністычныя трымаюцца на прынцыпе «людзі — кнігі — людзі».