Чарговыя адкрытыя дэбаты БРСМ «Выбірай.by!» прайшлі ў Беларускім дзяржаўным універсітэце. На гэты раз моладзь абмяркоўвала тэму студэнцкага самакіравання. Лідары пярвічных арганізацый БРСМ устаноў вышэйшай адукацыі з усіх рэгіёнаў краіны сабраліся, каб падыскутаваць аб тым, як сёння працуе студэнцкае самакіраванне, чаго яму не хапае і ў якім кірунку яму трэба развівацца. У якасці экспертаў выступілі міністр адукацыі Міхаіл Жураўкоў, першы сакратар Цэнтральнага камітэта БРСМ Андрэй Белякоў, а таксама рэктары сталічных ВНУ Сяргей Абламейка (БДУ), Наталля Баранава (МДЛУ), Станіслаў Князеў («МІТСО») і іншыя.
Каманды ўдзельнікаў («Актыў.by» і «Perpetuum Mobіle») ствараліся літаральна напярэдадні. Спецыяльна да дэбатаў ніхто не рыхтаваўся, ды і асаблівай патрэбы не было: хлопцы і дзяўчаты ўваходзяць у студэнцкае самакіраванне ў сваіх ВНУ, таму гэтая тэма для іх не новая. Але кожны меў сваё бачанне, свае прыклады і ідэі.
Так, каманда «Актыў.by» сфармулявала наступнае паняцце: «Студэнцкае самакіраванне — гэта першы крок на шляху да твайго поспеху, магчымасць быць пачутым, самарэалізацыя, фундамент для асобы будучага кіраўніка, дэмакратыя ў дзеянні».
Падчас дыскусіі ўдзельнікі прыйшлі да думкі, што пра эфектыўнасць самакіравання можна меркаваць па тым, з якой хуткасцю вырашаюцца праблемы ва ўніверсітэце. Студэнты, як правіла, бачаць недахопы знутры. Іх галоўная задача — растлумачыць кіраўніцтву ВНУ сутнасць праблемы і, магчыма, прапанаваць варыянты яе рашэння.
Паколькі студэнцкае самакіраванне існуе ва ўсіх ВНУ Беларусі, была закранута і тэма яго ўніфікацыі. Студэнцкія лідары прыйшлі да думкі, што гэта немагчыма, паколькі кожная навучальная ўстанова мае свае традыцыі.
Падчас дэбатаў міністр адукацыі неаднаразова выказваў думку, што мэта студэнцкага самакіравання заключаецца не толькі ў тым, каб арганізоўваць нейкія культурна-масавыя або спартыўныя мерапрыемствы. Міхаіл Жураўкоў падкрэсліў: неабходна, каб студэнты актыўна ўплывалі і на адукацыйны працэс, былі неабыякавымі да таго, што і як яны вывучаюць.
— Апошнім часам мяне хвалюе сацыяльная інфантыльнасць моладзі, — прызнаўся міністр. — Створаны цудоўныя ўмовы для развіцця маладога пакалення, аднак многія перастаюць цаніць гэта і ўспрымаюць як належнае, нібыта дзяржава ім павінна.
Эксперты не толькі каментавалі выказванні студэнцкіх лідараў і давалі ім парады, але і задавалі пытанні. Андрэй Белякоў нечакана запытаўся ў моладзі: «Ці хацеў бы хто-небудзь з вас у будучым стаць рэктарам?» Такое пытанне дазволіла ўдзельнікам дэбатаў на некаторы час адысці ад сур'ёзных разважанняў і крышачку памарыць.
— Дэбаты атрымаліся плённымі і для нас, лідараў студэнцкіх арганізацый, і для экспертаў, таму што ва ўсіх была магчымасць выказацца і паслухаць. Увогуле, пасля падобных мерапрыемстваў у мяне з'яўляецца шмат ідэй, якія я магу рэалізаваць у сваім універсітэце. Напрыклад, прагучала думка, што неабходна аб'ядноўвацца лідарам розных студэнцкіх арганізацый, якія існуюць у ВНУ, для больш эфектыўнага самакіравання, — расказаў Аляксандр СЯНЧУК, сакратар БРСМ Брэсцкага дзяржаўнага тэхнічнага ўніверсітэта.
Таксама падзялілася ўражаннямі Хрысціна Кіслова, сакратар БРСМ Полацкага дзяржаўнага ўніверсітэта:
— Мне было цікава не толькі самой паразважаць на тэму студэнцкага самакіравання, але і пачуць меркаванні экспертаў, паколькі яны ўспрымаюць яе з іншага пункту гледжання. Я задумалася і пра тое, як праводзяцца выбары лідараў студэнцкіх арганізацый. Напэўна, было б карысна ва ўніверсітэцкім асяродку ладзіць перадвыбарныя кампаніі.
Вынікі дэбатаў Міхаіл Жураўкоў падвёў адной ёмістай фразай пра ўдзельнікаў: «Вы іншыя, але вы класныя!»
Ганна КУРАК, студэнтка ІV курса Інстытута журналістыкі БДУ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».