Абгрунтаваныя чаканні

Другі Расійска-Беларуска-Аўстрыйскі форум, які праходзіць у Мінску ў гэтыя дні, з'яўляецца важным фарматам міжнародных зносін ва ўмовах з'яўлення ў Еўропе розных інтэграцыйных фарматаў, перш за ўсё еўрапейскага і еўразійскага. Вядома, камусьці можа падасца незвычайным падбор удзельнікаў — партнёрамі па форуме велізарнай Расіі выступаюць Беларусь, якая ўваходзіць у Еўразійскі эканамічны саюз, і Аўстрыя (Еўрапейскі саюз), але менавіта ў гэтым і сэнс мерапрыемства — знайсці падставы для супрацоўніцтва, а не процістаяння ЕС і ЕАЭС.

Асабліва гэта важна ў цяперашняй сітуацыі, калі ў Еўропе фактычна складваецца абстаноўка часоў «халоднай вайны» паміж Расіяй і ЕС, а ўзаемныя санкцыі замяняюць сабой нармальныя формы дыялогу. Роля Беларусі ў развіцці кааперацыі еўразійскага і еўрапейскага інтэграцыйных праектаў удала сфармуляваў прэзідэнт Палаты эканомікі Аўстрыі Крыстаф Ляйтл, удзельнік форуму. На яго думку, «роля Беларусі — роля сувязнога звяна, свайго роду моста паміж ЕС і ЕАЭС, паміж гэтымі буйнымі інтэграцыйнымі аб'яднаннямі, каб ствараць стабільныя ўмовы функцыянавання эканомік, каб ЕС і ЕАЭС сапраўды станавіліся бліжэй».

Нагадаем, што першы трохбаковы эканамічны форум Беларусі, Расіі і Аўстрыі прайшоў 14 лістапада 2014 года ў Вене. Асноўнымі яго ўдзельнікамі былі прадстаўнікі буйнога бізнесу з усіх трох краін, а ўсяго ў яго рабоце прыняло ўдзел 170 прадпрыемстваў і арганізацый. Парадак дня ўключаў пытанні развіцця гандлёвага, вытворчага і інвестыцыйнага супрацоўніцтва краін-удзельніц.

Падчас цяперашняга форуму спектр пытанняў стаў больш спецыялізаваным, ахапіўшы найбольш важныя сферы. Асаблівая ўвага надаецца энергетыцы, інфраструктуры і лагістыцы, сельскай гаспадарцы і вытворчасці прадуктаў харчавання. Немалаважныя для ўдзельнікаў форуму і перспектывы ўзаемадзеяння бізнес-асацыяцый трох краін-удзельніц.

Вядома, ёсць цікавасць і да іншых патэнцыйных сфер супрацоўніцтва. У аўстрыйскіх прадпрыемстваў ёсць вялікі аўтарытэт і ў такіх галінах бізнесу, як ахова здароўя, электроніка і машынабудаванне, што цікава для Беларусі і Расіі з прычыны мадэрнізацыі эканомікі.

Важна памятаць і пра тое, што Аўстрыя, нягледзячы на адносна невялікую колькасць насельніцтва, супастаўную з беларускім, з'яўляецца буйным фінансавым цэнтрам Еўропы. Гэта звязана з імперскімі часамі, калі ў Вену, былую сталіцу спачатку Аўстрыйскай, а потым Аўстра-Венгерскай імперыі, сцякаліся велізарныя фінансавыя патокі з правінцыі. Пасля краху Аўстра-Венгерскай імперыі банкі з назапашанымі раней актывамі працягнулі паспяхова развівацца, адыгрываючы ўсё больш важную ролю ў фінансавай сістэме Еўропы.

Тое, што ў наступным годзе пройдзе і трэці форум, хутчэй за ўсё ў Расіі, не выклікае пытанняў. Гэтаму спрыяе як пазітыўная атмасфера правядзення мерапрыемства, якая абяцае рэалізацыю сур'ёзных праектаў з высокай нормай прыбытку яго ўдзельнікам, так і падбор арганізатараў. Мерапрыемствы арганізаваны Федэральнай Палатай эканомікі Аўстрыі, Беларускай і Расійскай гандлёва-прамысловымі палатамі, а гэта найважнейшыя праваднікі інтарэсаў нацыянальнага бізнесу ў сваіх краінах. Прыемна адзначыць і сур'ёзную падтрымку ў арганізацыі форуму з боку знешнепалітычных міністэрстваў усіх трох краін.

Ёсць падставы для значных пазітыўных перамен нашых адносін з ЕС. Еўрасаюз занадта доўга незаслужана сурова ставіўся да нашай краіны. А ва ўмовах, калі Беларусь набыла важнае геапалітычнае значэнне не толькі як мост паміж ЕС і ЕАЭС, але і як вельмі значная ва ўрэгуляванні ўкраінскага крызісу дзяржава, дрэнныя адносіны з Беларуссю цалкам супярэчаць нацыянальнай бяспецы краін ЕС. Ва ўмовах новых адносін, прызначаных нівеліраваць ранейшыя праблемы, узнікае шмат магчымасцяў для кааперацыі. Прыемна, што аднымі з першых імі спяшаюцца скарыстацца менавіта аўстрыйскія і расійскія бізнесмены, з якімі ў беларускіх прадпрыемстваў існуе доўгая гісторыя супрацоўніцтва.

Сяргей КІЗІМА, доктар палітычных навук