Шлюб Алены і Сяргея Р., жыхароў аднаго з райцэнтраў, распаўся некалькі гадоў таму. Жывуць у адным доме, але ў розных пакоях. Адносіны сапсаваныя настолькі, што былыя муж і жонка не размаўляюць зусім. Гэта вельмі нязручна, калі людзі жывуць без нармальнага кантакту, бо трэба ж весці гаспадарку, абслугоўваць і рамантаваць дом, плаціць за камунальныя паслугі...
Прыкладна паўгода назад Сяргей, які нейкі час у поўным памеры плаціў за камунальныя паслугі (за газ, святло, ваду), накіраваў Алене пісьмо... у суседні пакой з патрабаваннем плаціць за паслугі на «агульных паях»: палову ён, палову — былая жонка. Напісаў пісьмо, паклаў у канверт, кінуў у паштовую скрыню, пасля чаго паштальён прынёс пісьмо назад — у гэты ж дом, толькі ў суседні пакой.
Але ў адказ — цішыня, Алена быццам не бачыла яго. Сяргей злаваўся, нерваваўся, але так і не змог выклікаць былую жонку на размову. Прайшоў месяц, другі, трэці... Урэшце, цярпенне лопнула, мужчына звярнуўся да адваката, заплаціў за яго кансультацыі больш за мільён рублёў. У хуткім часе Алена і Сяргей атрымалі позвы ў суд.
Пазіцыя Алены з пункту гледжання мужа і адваката выглядала пройгрышнай: калі яна не плаціць за камунальныя паслугі, хоць пражывае ў гэтым доме, то суд можа прымусіць яе кампенсаваць затраты мужа і нават аплаціць паслугі адваката. Але ў судзе жанчына з лёгкай усмешкай дастала з сумачкі квітанцыі, якія пацвярджалі, што ўсе гэтыя месяцы яна... таксама ў поўным памеры аплачвала камунальныя паслугі. Фактычна за адну і тую ж паслугу жыльцы дома плацілі двойчы, а адказныя службы ніяк не рэагавалі на гэтыя пераплаты.
У выніку суд не знайшоў у дзеяннях Алены ніякага «крыміналу». Крыху збянтэжаны былы муж запатрабаваў, каб яму кампенсавалі судовыя затраты, але на якой падставе? Калі б іск быў задаволены — то няма пытанняў, але тут жанчына ні ў чым не вінаватая.
...Якая напрошваецца выснова? Ва ўмовах гендэрнай барацьбы някепскім «партнёрам» можа стаць... маўчанне — каб збянтэжыць, збіць з панталыку мужчыну. Сучаснай жанчыне не трэба спыняць імклівых коней або рвацца ў палаючую хату, каб даказаць сваю перавагу. Ёй дастаткова проста перастаць гаварыць.
Аляксандр ГОРБАЧ
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.