У апошні час Новы год і папярэднія яму тыдні ў многіх беларусаў перасталі асацыявацца з маразамі, снегам і льдом. Усё часцей снежань прыносіць толькі халодныя дажджы і слоту. Але зарадзіцца пераднавагоднім настроем нават у такое надвор'е жыхарам сталіцы цяпер стане прасцей — у гандлёвым цэнтры ALL на Даўгінаўскім тракце з'явіўся так званы «ледзяны пакой», у якім пара года не залежыць ад навакольнага асяроддзя.
На 24-х квадратных метрах размяшчаюцца сані, канапа, трон і камін, заселены пакой жывёламі, якія традыцыйна асацыююцца з зімой, у прыватнасці, зайцамі. Усё гэта зроблена з лёду, а захоўвае інтэр'ер тэмпература ў мінус 10 градусаў. Без цёплай вопраткі пратрымацца ў такой казачнай рэзідэнцыі цяжка. Дапаўняе экспазіцыю атмасферная падсветка. Усю «мэблю» можна кранаць і нават выкарыстоўваць па прамым прызначэнні, праўда, не надта доўга — каб не прастудзіцца.
— Ідэя з'явілася проста — мы хацелі зрабіць нешта такое, чаго яшчэ не было ў Беларусі, — распавядае аўтарка ідэі ледзянога пакоя, спецыяліст па маркетынгу кампаніі-забудоўшчыка «А-100 Дэвелапмент» Вольга ЦІШКЕВІЧ. — Выпадкова ўбачылі працы студыі ледзянога мастацтва Nіce, якая потым і стала выканаўцам праекта, і вырашылі, што гэта будзе цікава. Ад моманту распрацоўкі макета і да завяршэння работ над скульптурамі прайшло два месяцы. Наведванне пакою будзе для ўсіх бясплатным, працаваць ён будзе штодзень з 10 раніцы да самага вечара, а сам праект працягнецца да 15 студзеня. Магчыма, па завяршэнні выставім скульптуры на вуліцы.
Па словах кіраўніка студыі ледзянога мастацтва Nіce Аляксея АЎСЕЙКІ, працэс стварэння ледзяных скульптур — не самая простая задача. Нават вада, якая пасля прымае выбраную мастаком форму, рыхтуецца па спецыяльнай тэхналогіі — у яе павінен быць пэўны хімічны састаў і асаблівыя характарыстыкі. Усяго падчас працы было выкарыстана шэсць тон вадкасці, а некаторыя экспанаты важаць каля тоны. Стваральнік пакоя абяцае, што за больш як месяц фігуры не сапсуюцца і не зменяць форму, калі толькі чыя-небудзь неахайнасць не пакіне зайцаў без вушэй.
Для будучых наведнікаў пакоя стваральнікі падрыхтавалі адмысловую праграму: штодзень каля пакоя будзе «дзяжурыць» Дзед Мароз, тут жа яму можна будзе пакінуць ліст з пажаданымі падарункамі (вядома, у ледзяной скрыні).
[caption id="attachment_113713" align="alignnone" width="600"] Па словах Юрыя Гігіняка, адзінае ратаванне ног ад лютых маразоў Антарктыкі — драўляныя хэндмэйд-тапачкі. Адну пару палярнік падарыў ледзяному пакою.[/caption]
У цырымоніі адкрыцця сталічнага «полюса холаду» ўзялі ўдзел і тыя, каму да маразоў і замкнёнай прасторы не прывыкаць: беларускія палярнікі Юрый ГІГІНЯК і Уладзіслаў МЯМІН расказалі наведнікам пра свае прыгоды і штодзённае жыццё ў Антарктыдзе. Разам з палярнікамі прысутныя запісалі зварот да сваіх калег, якія цяпер накіроўваюцца на паўднёвы кантынент і на працягу наступных месяцаў будуць манціраваць там першую беларускую антарктычную станцыю. Прывітанне з радзімы каманда ўбачыць, як толькі вернецца на вялікую зямлю ў афрыканскім Кейптаўне.
Яраслаў ЛЫСКАВЕЦ
lyskavets@zvіazda.by
Фота Надзеі БУЖАН
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.