Вы тут

«Лідскае» завяршыла мадэрнізацыю, распачатую ў 2008-м


Міжнародны канцэрн Olvі Oyj (Фінляндыя) выдаткаваў на гэта звыш 80 млн еўра. Такім чынам, завяршыўся самы паспяховы інвестыцыйны праект у айчыннай харчовай прамысловасці за апошнія гады. Завод стварыў выдатны плацдарм для найдалейшага абнаўлення і развіцця па прыкладзе лепшых еўрапейскіх стандартаў.

15-11

Мадэрнізацыя закранула ў першую чаргу водападрыхтоўку. «Сама вада здабываецца з дзвюх уласных свідравін глыбінёй 280 м — яны забяспечваюць усе патрэбы завода, — тлумачыць галоўны півавар «Лідскага піва» Дзмітрый НІЧЫПАР. — Усё ж такі тут выпускаецца і піва, і пітная вада, і некалькі відаў салодкіх напояў кампаніі Pepsі. Такая сур'ёзная кампанія адпаведным чынам ставіцца да вырабу сваёй прадукцыі ў іншых краінах, а таму ўзоры той пітной вады, што пойдзе на выраб «Пепсі», «Сэвен Ап» і «Мірынды», давялося дасылаць на экспертызу ў ЗША. Напоі патрабуюць самай мяккай вады, без жалеза і соляў. Для пітной жа вады «Аўра», напрыклад, цалкам выдаляць солі нельга. А для «піўной» вады — наогул свае патрабаванні». Трыа розных фільтраў — гэта ўнікальна для нашай краіны. Адным словам, самая сучасная ў Беларусі і суседняй Прыбалтыцы сістэма водападрыхтоўкі — на «Лідскім піве».

Аднак для вырабу піва толькі добрай вады недастаткова. Быў пабудаваны новы варачны цэх, у якім устаноўлена нямецкае абсталяванне. У новай варніцы можна ажыццяўляць 12 варак за суткі па 45 тысяч літраў за адну варку. Абсталяванне энергаэфектыўнае і экалагічнае. Лічыцца, што ў варніцы забяспечваецца 80 працэнтаў якасці і смаку будучага напою. Для гатавання сусла выкарыстоўваюцца розныя сарты хмелю — ад горкіх да духмяных. Дарэчы, у продажы ёсць нават від піва, які ў Лідзе вараць з аўстралійскага хмелю. Наогул тут даўно практыкуюць выраб невялікіх партый «аўтарскага» піва.

Самае важнае далей — кампазіцыя цукраў, якія праявяць сябе на наступнай стадыі, у браджэнні. Пачынаецца яно з дадаваннем дражджэй. Дарэчы, набываюцца яны ў Германіі і каштуюць нямала. Працэс ператварэння сусла ў піва можа цягнуцца 5-7 сутак, а для некаторых сартоў піва патрабуецца і 14-15, і нават 18-22 дні.

Новае дражджавое аддзяленне дазваляе сёння вырабляць піва па новых тэхналогіях. У цэху браджэння ўсталявана шэсць цыліндра-канічных танкаў на 330 куб. м (на фота). А ўсяго на прадпрыемстве — 28 «танкаў» для піва і квасу, уключаючы міні-«танк» для вырабу эксперыментальных, невялікіх партый крафтавага піва.

Паводле слоў генеральнага дырэктара ААТ «Лідскае піва» Аўдрыуса МІКШЫСА, цягам усёй сваёй 140-гадовай гісторыі існавання прадпрыемства ніколі не здраджвала выпуску хмельнага напою. Абнаўленне закранула ўсе працэсы вытворчасці. Аднак спадар Мікшыс дбае не толькі аб будучыні завода, але і аб захаванні мінулага. Таму ў планах — рэканструкцыя адной з заводскіх пабудоў ХІХ стагоддзя. Яна размешчана якраз на тэрыторыі завода, некалі побач пралягала адна з гарадскіх брукаваных вуліц, якую таксама будуць аднаўляць. Магчыма, удасца арганізаваць і музей гісторыі піваварэння Беларусі, і сувенірны гандаль для ўдзельнікаў экскурсій. Пры такім раскладзе паглядзець, што такое сучасны выраб піва, змогуць не толькі журналісты, а ўсе ахвотныя, уключаючы саміх лідчан, якія, магчыма, і не здагадваюцца, адкуль бярэцца іх роднае «Жыгулёўскае спецыяльнае».

Святлана БАРЫСЕНКА

protas@zviazda.by

Выбар рэдакцыі

Здароўе

​Як абараніць сябе ад кардыялагічных праблем у халодны перыяд?

​Як абараніць сябе ад кардыялагічных праблем у халодны перыяд?

Менавіта зімой павялічваецца колькасць інфарктаў і павышаецца артэрыяльны ціск.

Культура

Успаміны пра Яўгенію Янішчыц

Успаміны пра Яўгенію Янішчыц

Піша Зіновій Прыгодзіч.

Грамадства

У 2023 годзе з'явяцца квоты на рабочыя месцы для людзей з інваліднасцю

У 2023 годзе з'явяцца квоты на рабочыя месцы для людзей з інваліднасцю

У Беларусі на сённяшні дзень звыш 570 тысяч чалавек маюць інваліднасць.

Грамадства

АЭС у Астраўцы гатова да імітацыі работы ядзернага рэактара

АЭС у Астраўцы гатова да імітацыі работы ядзернага рэактара

Першы энергаблок Беларускай АЭС гатовы на 95 %, другі — на 70 %.