Рэспубліканская дабрачынная акцыя «Нашы дзеці» адбылася ў дзяржаўнай установе адукацыі «Дзіцячы дом №3». Тут сапраўды пачуваешся як дома, у атмасферы любові і клопату. У доме жывуць 60 дзетак ва ўзросце ад 2 да 8 гадоў з асаблівасцямі псіхафізіялагічнага развіцця. Яны займаюцца ў музычных, тэатральных, харэаграфічных і мастацкіх гуртках. Пераднавагоднія дні — для іх цудоўная нагода паказаць свае здольнасці.
Музычна-танцавальная імпрэза атрымалася на славу. Дзед Мароз спачатку прынёс мяшок з падарункамі, які... уцёк ад малых — так-так, у яго былі «ногі». Але пасля шчодры старац выдаў кожнаму па святочным пакунку. А потым і дарослыя, і дзеці сталі ў карагод...
— Цудоўнае мерапрыемства, педагогі добра папрацавалі, бо свята спадабалася дзецям, — адзначыў міністр прыродных рэсурсаў і аховы навакольнага асяроддзя Андрэй КАЎХУТА. — Нам, як гледачам, было прыемна прыняць удзел у навагоднім спектаклі, а маленькія выступоўцы сапраўды пастараліся.
— Адчуваецца, што педагагічны калектыў уклаў душу ў сваіх выхаванцаў. Жадаю, каб у новым годзе ў вас былі сілы перадаць дзецям любоў, бо толькі яна дае ім развіццё, — павіншавала педагогаў і выхавацеляў намеснік старшыні Мінскага гарадскога выканаўчага камітэта Жанна БІРЫЧ.
Андрэй Каўхута прэзентаваў кнігі экалагічнай тэматыкі і расліны — каралавую траву: педагогі плануюць аформіць у дзіцячым доме «зялёныя куткі». У кожную групу (іх тут усяго 7) адправіліся вялікія пакункі з цукеркамі. У сваю чаргу дзеці падарылі гасцям зробленыя сваімі рукамі паштоўкі і цацкі: іх можна было атрымаць, напрыклад, у бяспройгрышнай латарэі.
— Уявіце сабе, калі дома жывуць 60 дзяцей — гэта не так проста, — падзялілася назіраннямі дырэктар дзіцячага дома Таісія КУЗНЯЦОВА. — Вельмі важна падабраць калектыў, каб людзі сапраўды зараджаліся гэтай справай, імкнуліся дапамагчы малым.
Кацярына РАДЗЮК. radziuk@zviazda.by
Фота Аляксандра ШАБЛЮКА
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
