Штотыдзень у эфіры тэлеканала «Беларусь 3» гульня «Размаўляем па-беларуску». Для таго, каб стаць яе ўдзельнікамі, неабходна зайсці на сайт tvrgomel.by або 3belarus.by і праз банер «Размаўляем па-беларуску» запоўніць заяўку на каманду з трох чалавек. Ну а праверыць сваё веданне роднай мовы пасля таго, як праграма выйшла ў эфір, можна з дапамогай «Звязды». Ці ведалі вы, што:
Ахмістры́ня (устарэлае) — жанчына, якая вядзе гаспадарку ў багатым доме. Ахмістрыня на сучасны лад — тая самая эканомка.
Ралля́ — узаранае поле, глеба. Па-руску: пашня.
Імпэ́т (адно са значэнняў) — пыл, пылкасць, імкненне. Імпэт да працы.
Скі́ба — адрэзаны вялікі плоскі кавалак хлеба. «Дзядзька падносіць ім тлустае сала, рэжа таўшчэзнымі скібамі хлеб», — чытаем у Пятра Прыходзькі.
Перакасава́ць — закрэсліць зусім, цалкам. Перакасаваць можна верш, старонку рукапісу.
Стрыва́ць — цярпліва паставіцца да чаго-небудзь. Стрываць боль.
Хоць у пятлю лезь — дайсці да складанага, безвыходнага становішча. Яшчэ беларусы скажуць: хоць кладзіся і памірай, хоць у вір галавой. Рускія — хоть в омут головой.
Мазаць дзёгцем — незаслужана зневажаць некага, няславіць. Беларускія сінонімы — вешаць сабак, выліваць памыі. Рускі — обливать грязью. Выраз «мазаць дзёгцем» узнік згодна з даўнейшым звычаем мазаць дзёгцем у начны час вароты гаспадару, намякаючы гэтым самым на якую-небудзь ягоную правіннасць ці членаў яго сям'і і тым самым ганьбячы іх.
Чарговыя выпускі тэлевіктарыны глядзіце ў эфіры «Беларусь 3» раніцай кожную суботу.
Ірына АСТАШКЕВІЧ.
іost@zvіazda.by
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
