21 Верасень, пятніца

Вы тут

Новаўвядзенні Падатковага кодэкса


З першых дзён года ў краіне пачынае дзейнічаць рэдакцыя Падатковага кодэкса Беларусі са зменамі і дапаўненнямі. Сумесна са спецыялістамі прэс-службы Міністэрства па падатках і зборах рэдакцыя «Звязды» падрыхтавала каментарый па найбольш істотных новаўвядзеннях у ПК, якія з'яўляюцца актуальнымі для большасці чытачоў нашай газеты.


Карт-бланш для мясцовых каштоўных папер

Сапраўды прыемнай навіной для студэнтаў стане дапаўненне ў ПК, згодна з якім вызваляюцца ад падаходнага падатку даходы, атрыманыя за працу ў складзе студэнцкіх атрадаў, што ажыццяўляюць сваю дзейнасць не толькі на тэрыторыі нашай краіны, але і на тэрыторыі дзяржаў — удзельніц Садружнасці Незалежных Дзяржаў.

Цяпер студатрадаўцы вызваляюцца ад падаткаў на ўсіх аб’ектах. На фота: удзельнікі будаўнічага атрада на Беларускай АЭС у Астраўцы.

Таксама спрошчаны парадак вызвалення ад падаходнага падатку даходаў, што атрымліваюцца фізічнымі асобамі ад рэалізацыі акцый беларускіх арганізацый. Цяпер выключана ўмова аб тым, што падатковая льгота прымяняецца толькі ў дачыненні да акцый, атрыманых у ходзе першаснага размяшчэння.

Сёлета вызваляюцца ад падаходнага падатку і даходы ад рэалізацыі любых акцый беларускіх арганізацый, у тым ліку атрыманых як у ходзе першаснага размяшчэння, так і набытых на другасным рынку.

У гэтым выпадку патрабуецца выкананне толькі наступных умоў: акцыі, якія рэалізуюцца, павінны належаць фізічнай асобе не менш за тры гады з даты іх набыцця і быць рэалізаванымі асобе, якая не з'яўляецца эмітэнтам гэтых акцый.

Праіндэксавалі дзіцячыя пуцёўкі, матдапамогу і аплату страхавых паслуг

У Падатковым кодэксе новай рэдакцыі павялічаны памеры даходаў, у межах якіх вызваляюцца ад падаходнага падатку пэўныя даходы грамадзян. Сёлета гэта максімальны кошт дзіцячых пуцёвак у санаторна-курортныя і аздараўленчыя арганізацыі краіны да 6,28 млн рублёў (раней было 5,54 млн рублёў). Не абкладаецца падаткам даход у выглядзе матэрыяльнай дапамогі, падарункаў і прызоў, якія атрымлівае супрацоўнік ад арганізацыі па месцы асноўнай работы (службы, вучобы) у памеры да 14,94 млн рублёў (было да 13,19 млн рублёў); ад іншых арганізацый — да 990 тысяч рублёў (было 870 тысяч рублёў).

У гэтай катэгорыі падатковых ільгот праіндэксавалі аплату страхавых паслуг, якую за фізічную асобу аплаціла арганізацыя (па месцы асноўнай працы), у тым ліку па дагаворах добраахвотнага страхавання жыцця, дадатковай пенсіі, медыцынскіх расходаў — з 16 млн рублёў да 18,13 млн рублёў на працягу каляндарнага года. Павялічаны памер не абкладанай падаткам бязвыплатнай (спонсарскай) дапамогі, якая атрымліваецца інвалідамі, непаўналетнімі дзецьмі-сіротамі і дзецьмі, што засталіся без апекі бацькоў, — з 87,255 млн рублёў да 98,86 млн рублёў на працягу каляндарнага года. Без падаткаў сёлета атрымліваецца даход ад прафсаюзных арганізацый іх членамі, у тым ліку ў выглядзе матэрыяльнай дапамогі, падарункаў і прызоў, аплаты кошту пуцёвак у памеры да 2,99 млн рублёў (было з 2,635 млн рублёў) на працягу каляндарнага года.

Павялічаны стандартныя вылікі

Таксама ў навай рэдакцыі ПК былі праіндэксаваны памеры стандартных падатковых вылікаў, якія прадастаўляюцца фізічным асобам у адпаведнасці з артыкулам 164 Падатковага кодэкса.

Паводле інфармацыі прэс-цэнтра МПЗ, стандартны падатковы вылік, які прадастаўляецца работніку па месцы асноўнай работы, плануецца павялічыць з 730 тысяч да 830 тысяч рублёў у месяц пры атрыманні даходу, які падлягае падаткаабкладанню, у суме, што не перавышае 5,010 млн рублёў у месяц. Стандартны падатковы вылік на дзяцей да васямнаццаці гадоў і (або) утрыманцаў плануецца павялічыць з 210 тысяч да 240 тысяч рублёў у месяц, а таксама для асобнай катэгорыі грамадзян з 410 тысяч да 460 тысяч рублёў у месяц. А стандартны падатковы вылік, вызначаны падпунктам 1.3 пункта 1 артыкула 164 Падатковага кодэкса, для асобнай катэгорыі грамадзян плануецца павялічыць з 1,030 млн рублёў да 1,170 млн рублёў у месяц.

Маёмасны вылік залежыць толькі ад дагавора

У мэтах забеспячэння роўных умоў атрымання грамадзянамі, якія стаяць на ўліку для паляпшэння жыллёвых умоў маёмаснага падатковага выліку на будаўніцтва жылля, з падпункта 1.1 пункта 1 артыкула 166 Падатковага кодэкса выключана норма, якая прадугледжвала магчымасць атрымання асобамі, якія адмовіліся ад унутранага адстройвання пабудаванага з прыцягненнем забудоўшчыка (падрадчыка) жылля, выліку на суму гэтых работ пры самастойным правядзенні такіх работ па заканчэнні будаўніцтва жылля. З 2016 года маёмасны падатковы вылік прадастаўляецца ў межах канчатковага кошту будаўніцтва жылля, прадугледжанага дагаворам з улікам унесеных у яго змен або дапаўненняў.

А падпункт 1.2 пункта 1 артыкула 166 Падатковага кодэкса дапоўнены парадкам пераразліку расходаў, панесеных фізічнымі асобамі ў замежнай валюце на набыццё маёмасці, даходы ад выплатнага адчужэння якога падлягаюць падаткаабкладанню падаходным падаткам. Так, выдаткі, звязаныя з набыццём выплатна адчужальнай маёмасці і (або) яго адчужэннем і зробленыя ў замежнай валюце, падлягаюць пераразліку ў беларускія рублі па афіцыйным курсе беларускага рубля, устаноўленым Нацыянальным банкам Беларусі ў адносінах да адпаведнай замежнай валюты на дату фактычнага атрымання плацельшчыкам даходаў ад адчужэння маёмасці.

З даходаў у казіно — 4%

Менавіта з гэтага года адменена льгота па падаходным падатку ў дачыненні да даходаў у выглядзе выйгрышаў (вернутых незгуляных ставак), атрыманых грамадзянамі ад арганізатараў азартных гульняў (казіно, букмекерскіх кантор, залаў гульнявых аўтаматаў і таталізатараў).

Прызнанне аб'ектам падаткаабкладання падаходным падаткам як выйгрышаў, так і вернутых незгуляных ставак абумоўлена тым, што цяпер адсутнічае тэхнічная магчымасць падзелу і ўліку, а таксама кантролю ўпаўнаважанымі дзяржаўнымі органамі, які выгляд выплаты — выйгрыш або вернутая незгуляная стаўка, ажыццяўляецца арганізатарам азартных гульняў пры арганізацыі і правядзенні дазволеных ў краіне азартных гульняў. Больш за тое, для дзейнасці па змесце казіно вядзенне такога ўліку немагчыма з прычыны спецыфікі гульняў у карты, цыліндрычнай гульні (рулетка).

Падаткаабкладанне даходаў у выглядзе выйгрышаў (вернутых незгуляных ставак) ажыццяўляецца па стаўцы ў памеры 4% без ужывання вылікаў і льгот па падаходным падатку.

З мэтай устанаўлення адзіных падыходаў з беларускімі грамадзянамі, арганізатары азартных гульняў цяпер вызваляюцца ад абавязку падаваць у падатковыя органы звесткі аб даходах, выплачаных замежным грамадзянам, якія ў далейшым накіроўваюцца ў падатковыя органы адпаведных замежных дзяржаў.

Калі расходы больш за даходы...

Не ўсе жыхары нашай краіны сёння добраахвотна плацяць падаходны падатак з усіх сваіх даходаў. Аднак парушэнні такія выяўляюцца. Пасля выяўлення падатковым органам перавышэння расходаў над даходамі для такіх «прадпрымальнікаў» пачынае дзейнічаць іншы механізм падаткаабкладання. З 2016 года падпунктам 4.2 пункта 2 артыкула 173 Падатковага кодэкса ўстаноўлена стаўка падаходнага падатку ў памеры 16 працэнтаў у дачыненні да даходаў, палічаных падатковым органам, зыходзячы з сум перавышэння выдаткаў над даходамі ў адпаведнасці з заканадаўствам.

Даход ад арэнды кватэры лепш падлічыць за год

Калі фізічная асоба здае сваё жыллё ў доўгатэрміновую арэнду, то ўласнік такой нерухомасці плаціць штомесяц фіксаваную стаўку падаходнага падатку. Гэта ў тым выпадку, калі сукупны даход ад такой арэнды не вельмі вялікі. Сёлета ў ПК прапісаны такі максімальны памер гадавога даходу (ён павялічаны з 43,66 млн рублёў да 49,47 млн рублёў), атрыманага ад здачы іншым фізічным асобам жылых і нежылых памяшканняў унаём, пры перавышэнні якога падаткаабкладанне атрыманых даходаў ажыццяўляецца ў агульнапрынятым парадку па стаўцы 13%.

Стаўка на нерухомасць павялічваецца

Вядома, што стаўка падатку на нерухомасць для насельніцтва складае 0,1% ад кошту гэтай маёмасці за год. Адна кватэра ўласніка ў шматкватэрным жылым доме ад аплаты падобнага падатку вызваляецца. На другую і наступныя раней плаціўся пэўны падатак. Цяпер багатых вырашылі крыху «прычасаць». Артыкулам 188 ПК вызначана, што гадавая стаўка падатку на нерухомасць для фізічных асоб, у тым ліку зарэгістраваных у якасці індывідуальных прадпрымальнікаў, якія маюць ва ўласнасці два і больш жылых памяшканняў у шматкватэрных і (або) у блакіраваных жылых дамах, устаноўлена ў памеры 0,2% ад кошту маёмасці.

Адзіны падатак для індывідуальных прадпрымальнікаў (ІП) і іншых фізічных асоб

Сёлета для ІП-плацельшчыкаў адзінага падатку ўстаноўлены абавязак вядзення першасных уліковых дакументаў па правілах, устаноўленых заканадаўствам для ІП, якія вядуць улік даходаў і расходаў (дапаўненні пункта 5 артыкула 293 Падатковага кодэкса).

Пералік відаў дзейнасці, што абкладаюцца адзіным падаткам, дапоўнены відам дзейнасці «Здача ў арэнду (субарэнду), наём (паднаём) жылых памяшканняў, садовых домікаў, дач, машына-месцаў, акрамя прадастаўлення месцаў для кароткатэрміновага пражывання». Цяпер прадпрымальнікі, якія ажыццяўлялі ў 2015 годзе гэты від дзейнасці (у частцы аказання паслуг спажыўцам), абавязаны сёлета з 1 студзеня спыніць прымяненне іншых рэжымаў падаткаабкладання і перайсці на аплату адзінага падатку.

З мэтай захавання адзіных падыходаў па пытанні вызвалення ад падаходнага падатку даходаў донараў, у тым ліку ў выглядзе захавання сярэдняга заробку пры здачы крыві і яе кампанентаў на бязвыплатнай аснове, у падпункт 1.4 пункта 1 артыкула 163 Падатковага кодэкса ўнесены рэдакцыйныя праўкі.

 

Дадаць каментар

Выбар рэдакцыі

Грамадства

Чаму ў Беларусі варта аптымізаваць колькасць сельсаветаў

Чаму ў Беларусі варта аптымізаваць колькасць сельсаветаў

І павышаць эфектыўнасць работы мясцовых органаў улады.

Грамадства

Якіх педагогаў  хочуць бачыць дзеці ў аб'яднаннях па інтарэсах?

Якіх педагогаў хочуць бачыць дзеці ў аб'яднаннях па інтарэсах?

​Для сістэмы дадатковай адукацыі ўласцівы адкладзены ў часе эфект.

Грамадства

Чым здзіўлялі арганізатары Фестывалю навукі?

Чым здзіўлялі арганізатары Фестывалю навукі?

Толькі Ньютан і толькі хардкор!