Здавалася б, зусім нядаўна ў нас ужо праходзіў перапіс: нехта запоўніў анкеты на працы, да некага валанцёры прыходзілі дадому. Аднак ужо сёння ідзе падрыхтоўка да наступнага — у 2019 годзе мы зноў пройдзем праз гэту працэдуру. У Палату прадстаўнікоў паступіў дакумент, які прадугледжвае ўнясенне шэрагу змен і дапаўненняў у Закон «Аб перапісе насельніцтва». Там улічаны праблемы, з якімі сутыкнуліся мясцовыя структуры, самі перапісчыкі ў 2009 годзе.
Дэпутат Ілья Мурашка, член Пастаяннай камісіі Палаты прадстаўнікоў па бюджэце і фінансах, спецыяльна для нашага выдання расказаў, якія прапануюцца змены ў законапраект.
— Падчас падрыхтоўкі да правядзення перапісу насельніцтва ў 2009 годзе быў выяўлены шэраг праблем, што ўскладняюць разуменне нормаў закона, — паведаміў дэпутат. — Гэта і рознае разуменне дзяржаўнымі органамі і іншымі арганізацыямі прадпісанняў закона падчас перапісу насельніцтва, і вызначэнне парадку і крыніц аплаты працы часовага персаналу, які задзейнічаны ў перапісе насельніцтва...
Новая рэдакцыя закона прадугледжвае ўдакладненне асобных тэрмінаў і іх азначэнняў. Так, тэрмін «перапіс насельніцтва» ўдакладнены ў адпаведнасці з новай рэдакцыяй Закона «Аб дзяржаўнай статыстыцы». Зменены таксама азначэнні тэрмінаў «перапісны ліст», «выніковыя даныя», «абязлічаныя персанальныя даныя».
— Мы павінны разумець, што карэкціроўка Закона «Аб перапісе насельніцтва» звязана і з тым, што ў некаторыя заканадаўчыя акты, цесна звязаныя з гэтым праектам закона, унесены пэўныя змены, — патлумачыў Ілья Мурашка.
Забяспечыць поўны ахоп насельніцтва
Да істотных праблем, якія плануецца вырашыць зменамі спецыялізаванага закона, адносіцца, безумоўна, той факт, што ў 2009 годзе па-за сферай заканадаўчага рэгулявання аб правядзенні перапісу апынуліся асобныя катэгорыі насельніцтва.
— У прыватнасці, гэта асобы, што навучаліся ў сувораўскіх, кадэцкіх вучылішчах, спецыялізаваных ліцэях, а таксама выхаванцы воінскіх часцей, — пералічыў суразмоўца. — У Кодэкс аб адукацыі былі ўнесены змены, на аснове якіх прадугледжваюцца адпаведныя дапаўненні і ў новую рэдакцыю закона «Аб перапісе насельніцтва» — вызначаецца парадак правядзення перапісу гэтых катэгорый асоб.
Падчас мінулага перапісу некаторыя прадстаўнікі часовага персаналу сутыкаліся з тым, што паўналетнія, якіх апытвалі, адмаўляліся даваць звесткі аб адсутных на той момант у кватэры членах сям'і.
— У сувязі з гэтым дзеля поўнага ахопу насельніцтва праектам закона прадугледжваецца ўстанаўленне абавязку для паўналетняга члена сям'і паведамляць звесткі пра адсутных падчас правядзення перапісу членах сям'і, — адзначыў дэпутат.
Праект закона канкрэтызуе абавязкі мясцовых выканаўчых і распарадчых органаў у тым, што тычыцца ўзаемадзеяння з дзяржаўнымі структурамі, якія здзяйсняюць падрыхтоўку і правядзенне перапісу насельніцтва, а таксама падбор часовага перапіснога персаналу.
— Пры падрыхтоўцы і правядзенні перапіcу насельніцтва ў нашай краіне ў 2019 годзе плануецца прыцягнуць часовы перапісны персанал без выплаты ўзнагароджання, але з захаваннем заработнай платы або стыпендыі па асноўным месцы працы ці вучобы, — праінфармаваў дэпутат.
Без значка, але з пасведчаннем
Значнае месца ў праекце закона надаецца і эканоміі бюджэтных сродкаў.
— У 2009 годзе кожнаму прадстаўніку часовага персаналу, занятаму ў перапісе, выдаваўся нагрудны значок і пасведчанне, — нагадаў Ілья Мурашка. — А на выраб гэтых значкоў падчас мінулага перапісу выдаткавана 65 тысяч долараў ЗША. Па сутнасці ж, гэтыя значкі не патрэбны, і падчас наступнай кампаніі па перапісе насельніцтва часовым супрацоўнікам будзе выдавацца толькі пасведчанне.
Яшчэ адна крыніца эканоміі — раней значная сума грошай трацілася на захаванне звестак аб перапісе на папяровым носьбіце.
— Раней звесткі аб перапісе захоўваліся на папяровым носьбіце на працягу трох гадоў. Пасля гэта ўсё перадавалася на захоўванне ў галоўны архіў краіны. Выдаткі ў 2009 годзе, звязаныя з перадачай перапісных лістоў, іншай перапісной дакументацыі для архіўнага захоўвання, склалі 413 тысяч долараў ЗША. У гэтым законапраекце адпаведныя моманты ўлічаны, у сувязі з чым прадугледжваецца, што часова захоўвацца на працягу трох гадоў перапісныя лісты будуць, але наступная перадача ў цэнтральны архіў будзе здзяйсняцца толькі на лічбавым носьбіце.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.