25 Ліпень, панядзелак

Вы тут

Студэнт, праблемы? Плячо падставіць прафкам


Рашэнне аб стварэнні Маладзёжнага савета пры Беларускім прафсаюзе работнікаў адукацыі і навукі было прынята на ІІІ пленуме Цэнтральнага камітэта галіновага прафсаюза. Узначаліў яго Міхаіл Барэйша — старшыня прафсаюзнага камітэта студэнтаў Беларускага дзяржаўнага эканамічнага ўніверсітэта. Мяркуецца, што Маладзёжны савет будзе акумуляваць перспектыўныя ідэі і прапановы па рэалізацыі маладзёжнай палітыкі і агучваць праблемы навучэнскай і працоўнай моладзі.

У цэнтры ўвагі ўдзельнікаў пленуму аказаліся сацыяльныя гарантыі моладзі, аздараўленне студэнтаў, падтрымка маладых спецыялістаў, інфармацыйная дзейнасць прафсаюза і многія іншыя.


З марай пра інтэрнат

— Студэнцкі прафсаюз — унікальная арганізацыя, якая дзейнічае ў інтарэсах студэнтаў і мае магчымасць гаварыць на роўных як з кіраўніцтвам універсітэта, так і са студэнтамі. З правамі і паўнамоцтвамі, што нарматыўна ўрэгуляваны ў пагадненнях з установамі адукацыі. Трэба разумець, што фактычна ніводнае пытанне, якое тычыцца студэнтаў, не вырашаецца без уліку меркавання студэнцкага прафкама, — падкрэслівае старшыня ЦК Беларускага прафсаюза работнікаў адукацыі і навукі
Аляксандр БОЙКА.
 — Прафсаюз уключае сваіх прадстаўнікоў ва ўсе ўніверсітэцкія камісіі, дзейнасць якіх закранае пытанні вучэбна-выхаваўчага працэсу і стыпендыяльнага забеспячэння, сацыяльныя і жыллёва-бытавыя пытанні. Маніторыць умовы пражывання студэнтаў. Удзельнічае ў распрацоўцы правілаў унутранага распарадку ў інтэрнатах, палажэнняў аб засяленні студэнтаў у інтэрнаты, у размеркаванні месцаў. Адлічэнне навучэнцаў — членаў галіновага прафсаюза ці прыцягненне іх да дысцыплінарнай адказнасці таксама не дапускаецца без ўзгаднення з прафкамам навучэнцаў.

...Кожны першакурснік, які прыехаў вучыцца ў Мінск з іншага горада, скажа вам, што паступіць у сталічную ВНУ — толькі палова справы. Не менш важна атрымаць у інтэрнаце месца. Вось чаму забеспячэнне студэнтаў жыллём заўсёды знаходзіцца ў цэнтры ўвагі як Беларускага прафсаюза работнікаў адукацыі і навукі, так і Міністэрства адукацыі.

— Сёння паказчык забяспечанасці месцамі ў інтэрнатах навучэнцаў устаноў прафтэхадукацыі складае 100 працэнтаў, сярэдняй спецыяльнай адукацыі — 98 працэнтаў, а студэнтаў устаноў вышэйшай адукацыі — 81 працэнт (па Мінску — 77 працэнтаў). Маюць патрэбу ў засяленні ў інтэрнаты больш як 14 тысяч студэнтаў сталічных ВНУ. А ўсяго па краіне — 20,7 тысячы, — паведаміў на пленуме намеснік міністра адукацыі Віктар ЯКЖЫК.

У Гродзенскім універсітэце імя Янкі Купалы, Беларускім дзяржаўным універсітэце інфарматыкі і радыёэлектронікі, Беларускім дзяржаўным універсітэце, Беларускім дзяржаўным эканамічным універсітэце, Мінскім дзяржаўным лінгвістычным універсітэце і некаторых іншых установах адукацыі сітуацыя застаецца няпростай. Не ўсе студэнты задаволеныя і ўшчыльненнем інтэрнатаў, на якое адміністрацыя вымушана ісці з дазволу санітарных службаў. Напрыклад, у БНТУ больш за 2,5 тысячы студэнтаў заселены звыш санітарных нормаў.

Каб часткова змякчыць праблему, прафсаюзныя арганізацыі збіраюць і бясплатна прадастаўляюць студэнтам інфармацыю пра адрасы кватэр і пакояў, што здаюцца ўнаём.

Прафсаюзныя лідары ўзнялі перад прадстаўніком Міністэрства адукацыі пытанне аб кампенсацыі за наём жылля іншагароднім навучэнцам. Сёння студэнтаў, якія скарысталіся гэтай магчымасцю, у кожнай ВНУ можна палічыць на пальцах адной рукі. І сума кампенсацыі зусім несур'ёзная (памер яе складае тры базавыя велічыні ў Мінску і дзве базавыя — у іншых населеных пунктах). Да таго ж умовы для яе атрымання цяжкавыканальныя, сярод іх — патрабаванне прад'явіць заключаны з гаспадаром жыллёвай плошчы дагавор, на што апошнія ідуць неахвотна... Вырашыць гэтую праблему можна было б з дапамогай вызвалення ад падаходнага падатку грамадзян, якія здаюць у наём жылыя памяшканні іншагароднім студэнтам і навучэнцам. Хвалюе студэнтаў і перавышэнне тэмпаў росту кошту пражывання ў інтэрнатах над тэмпамі росту памеру іх стыпендый.

Галіновым прафсаюзам прынята рашэнне правесці ў 2016 годзе рэспубліканскі агляд-конкурс на найлепшы студэнцкі інтэрнат, у тым ліку арганізаваць на рэспубліканскім узроўні ўшанаванне лепшых студэнцкіх сем'яў.

Прафсаюз у сетцы

— Моладзь валодае пазітыўным патэнцыялам, які праяўляецца ў мабільнасці, ініцыятыўнасці, успрымальнасці да інавацыйных змен, здольнасці супрацьстаяць сучасным выклікам. Таму нам неабходна працаваць пад дэвізам: «Арганізацыю павінны бачыць!», — падкрэслівае Аляксандр Бойка.

Прафкамы студэнтаў першымі пачалі актыўную працу ў сацыяльных сетках. Напрыклад, «УКантакце» групы студэнцкіх прафкамаў БДУ, БНТУ, ГДУ імя Скарыны маюць больш за 3,5 тысячы падпісчыкаў. Больш за 2 тысячы падпісчыкаў у групах студэнцкіх прафкамаў Беларускага дзяржаўнага тэхналагічнага ўніверсітэта, Мінскага дзяржаўнага лінгвістычнага універсітэта, Гомельскага дзяржаўнага тэхнічнага ўніверсітэта імя П.В. Сухога, Магілёўскага дзяржаўнага ўніверсітэта харчавання.

— Сацыяльныя сеткі ствараюць прамую сувязь паміж студэнтамі, радавымі членамі прафсаюза, і прафсаюзнай арганізацыяй у асобе прафсаюзнага актыву, які займаецца падтрымкай групы. Вось чаму прафактывам важна ўмець аналізаваць развагі, выказванні студэнтаў і ўлічваць гэта ў сваёй працы, а таксама памятаць, што яркія, эмацыянальныя і масавыя фотаздымкі раскажуць пра мерапрыемства лепш за любы тэкст, — упэўнены Аляксандр Бойка.

Станоўчым пачынаннем — стварэннем студэнцкай інтэрнэт-газеты «Студэнты і прафсаюз — разам» адзначаны пачатак 2016 года. Размова ідзе пра інфармацыйны партал студэнцкіх прафсаюзных спраў. Старшыня ЦК папярэдзіў: «Не варта забываць, што сайт — вельмі каштоўная інфармацыйная пляцоўка. Гэта дзейсны механізм пазіцыянавання арганізацыі, яе афіцыйнае прадстаўніцтва, значны элемент у фарміраванні іміджу. Статычны, неактуальны сайт, які не абнаўляецца, не дапушчальны для маладзёжнай аўдыторыі і наогул для прафсаюзнай арганізацыі».

У Сту­дэнц­кай вёс­цы ўмо­вы пра­жы­ван­ня — па най­вы­шэй­шым раз­ра­дзе...

Дысконт як стымул

Старшыня пярвічнай прафсаюзнай арганізацыі студэнтаў Магілёўскага дзяржаўнага ўніверсітэта харчавання, член Савета Федэрацыі прафсаюзаў Віктар АЎДЗЮШКА таксама лічыць інфармацыйную працу найважнейшым напрамкам дзейнасці прафкама. У 2013 годзе ва ўніверсітэце пачаў функцыянаваць студэнцкі інфармацыйны прафцэнтр «ПРОФІ».

На сённяшні дзень яго дзейнасць уключае 3 асноўныя напрамкі работы, 2 інфармацыйныя інтэрнэт-парталы, больш за 100 відаў графічных работ і паліграфіі, больш за 25 відаў відэаматэрыялаў сацыяльнай, прафарыентацыйнай, рэкламнай і інфармацыйнай накіраванасці, два ўнутрыўніверсітэцкія СМІ «Вір падзей», «Профі» і г.д.

— Пры падтрымцы абласнога камітэта прафсаюза мы рэалізоўваем многія маладзёжныя праекты і студэнцкія ініцыятывы, — расказаў Віктар Аўдзюшка. — Адна з іх — гэта праграма сацыяльнай лаяльнасці «Залаты білет», дзякуючы якой уведзены льготы для студэнтаў горада і вобласці (членаў прафсаюза) у выглядзе сістэмы зніжак пры наведванні фізкультурна-аздараўленчых цэнтраў, культурна-забаўляльных устаноў. Падобная праграма рэалізуецца ў прафсаюзнай арганізацыі ўніверсітэта харчавання з 2013 года і прыносіць адчувальны вынік. У 2015 годзе на 27 працэнтаў павялічылася наведванне студэнцкай моладдзю фізкультурна-аздараўленчых устаноў, басейнаў і лядовых палацаў.

Падобная дысконтная праграма дзейнічае і ў БНТУ.

Члены прафсаюза — уладальнікі дысконтных картак — могуць карыстацца зніжкамі пры набыцці адзення, наведванні курсаў замежных моў, школы танцаў, стаматалагічных цэнтраў, студыі загару, пейнтбольнага клуба, клуба ёгі, пры падключэнні інтэрнэту і гэтак далей.

Выраб дысконтнай карткі ажыццяўляецца за кошт сродкаў партнёраў праграмы, таму студэнтам плаціць за картку не трэба. У гэтым навучальным годзе прафсаюзнай дысконтнай праграмай карыстаюцца ў БНТУ больш як 3 тысячы чалавек.

nіkalaeva@zvіazda.by

Фо­та Сяр­гея НІ­КА­НО­ВІ­ЧА

Дадаць каментар

Выбар рэдакцыі

Грамадства

Новыя будынкі без пандусаў заказчыкі будуць перарабляць за свае грошы

Новыя будынкі без пандусаў заказчыкі будуць перарабляць за свае грошы

За парушэнне нормаў безбар'ернага асяроддзя будуць прыцягваць да адказнасці.

Грамадства

Выданню «Белорусская военная газета. Во славу Родины» — 95 гадоў

Выданню «Белорусская военная газета. Во славу Родины» — 95 гадоў

Перыядычнае выданне «Белорусская военная газета. Во славу Родины» адсвяткавала свой юбілей.

Грамадства

"Тэатр выратоўвае маральна"

"Тэатр выратоўвае маральна"

Карэспандэнты «Звязды» пабывалі на рэпетыцыі тэатральнай студыі,  якая дзейнічае ў гомельскай папраўчай калоніі №4.

Грамадства

Карэспандэнты «Звязды» даведаліся, як людзі ўспрынялі новыя грошы

Карэспандэнты «Звязды» даведаліся, як людзі ўспрынялі новыя грошы

Прайшло ўжо тры тыдні, як краіна жыве з новымі грашыма. Як ідзе адаптацыя?