Вы тут

Юнацкая алімпійская дэлегацыя адправіцца ў нарвежскі Лілехамер


Менавіта гэты горад з 12 па 21 лютага будзе прымаць Другія зімовыя юнацкія Алімпійскія гульні. Сярод удзельнікаў больш за тысячу атлетаў ва ўзросце ад 15 да 18 гадоў, яны прадставяць 70 краін свету і будуць змагацца за ўзнагароды па 15 відах спорту.


Гульні ў Лілехамеры пройдуць на спартыўных аб'ектах, якія ў 1994-м прымалі «белую» Алімпіяду, дарэчы, менавіта гэты старт стаў першым для Беларусі, дзе наша краіна выступіла самастойнай камандай на зімовых Алімпійскіх гульнях. Тады беларускімі спартсменамі было заваявана два сярэбраныя медалі, іх уладальнікамі сталі біятланістка Святлана Парамыгіна і канькабежац Ігар Жалязоўскі. Невыпадкова, што менавіта Святлана напярэдадні сказала вельмі важныя словы на дарогу маладым беларускім алімпійцам. Вядомая спартсменка пажадала нашым хлопцам і дзяўчатам поспехаў і добрых выступленняў у Нарвегіі.

У Лілехамер адправяцца 16 беларускіх спартсменаў — 8 юнакоў і 8 дзяўчат, яны прымуць удзел у спаборніцтвах па 7 відах спорту (біятлон, гарналыжны спорт, лыжныя гонкі, хуткасны бег на каньках, снаўборд — слоуп-стайл, фігурнае катанне (танцы на лёдзе), хакей з шайбай (індывідуальнае майстэрства).

Талісманам беларускай спартыўнай дэлегацыі стане Агрык. Падчас урачыстай цырымоніі провадаў беларускай спартыўнай дэлегацыі ў Нарвегію намеснік старшыні праўлення Белаграпрамбанка Сяргей Чугай уручыў першаму віцэ-прэзідэнту НАК Максіму Рыжанкову сімвалічную мяккую цацку, якая будзе і ў кожнага беларускага спартсмена.

Акрамя спаборніцкай праграмы арганізатарамі Гульняў распрацаваны і шэраг інтэрактыўных мерапрыемстваў, падчас якіх спартсмены атрымаюць магчымасць даведацца пра алімпійскія каштоўнасці, вывучыць іншыя культуры і развіць навыкі, каб стаць сапраўднымі пасламі спорту. Бо галоўнай ідэяй падобных спаборніцтваў з'яўляецца атрыманне маладымі атлетамі ўнікальнага вопыту выступлення на міжнародных спаборніцтвах, а таксама магчымасць зносін са сваімі аднагодкамі. Важна, каб хлопцы і дзяўчаты прасякнуліся духам алімпійскай салідарнасці, дружбы і ўзаемнай павагі.

Нагадаем, на І зімовых юнацкіх Алімпійскіх гульнях у Інсбруку (Аўстрыя) Беларусь прадстаўлялі 16 атлетаў у 8 відах спорту. У неафіцыйным медальным заліку наша краіна заняла 24-е месца, заваяваўшы 2 медалі: 1 залаты і 1 сярэбраны. Фігурысты Яўгенія Ткачэнка і Юрый Гуліцкі занялі першае месца ў змяшанай камандзе, «серабро» заваяваў канькабежац Раман Дубовік.

lobazhevich@zviazda.by

Фота БЕЛТА

Загаловак у газеце: Там пачынаецца іх шлях да перамог

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».