У мастацкай галерэі “Дом карцін” праходзіць выстава аднаго з найстарэйшых беларускіх абстракцыяністаў Анатоля Кузняцова “Даліна фараонаў". Сэнсавы матыў, які аб'ядноўвае экспазіцыю, ― старажытны Егіпет. Аўтар пабываў у Даліне цароў, а ўражанні далікатна і тонка перанёс на палотны. Пераважны колер ― залаты. Гэта сімвал духоўнага пачатку і вечнасці, таямніц быцця і святых ісцін. Беларускі майстар нефігуратыўнага жывапісу дасягае гармоніі з дапамогай ўмелага спалучэння адценняў і геаметрычных формаў. Такое мастацтва патрабуе ўдумлівага прачытання. Анатоль Кузняцоў па-мастацку распавядае пра веліч адной з самых загадкавых старажытных цывілізацый, аб тых, хто стаяў ля вытокаў чалавечай мудрасці.
- Калі я толькі пачаў пісаць гэтыя карціны, яны былі быццам незавершанымі. Але потым зразумеў, што недастаткова адчуў каларыстыку старажытнага Егіпту. Я выкарытоўваў і охру, і бірузу, але маім палотнам не хапала выразнасці. Вырашыў дадаць золата - і зразумеў, што усё атрымалася, - кажа мастак.
Маляўнічы цыкл, прадстаўлены публіцы, быў створаны ў 2005-2006 гадах.
Анатоль Кузняцоў нарадзіўся ў Хабараўскім краю (Расія) ў 1947 г. Скончыў Беларускі тэатральна-мастацкі інстытут (зараз Акадэмія мастацтваў), аддзяленне станкавага жывапісу. Член Беларускага саюза мастакоў, удзельнік легендарнага творчага аб’яднання “Неміга-17”, Міжнароднага аб’яднання “Сонечны квадрат”.
У 2013 годзе быў узнагароджаны медалём Францыска Скарыны “За ўклад у развіццё і прымнажэнне духоўнага і інтэлектуальнага патэнцыялу, культурнай спадчыны беларускага народа”.
У 2015 годзе Анатоль Кузняцоў быў ўдастоены спецыяльнай Прэміі Прэзідэнта Рэспублікі Беларусь дзеячам культуры і мастацтва ― за шматгадовую творчую дзейнасць і стварэнне высокамастацкіх твораў.
На 19 лютага ў «Доме карцін» запланавана творчая сустрэча з мастаком, а сама выстава будзе доўжыцца да 14 сакавіка.
Фота Марыі ВОЙЦІК
Існуюць строгія патрабаванні да месцаў для купання.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.