26 Верасень, серада

Вы тут

Каб мы так жылі!..


Нездарма людзі кажуць: «Мой дом, мая — крэпасць». Не моцныя замкі на дзвярах перш за ўсё маюцца тут на ўвазе, а ўтульнасць, парадак і чысціня. Не толькі ў кватэрах, але і ў месцах агульнага карыстання.

Да нядаўняга часу жыхары дома 26а, што на вуліцы Гагарына ў Жодзіне, адчувалі сябе не вельмі камфортна. Уваходныя дзверы амаль разламаныя, у пад'езд мог свабодна зайсці чужы чалавек. У тым ліку асобы без пэўнага месца жыхарства. У выніку — размаляваныя, пашарпаныя сцены і кабіна ліфта, непрыемныя пахі...


Стар­шая па пад'­ез­дзе Ан­та­ні­на На­доль­ская.

— Усё, хопіць так жыць, — сказала старшая па пад'ездзе, жыхарка адной з кватэр Антаніна Надольская.

І ў літаральным сэнсе пайшла па кватэрах. Напачатку сабралі грошы на ўстаноўку дамафона і дзвюх відэакамер. У пад'ездзе стала ціха — жыльцы ўздыхнулі спакойна.

Але Антаніна Мікалаеўна, чалавек актыўны і нераўнадушны, на гэтым не спынілася:

— Давайце скінемся яшчэ і на рамонт пад'езда. Дому ж амаль 40 гадоў!

На той час кошт пытання быў — 600 тыс. рублёў з кожнай кватэры. Здавалася б, не такія ўжо і значныя выдаткі. Але ў пад'ездзе жывуць у тым ліку і людзі з невялікім дастаткам, шмат пенсіянераў.

Многія спасылаліся на тое, што кожны месяц плацяць за тэхнічнае абслугоўванне і капітальны рамонт: няхай, маўляў, камунальнікі і наводзяць парадак. Даводзілася кожнага, хто не згаджаўся, угаворваць, пераконваць.

— Няўжо вам не надакучыла жыць у брудзе, няўжо не хочацца прыгажосці, утульнасці? А хто ж іх створыць, як не мы самі? — зноў і зноў звярталася Антаніна Мікалаеўна да ўладальнікаў кватэр.

Як кажуць, і кропля камень точыць... Тым больш што і камунальнікі пайшлі насустрач жыльцам: уключылі суму ў жыроўку з растэрміноўкай плацяжу на 6 месяцаў.

Неабходныя матэрыялы і фарбу куплялі на свой выбар, па сваім гусце. Ну, а работнікі і спецыялісты жыллёва-камунальнай гаспадаркі па дамове займаліся рамонтам пад наглядам старшай па пад'ездзе. Пафарбавалі сцены, столь, паклалі плітку, замянілі электраправодку.

Але адна справа зрабіць рамонт, іншая — падтрымліваць штодзённы парадак і чысціню. «Ці не так?» — звяртаюся да Антаніны Мікалаеўны.

— Прыбіральшчыца прыходзіць не так часта — па графіку. Цяпер, відаць, адмовімся ад яе паслуг. Жыльцы і самі ў стане вымыць свае лесвічныя пляцоўкі. Гэта танней абыдзецца, — адказвае яна.

Сапраўды, пад'езд не толькі блішчыць чысцінёй. На кожным паверсе — карціны, жывыя кветкі.

— Сваю пляцоўку ўпрыгожваюць самі ўладальнікі кватэр, а іх на адным паверсе — 4. Збіраюцца разам і вырашаюць, што купіць у залежнасці ад магчымасцяў і густаў, — перахоплівае мой погляд Антаніна Надольская.

Тыя, хто не згаджаўся паўдзельнічаць у рамонце долевым спосабам, цяпер задаволены канчатковым вынікам.

— Супраць каманды яны бяссільныя, вымушаны падпарадкавацца агульнаму рашэнню, — лічыць мая суразмоўца. — У перспектыве плануем перарабіць ганак пры ўваходзе ў пад'езд, добраўпарадкаваць дваровую тэрыторыю, зрабіць дзіцячыя пляцоўкі, расшырыць дарогу, уладкаваць стаянку для транспарту, тратуарныя дарожкі.

— Зноў за ўласныя сродкі? — пацікавілася ў Антаніны Мікалаеўны.

— Пакуль думаем. Калі мэр горада і дырэктар ЖКГ часткова дапамогуць, то будзем ім вельмі ўдзячны.

— Ды і жыхары іншых пад'ездаў павінны далучыцца да ўладкавання тэрыторыі пры доме. Яна ж агульная для ўсіх, тут яны пакідаюць свае машыны, тут гуляюць іх дзеці... Спрабавала з імі гутарыць, але палова не пагаджаецца. Маўляў, дорага, — такі вынік папярэдняй работы. Але ўсё ж спадзяюся, што намечанае зробім.

Як тут не згадаць словы Маленькага прынца з аднайменнай аповесці французскага пісьменніка Антуана дэ Сент-Экзюперы: «Ёсць такое цвёрдае правіла. Устаў раніцой, памыўся, прывёў сябе ў парадак — і адразу ж прывядзі ў парадак сваю планету». Сапраўды, хто калі не мы самі, навядзе парадак у сваёй кватэры, доме, пад'ездзе, падворку, у сваім горадзе.

Іван ДРОЗД, дырэктар аб'яднання жыллёва-камунальнай гаспадаркі г. Жодзіна:

— У многіх жыхароў пакуль пераважае спажывецкі прынцып: нехта павінен адрамантаваць ім пад'езд, кватэру: мясцовыя ўлады, камунальнікі. Мы імкнёмся знайсці ўзаемаразуменне з кожным жыхаром, «пераламаць» свядомасць: за парадак там, дзе жывеш, павінен адказваць сам. І зрухі ёсць. У гэтым годзе адрамантавалі 117 пад'ездаў за кошт усіх крыніц фінансавання, у тым ліку і з долевым удзелам саміх жыхароў.

lazovskaya@zviazda.by

Фота Святланы НІКАЛАЕВАЙ

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Выхоўваць ці любіць? Шчырая размова з педагогам пра бацькоўскія страхі

Выхоўваць ці любіць? Шчырая размова з педагогам пра бацькоўскія страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.