Трэцяя сусветная нікому не патрэбна

Мінулы тыдзень для нашай краіны прайшоў пад знакам гадавіны пагадненняў па Украіне, якія дазволілі рэзка знізіць узровень супрацьстаяння ў суседняй краіне. Мінск стаў важнай пляцоўкай для прымірэння, а таксама для нараджэння надзей на лепшы лёс Украіны.

Нягледзячы на тое, што Мінскія пагадненні не ўдалося ўвасобіць у жыццё, замарозка канфлікту, якая адбылася год таму, дазволіла захаваць тысячы жыццяў. Унёсак Беларусі быў па заслугах ацэнены ўсімі. У выніку перад гадавінай перагавораў у Мінску адбыліся важныя сустрэчы з высокапастаўленымі прадстаўнікамі шэрагу краін, у прыватнасці з палітычным дырэктарам МЗС ФРГ Андрэасам Міхаэлісам, гендырэктарам па палітычных пытаннях Міністэрства замежных спраў і па справах Садружнасці Злучанага Каралеўства Вялікабрытаніі і Паўночнай Ірландыі Сайманам Гасам і Генеральным сакратаром знешнепалітычнага ведамства Аўстрыі Міхаэлем Лінхартам. Аўстрыя, акрамя перагавораў, афіцыйна адкрыла сваё пасольства ў Беларусі. На тыдні таксама прайшла міжнародная канферэнцыя "Мінскія пагадненні праз год: дасягненні, выклікі, урокі". У ёй узялі ўдзел эксперты з чатырох краін, якія вялі лёсавызначальныя перамовы ў Мінску ў лютым 2015 года.

Адной з самых важных падзей мінулага тыдня стала чарговая Мюнхенская канферэнцыя па пытаннях бяспекі, у рабоце якой традыцыйна прымаюць удзел палітыкі вышэйшага ўзроўню з усяго свету. Падчас яе міністр замежных спраў Беларусі Уладзімір Макей правёў некалькі сустрэч, у прыватнасці з міністрамі замежных спраў Германіі, Люксембурга, Нідэрландаў, Нарвегіі, а таксама з каардынатарам Федэральнага ўрада ФРГ па міжграмадскім супрацоўніцтве з Расіяй, краінамі Цэнтральнай Азіі і Усходняга партнёрства, спецыяльным упаўнаважаным па пытаннях старшынства Германіі ў АБСЕ ў 2016 годзе Гернатам Эрлерам, старшынёй Усходняга камітэта германскай эканомікі Вольфгангам Бюхеле, з Еўракамісарам па пытаннях пашырэння і еўрапейскай палітыкі суседства Ёханесам Ханам. Гэтыя сустрэчы важныя для развіцця адносін Беларусі з ЕС у новым фармаце. Сенсацыяй канферэнцыі стала афіцыйнае прызнанне прэм'ер-міністрам Расіі Дзмітрыем Мядзведзевым таго факта, што Расія і Захад "скаціліся ў часы новай халоднай вайны". Ён таксама перасцярог ад наступнай эскалацыі напружанасці: "Няўжо нам патрэбна трэцяе сусветнае ўзрушэнне?"

Мінулы тыдзень увойдзе ў гісторыю гістарычнай сустрэчай Патрыярха Маскоўскага і ўсяе  Русі Кірыла і Папы Рымскага Францыска, што адбылася ўпершыню за час адносін паміж Рускай праваслаўнай і Рымска-Каталіцкай цэрквамі. Па яе выніках была прынята сумесная дэкларацыя, з якой вынікае, што кіраўнікоў дзвюх Цэркваў аб'ядноўвае значна больш, чым раздзяляе. У дэкларацыі быў рашуча асуджаны тэрарызм, бакі канфлікту на Украіне былі закліканы да разважлівасці і дзейнай міратворчасці. Бакі выказалі гатоўнасць аб'яднаць намаганні, сумесна адказваючы на выклікі XXI стагоддзя. Адным з іх з'яўляецца праследаванне і знішчэнне хрысціян у многіх краінах Блізкага Усходу і Паўночнай Афрыкі. Іерархі таксама выказалі занепакоенасць і крызісам традыцыйнай сям'і, каштоўнасці якой дэвальвуюцца іншымі формамі сужыцця. Адной з ключавых формул сумеснага паслання можна назваць наступную: "Мы не сапернікі, а браты: з гэтага разумення мы павінны зыходзіць ва ўсіх нашых дзеяннях у дачыненні адно аднаго і да знешняга свету".

На сірыйскім кірунку назіраюцца сур'ёзныя змены. У правінцыі Алепа ідзе маштабнае наступленне сірыйскай арміі, да якога далучыліся члены ўмераных груповак і іранскія часці Корпуса вартавых ісламскай рэвалюцыі. У гэтым жа раёне адбыліся інцыдэнты з абстрэламі Турцыяй тэрыторыі Сірыі, як было заяўлена турэцкімі прадстаўнікамі, у адказ на дзеянні курдскіх атрадаў народнай самаабароны ў раёне пагранічнага з Турцыяй горада Аазаз. Між тым 11 лютага, на сустрэчы групы падтрымкі Сірыі ў Мюнхене было дасягнута пагадненне аб перамір'і. Як чакаецца, спыненне ваенных дзеянняў у краіне пачнецца на працягу тыдня пасля пацвярджэння сірыйскім урадам і апазіцыяй. Безумоўна, на шляху ўвасаблення пагаднення ў жыццё ёсць шмат падводных камянёў, але пры яго поспеху нарэшце з'явяцца магчымасці для паніжэння канфліктнага патэнцыялу варожых бакоў. 

Сяргей КІЗІМА.