26 Верасень, серада

Вы тут

Як развіваецца сацыяльная сфера горада атамшчыкаў?


На пытанні карэспандэнта «Звязды» адказвае старшыня Астравецкага райвыканкама, член Савета Рэспублікі Нацыянальнага сходу Беларусі Адам КАВАЛЬКА.


— Не паспеем азірнуцца, а першая чарга Беларускай АЭС будзе ўведзена ў эксплуатацыю. Ці не адстае ад вытворчай сацыяльная сфера ў Астраўцы, што ў гэтым кірунку зроблена і якія аб'екты з'явяцца ў перспектыве?

— Да 2020 года колькасць жыхароў ў горадзе павінна павялічыцца прыкладна ўтрая — да 25 тысяч чалавек. З улікам іх патрэбнасцяў і развіваем сацыяльную сферу. Летась сетка ўстаноў адукацыі папоўнілася гімназіяй і дзіцячым садам, зараз будуецца новы лячэбны корпус раённай бальніцы. За сродкі абласнога бюджэту нядаўна пабудавалі дом сямейнага тыпу, дзе справіла ўваходзіны шматдзетная сям'я. А ў супрацоўнікаў прадстаўніцтва Белдзяржстраха па Астравецкім раёне з'явіліся новыя службовыя памяшканні.

У планах на бягучы год — будаўніцтва ў гарадскім мікрараёне № 2 дзіцячага сада, а таксама фізкультурна-аздараўленчага комплексу з плавальным басейнам. Згодна з даручэннем кіраўніка дзяржавы, дадзеным падчас яго візіту ў Астравец, прапрацоўваем пытанне будаўніцтва ў горадзе стадыёна. Дарэчы, разлік не толькі на грошы Дзяржаўнай інвестыцыйнай праграмы. Напрыклад, на рамонт сярэдняй школы № 1 у райцэнтры плануем прыцягнуць сродкі Сусветнага банка развіцця.

— Зразумела, што прадпрыемства, установа не будуць паспяховымі без кампетэнтных спецыялістаў. Што робіцца, каб забяспечыць сацыяльную сферу належным кадравым патэнцыялам?

— Вельмі прыемна, што за апошнія тры гады на Астравеччыну прыбылі, каб распачаць свой працоўны шлях, 409 маладых спецыялістаў. У тым ліку летась — 202, сярод якіх 86 — менавіта ў сацыяльную сферу. Сёлета на працу ва ўстановы адукацыі, аховы здароўя, культуры і іншыя чакаем яшчэ 88 выпускнікоў вышэйшых і сярэдніх спецыяльных навучальных устаноў.

Хачу адзначыць, што мы шмат робім для замацавання маладых спецыялістаў на першым рабочым месцы. Напрыклад, тыя з іх, хто прыбыў у раён на работу па размеркаванні не па месцы жыхарства бацькоў, могуць, згодна з прэзідэнцкім Указам, атрымаць ільготны крэдыт на набыццё хатняй маёмасці і тавараў першай неабходнасці. Гэтым правам за апошнія тры гады скарысталіся 44 маладыя спецыялісты. Акрамя таго, у калектыўных дагаворах прадпрыемствы і арганізацыі прадугледжваюць меры матэрыяльнай падтрымкі моладзі — пры ўступленні ў шлюб, нараджэнні дзіцяці.

Але галоўнае для маладога спецыяліста — гэта дах над галавой. У гэтым пытанні ў нас ёсць свае напрацоўкі. Напрыклад, сёлета райвыканкам прыняў рашэнне перадаць былы будынак Белдзяржстраха на баланс раённай бальніцы. Зараз там завяршаюць рамонт з пераабсталяваннем пад інтэрнат, хтосьці ўжо нават засяліўся. Другі прыклад — у аграгарадку Варняны. На вольных плошчах у былым будынку вучэбна-вытворчага камбіната арганізавалі інтэрнат для работнікаў адукацыі, дзе могуць пражываць дванаццаць, а пры неабходнасці і больш маладых спецыялістаў.

І яшчэ. У канцы 2015-га як навагодні падарунак для ўсіх спецыялістаў сацыяльна-культурнага комплексу раёна падпісаны Указ № 524 Прэзідэнта Беларусі, які дае падставу для выдзялення жылля з фонду РУП «БелАЭС» педагогам, медыкам, спартсменам і работнікам культуры.

— Ці зацікаўлены інвестары ў будаўніцтве ў горадзе атамшчыкаў сацыяльных аб'ектаў?

— Лічу, што ў нашым раёне створаны спрыяльныя ўмовы для развіцця малога і сярэдняга бізнесу. І многія дзелавыя людзі гэтым ужо скарысталіся. Напрыклад, дзякуючы інвестыцыям турэцкай кампаніі ў Астраўцы будуюць гасцініцу. У міжнародным пагранічным пункце пропуску «Катлоўка» з'явілася аўтазаправачная станцыя, у планах — будаўніцтва стаянкі і станцыі тэхабслугоўвання аўтамабіляў, гатэля. Адкрытае акцыянернае таварыства «Гроднажылбуд» плануе пабудаваць дом з далейшым продажам у ім кватэр.

Варта адзначыць, што інвестараў найбольш цікавяць гандлёвыя аб'екты. Пры гэтым ад буйных сеткавых кампаній не адстаюць і нашы мясцовыя інвестары. Прыкладам можа служыць комплекс «Талер», дзе пяцёра астравецкіх прадпрымальнікаў на плошчы больш за 1000 квадратных метраў арганізавалі 15 гандлёвых аб'ектаў. Добра зразумеў выгады інвеставання ў Астраўцы і Ашмянскі мясакамбінат. Гэтае прадпрыемства ўжо прадстаўлена ў нас кавярняй і шэрагам крамаў як у старым горадзе, так і ў новых мікрараёнах.

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.