Вы тут

У суботу ў Магілёўскім аблвыканкаме працавала прамая тэлефонная лінія


Усяго задаць свае пытанні намесніку старшыні аблвыканкама Валерыю Малашку, які дзяжурыў на прамой тэлефоннай лініі, змаглі 22 жыхары вобласці.


Двойчы патэлефанавалі з Крычава жыльцы здадзенага ў мінулым лістападзе жылога дома. Людзям раздалі ключы, але пад'езды дагэтуль на замку. Падчас «прамой лініі» быў зроблены званок у Крычаў наконт сітуацыі. Складанасці выкліканы затрымкай з разлікамі за жыллё некаторых уласнікаў, але чаму павінны пакутаваць добрасумленныя грамадзяне? Валерый Малашка паабяцаў разабрацца з праблемай у кароткія тэрміны.

Трох чалавек хвалявалі цяжкасці з выплатай заробкаў. З мужчынам, які працуе ў Бялыніцкім раёне, дагэтуль не разлічыліся за снежань. «На фірме «Балекс», у якой сетка крам у Магілёве, затрымкі з аплатай бальнічных лісткоў і выплатай заробкаў», — паведаміла абураная такім становішчам спраў жанчына. А работніца гаспадаркі «Александрыйскае» Шклоўскага раёна заклапочана тым, што ёй заплацілі толькі 30% ад заробку. «Чым мне за камуналку разлічвацца?» — не стрымлівала эмоцый жанчына.

Алена Міхайлаўна з Магілёва паведаміла, што ад вёскі Стайкі Магілёўскага раёна да могілак дрэнная дарога. Калісьці там быў пакладзены асфальт, але цяпер утварылася столькі выбоін, што немагчыма ехаць. А яшчэ жанчына паскардзілася на тое, што ў пасёлку Колас Быхаўскага раёна жыхароў двухпавярховікаў пазбавілі магчымасці высаджваць каля дамоў градкі. З тым, што закон не быў парушаны, яна згодна, але ж справа ў іншым. «Людзі не супраць выкупіць зямлю, але замест таго, каб ім гэта прапанаваць, мясцовыя ўлады высеклі пладовыя дрэвы і ягадныя кусты, — папракала яна. — Трэба паважаць старых людзей, тым больш што сярод іх ёсць і такія, хто ўсё жыццё добрасумленна працаваў на карысць сельскай гаспадаркі».

Заяўнік з Асіповіцкага раёна быў занепакоены тым, што 3 месяцы таму здаў карову на Бабруйскі мясакамбінат, а грошы ўсё яшчэ не можа атрымаць. Валерый Малашка падкрэсліў, што такіх фактаў сёння быць не павінна, і неабходна прыняць неадкладныя меры.

Тры чалавекі прасілі дапамогу ў працаўладкаванні. Не атрымліваецца самастойна вырашыць гэтае пытанне былому індывідуальнаму прадпрымальніку з Магілёва і бабруйчаніну, у якога сур'ёзнае захворванне.
80-гадовая бабуля з Горак са слязамі хадайнічала за свайго ўнука. Калісьці мужчына скончыў Беларускую сельскагаспадарчую акадэмію, пэўны час працаваў па спецыяльнасці, а потым паехаў на заробкі ў Маскву. Цяпер хоча працаўладкавацца ў Горках, але нічога падыходзячага для яго няма.

А вось Аляксандр Васільевіч з Магілёва патэлефанаваў, каб аддзячыць за дапамогу з пошукам працы. Паведаміў, што ў Цэнтры занятасці працуюць сапраўды чулыя людзі.

Маладая маці з Магілёва паскардзілася на адсутнасць пешаходнага перахода і прыпынку для грамадскага транспарту па вуліцы Якубоўскага. Спецыяльная пляцоўка для аўтобусаў прадугледжана, але такое ўражанне, што пра гэтую транспартную «кішэнь» ужо забылі. Жанчына неаднойчы звярталася па гэтым пытанні, і адказы, што пакуль няма грошай на святлафор, яе не задавальняюць. «Бо гэта толькі абяцанні», — патлумачыла яна сваю пазіцыю.

А шматдзетны бацька, які жыве ў Магілёве па вуліцы Габраўскай, паведаміў, што ў іх доме стаяць індывідуальныя лічыльнікі на ацяпленне, але магчымасцю сэканоміць не ўдаецца скарыстацца, бо прыборы не працуюць... Яму нагадалі, што арганізацыя, якая абслугоўвае гэтыя прыборы, знаходзіцца ў Мінску, і для таго, каб яна зрабіла паверку і ўзяла на ўлік гэтыя прыборы, трэба будзе заплаціць. А потым яшчэ штомесяц уносіць аплату за карыстанне. Калі жыхары згодны на такія ўмовы, праблему можна будзе вырашыць.

Прагучалі таксама просьбы знесці аварыйнае дрэва ў вёсцы Чавускага раёна, растлумачыць умовы атрымання арэнднага жылля, добраўпарадкаваць прыпынак для грамадскага транспарту каля магілёўскай школы для дзяцей, хворых на скаліёз. Не абышлося без прапановы ўдасканаліць якасць абслугоўвання людзей у Год культуры. Неабыякавы жыхар Магілёва прасіў узяць на заметку, што санвузлы некаторых культурных устаноў вобласці могуць сапсаваць уражанне нават ад суперузорнага канцэрта.

Усе пытанні ўзяты на ўлік і пачалі вырашацца ўжо ў суботу. Кожнаму з заяўнікаў паведамяць пра вынікі зробленага.

zigulya@zviazda.by

Загаловак у газеце: Праца, заробкі і плата за камуналку

Выбар рэдакцыі

Культура

У нядзелю яўрэі святкуюць Новы год дрэў

У нядзелю яўрэі святкуюць Новы год дрэў

На гэта свята асаблівым чынам спажываюць розную садавіну, запіваючы келіхамі добра разбаўленага віна.

Грамадства

Як задаволіць кадравы голад у сферы ІТ?

Як задаволіць кадравы голад у сферы ІТ?

Работадаўцы кажуць, што быць добрым праграмістам і ўмець пісаць код для эфектыўнай работы ўжо недастаткова.

Культура

Балельшчыкі II Еўрапейскіх гульняў ужо рэзервуюць вясковыя гатэлі

Балельшчыкі II Еўрапейскіх гульняў ужо рэзервуюць вясковыя гатэлі

«Адышоў час, калі гасцям патрэбныя былі толькі «чарка і скварка», ім ужо цікавыя музеі, культурная праграма».