15 гадоў у Мар'інай Горцы працуе Пухавіцкая карцінная галерэя — як філіял мясцовага раённага музея. З апошніх творчых праектаў — выстаўка «Праз Беларусь праходзіў шлях паэта», прысвечаная жыццю і творчасці класіка ўкраінскай літаратуры Тараса Рыгоравіча Шаўчэнкі.
Невыпадковасць дадзенай выстаўкі грунтуецца на дзвюх адметнасцях повязі Вялікага Кабзара з Беларуссю і Міншчынай, Пухавіччынай, у прыватнасці. Тарас Шаўчэнка ехаў на вучобу ў Санкт-Пецярбург з Украіны праз Вільню. Толькі праз Беларусь туды па тым часе можна было даехаць ці дайсці. І другі знакавы фактар паяднанасці: творы Тараса Шаўчэнкі больш як стагоддзе перакладаюць на беларускую мову. Сярод пачынальнікаў такога пераўвасаблення — Янка Купала і Якуб Колас. Новыя пераклады паэзіі Тараса Шаўчэнкі зроблены Таццянай Сівец і ўвайшлі ў яе кнігу «Разняволенасць».
У інтэрв'ю раённай газеце «Пухавіцкія навіны» адзін з арганізатараў выстаўкі — прафесар Беларускай дзяржаўнай акадэміі мастацтваў Яўген Шунейка заўважыў: «Карціны не толькі і не столькі пра рэальны пераезд паэта. Праз Беларусь прайшла паэзія Шаўчэнкі. Яна ўскалыхнула і захапіла нашых літаратараў. Бо Шаўчэнка ўпершыню ў гісторыі славянскай паэзіі зрабіў героямі сваіх твораў простых людзей. Яго вершы вельмі ўразілі Якуба Коласа, які пайшоў тым жа шляхам. Пясняр пераклаў некаторыя вершы Шаўчэнкі на родную мову». Менавіта гэтаму прысвечана карціна Алеся Фаменкі «Якуб Колас — перакладчык «Кабзара». Дарэчы, добра вядома, што перакладам менавіта гэтай кнігі вершаў вялікага ўкраінца Колас займаўся на Пухавіччыне — у Вусці. А на выставе пра сувязь дзвюх культур расказвае яшчэ і карціна «Вытокі». Птушка-паэзія — яна адна. Але ў яе два крылы — беларускае і ўкраінскае».
Сярод аўтараў работ, якія прадстаўлены на выстаўцы, прысвечанай тэме «Тарас Шаўчэнка і Беларусь», — мастакі Уладзімір Сытчанка, Яўген Шунейка і Алесь Фаменка.
Нельга не заўважыць, што падобныя творчыя праекты спрыяюць развіццю мастацкага краязнаўства. Спасціжэнне культурных і мастацкіх з'яў праз увагу да рэгіёназнаўства дапамагае не проста вывучаць гісторыю краю, але яшчэ падтрымлівае выхаваўчыя памкненні ў культуры і асветніцтве. Пухавіччына, Мар'іна Горка і яе ваколіцы — прастора развіцця таленту мастакоў Генрыха Вейсенгофа, Аркадзя Астаповіча, Аляксандра Пашкевіча, Аркадзя Бржазоўскага. Дарэчы, яго імя і носіць Пухавіцкая карцінная галерэя.
Міхась ВУГАЛЕЦ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
Каментары