Вы тут

На Дні нараджэння Мінска можна будзе паслухаць Баяна


Так-так, вы не памыліліся: Дзень горада мы адзначалі паўгода таму, у верасні. Але ж у нашай сталіцы ёсць яшчэ адзін, летапісны дзень нараджэння. 949 гадоў таму, 3 сакавіка 1067 года, адбылася знакамітая бітва на Нямізе, у сувязі з якой гістарычны Менск упершыню згадваецца ў пісьмовых крыніцах. У той бітве сышліся войскі Яраславічаў — Ізяслава Кіеўскага, Святаслава Чарнігаўскага і Усевалада Пераяслаўскага — і войска Усяслава Полацкага, якое было разбіта, а сам князь неўзабаве трапіў у вязніцу. Падзеі тых часоў схаваны глыбока пад зямлёй, авеяны легендамі, ахутаны вэлюмам таямніц. Шмат сплыло вады, не шумяць хвалі Нямігі, не рыпяць вароты мінскай брамы, а спрэчкі аб мінулым дагэтуль не сціхаюць. Дзе знаходзіўся старажытны Менск? Адкуль яго імя? Якія берагі амывала Няміга?


Пашукаць адказы на гэтыя і іншыя пытанні прапануе Музей гісторыі горада Мінска. Трэцяга сакавіка з 18 гадзін у Мінскай ратушы мінчан і гасцей сталіцы чакае сапраўдная містэрыя. Распачне прадстаўленне гусляр — ён будзе ўвасабляць таго самага Баяна, што згадваецца ў «Слове пра паход Ігаравы». Прагучыць і фрагмент «Слова» ў перакладзе Янкі Купалы.

Падрабязней даведацца пра старажытную бітву на Нямізе дапамогуць выступленне знакамітага даследчыка, гісторыка і археолага Сяргея Тарасава і паказ дакументальных здымкаў з раскопак 1984 года. Але няхай вас не палохае перспектыва трапіць на сумную лекцыю: па-першае, сумным выступленне дакладна не будзе, а па-другое, яго зменіць інтэрактыў. Ахвотных праверыць свае веды ў старажытнай гісторыі Мінска чакае музейная гульня з цікавымі падарункамі: гульцы, адпаведна тэматыцы, будуць змагацца ў войску Усяслава Чарадзея і братоў Яраславічаў. Супрацоўнікі музея абяцаюць, што лідары гульні змогуць патрымаць у руках сапраўдныя артэфакты.

Адчуць усё хараство нашай сталіцы дапаможа выступленне мастацтвазнаўцы Сяргея Харэўскага — аднаго з найбуйнейшых знаўцаў гарадской архітэктуры. Свае погляды на Мінск прадставяць таксама пісьменнік і журналіст Міхаіл Валодзін (аўтар захапляльнай кнігі «Мінскія гісторыйкі»), краязнавец Вадзім Зелянкоў, экскурсавод Цімафей Акудовіч (арганізатар ужо шмат гадоў любімага мінчанамі і не толькі «Фэсту экскурсаводаў»), журналіст Васіль Сямашка, які нядаўна спусціўся ў калектар і паглядзеў, як цяпер выглядае легендарная рака Няміга.

І яшчэ адзін прыемны момант: уваход на Дзень нараджэння летапіснага Мінска — вольны, адзінае — ахвотным трэба будзе загадзя ўзяць бясплатныя запрашэнні. Атрымаць іх можна ў Мастацкай галерэі Міхаіла Савіцкага па адрасе: пл. Свабоды, 15 з серады па нядзелю з 11.00 да 19.00 (да 3 сакавіка ўключна, але майце на ўвазе: колькасць білетаў абмежаваная).

— Гэта мерапрыемства распачне цыкл «Ад Менска да Мінска: каляндар падзей», — расказвае старшы навуковы супрацоўнік музея Марыя КАРАЛЁВА. — Шэраг яго імпрэзаў будзе праходзіць цягам года. Яны будуць прысвечаны гістарычным падзеям Мінска, пра якія мала хто згадвае. Наступнае мерапрыемства адбудзецца 19 сакавіка, яно будзе прысвечана наданню Мінску Магдэбургскага права. У нас будзе інтэрактыўная праграма з чытаннем Права. З гледачоў выберам войта, гараджаніна, бургамістра, рамесніка, сфармуем з іх магістрат. Будзе цікава!

seradzyuk@zvіazda.by

Загаловак у газеце: Горад, што паўстаў з бітвы

Выбар рэдакцыі

Грамадства

Кампазiтар Алег Елiсеенкаў: У нас з жонкай усё агульнае — i радасцi, i нягоды, i грошы

Кампазiтар Алег Елiсеенкаў: У нас з жонкай усё агульнае — i радасцi, i нягоды, i грошы

Са сваёй жонкай аўтар папулярных песень знаёмы амаль паўстагоддзя.

Грамадства

Збiраемся ў школу. У жнiўнi адна з галоўных задач мам i татаў — «экiпiроўка» дзяцей да 1 верасня

Збiраемся ў школу. У жнiўнi адна з галоўных задач мам i татаў — «экiпiроўка» дзяцей да 1 верасня

Першае i галоўнае правiла — яшчэ дома вызначыцеся з тым, што вам трэба. 

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.