Калі дзіця картавіць, шапялявіць, не прамаўляе «р», «д», «л» і іншыя паднябенныя гукі, калі яму цяжка высунуць язык, а пры адкрытым роце немагчыма дацягнуцца кончыкам языка да верхніх разцоў, у яго можа быць кароткая вуздэчка языка. Праблемы маўлення могуць быць звязаны і з іншымі прычынамі, але і такая анамалія не рэдкасць.
Вуздэчкі ротавай поласці (гэта такія тонкія складкі слізістай абалонкі, якія дадаткова прымацоўваюць язык і губы да ротавай поласці) часам могуць перашкаджаць правільнаму развіццю органаў ротавай поласці. Анамалія іх будовы патрабуе назірання і своечасовага лячэння. Звычайна праблему выяўляюць неанатолагі, педыятры, лагапеды, атарыналарынголагі, стаматолагі і артадонты.
Звязана гэта можа быць як са спадчыннасцю, так і з неспрыяльным вонкавым уздзеяннем на плод (таксікоз, вірусная хвароба, уздзеянне лекаў, нейкіх шкодных рэчываў, нават маміны эмацыянальныя перагрузкі).
Існуе шэраг прыкмет, па якіх можна здагадацца, што з вуздэчкамі нешта не тое. А саміх матуль павінны насцярожыць праблемы падчас груднога кармлення — дзіця проста не можа смактаць. Гэта прыводзіць спачатку да адставання ў росце і вазе, а пазней і да праблем з маўленнем, «выпадзеннем» і скажэннем гукаў. Тут і няправільны прыкус, і запаленне і кроватачывасць дзяснаў, і павышаная адчувальнасць эмалі зубоў, а яшчэ можа быць храпенне і апноэ (кароткачасовае спыненне дыхання ў сне). Больш за тое, нерэалізаваны інстынкт смактання прыводзіць да розных відаў неўрозаў, назойлівых станаў, якія могуць захоўвацца ў чалавека ўсё жыццё.
«Існуюць два спосабы лячэння паталогіі — расцягванне звязкі з дапамогай спецыяльнай гімнастыкі і аператыўнае ўмяшанне, — расказвае ўрач-стаматолаг-артадонт 3-й гарадской дзіцячай клінічнай паліклінікі г. Мінска Віктар САСНОЎСКІ. — Калі вуздэчка не дазваляе праводзіць грудное кармленне, яна можа быць падрэзаная яшчэ ў радзільні. Працэдура вельмі простая, ажыццяўляецца без болю і мясцовай анестэзіі, бо вуздэчка не мае нервовых канчаткаў. Пасля 9 месяцаў вуздэчка патаўшчаецца і падчас аперацыі патрабуецца ўжо мясцовы наркоз і накладанне швоў. Калі і гэты момант упушчаны, наступным спрыяльным часам будзе ўзрост 2-2,5 гады, а затым — 5».
Калі вуздэчка надта кароткая, праводзіцца не проста яе падразанне, а паўнацэнная аперацыя — пластыка. Выконваецца такое ўмяшанне ў дашкольным або раннім школьным узросце. Пасля пластыкі неабходна займацца з лагапедам для фарміравання правільных маўленчых навыкаў.
Святлана ПРОТАС
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.