Вы тут

Вітаем «Чаяна» з далёкага Татарстана!


Ганаровае месца ў кагорце вожыкаўскіх сяброў і пабрацімаў займае часопіс «Чаян» («Скарпіён»). А прадставіць яго вам галоўны рэдактар выдання Рафаэль Халілулаў:


— Неяк у Казані абвясцілі конкурс на лепшую ідэю помніка і назву для новай вуліцы. Адзін вясёлы грамадзянін прапанаваў паставіць у сталіцы манумент «Чаяну» і назваць у яго гонар вуліцу. «Гэты часопіс — сапраўдны брэнд нашай рэспублікі, нароўні з Татнафтай, КамАЗам і «Рубінам», — пісаў ён. — Мару, каб на стале кожнага татарстанца былі чай, чак-чак і «Чаян»!» На жаль, крэатыўная ідэя не знайшла падтрымкі ў чыноўнікаў. А шкада!

Тым не менш, «Чаян» — сапраўдная легенда, жывая гісторыя, выданне, вядомае кожнаму жыхару рэспублікі. «Вы ствараеце патрэбны народу часопіс. Чытаем «Чаян» усім мястэчкам ад першай старонкі да апошняй», — напісаў у рэдакцыю жыхар Вялікіх Кайбіц Радзік Гірфанаў. «Чытаю «Чаян» і маю ад гэтага карысць несумненную», — прызнаваўся першы Прэзідэнт Татарстана Мінтымер Шайміеў. Ці гэта не ўсенароднае прызнанне!

Калі сур’ёзна, то «Чаян» — адно з найстарэйшых выданняў не толькі рэспублікі, але і краіны. Адзіны ў свеце гумарыстычны часопіс на татарскай мове выходзіць з 1923 года. У сваёй творчасці чаяністы абапіраюцца на багатыя традыцыі народнага гумару, дэмакратычнай і сатырычнай журналістыкі, закладзеныя яшчэ вялікім татарскім паэтам Габдулой Тукаем.

За дзевяць дзесяцігоддзяў «Чаян» адлюстраваў усе павароты нашай непрадказальнай гісторыі. Якіх толькі персанажаў ні сустрэнеш у нумарах мінулых гадоў! У розны час у клюшні «Чаяна» траплялі буржуі і кулакі, стылягі і самагоншчыкі, фарцоўшчыкі і бюракраты. Пры ўсёй ідэалагізаванасці (а часопіс доўгія гады быў органам Татарскага абкама КПСС) «скарпіёнавыя браты» заўсёды прытрымліваліся галоўнага прынцыпу смеючыся з недасканаласці чалавека, выкрываючы заганы грамадства, паляпшаць норавы, даваць чытачу надзею на дабро і справядлівасць. І сёння невялікі калектыў часопіса і яго шматлікія аўтары сваёй гумарыстычнай працай пацвярджаюць гэта.

 

Дзмітрый ФІЛІПАЎ

 

Кніжнік

 

У апошні час я паэзію палюбіў. Вось, напрыклад, вершы Аляксандра Сяргеевіча Лермантава. «Я достаю из широких штанин...» Якая сіла слова! Дэкламую ў дзве гадзіны ночы, а сусед па сценцы грукае, відаць, апладзіруе.

Ці Пушкін Міхаіл Юр’евіч. Як толькі прамоўлю: «Ты жива еще, моя старушка...», адразу ўсе бабулі на лавачцы галасіць пачынаюць і слёзы хусцінкамі выціраюць... Чароўная сіла мастацтва!

Я і сам да прыгожага неабыякавы. Хоць і працую дворнікам. Разгроб гурбу снегу — тут жа верш прачытаў. Пакалоў лёд — яшчэ адзін узгадаў.... Пасыпаў пясочку і адгарнуў томік Пушкіна, Лермантава або Льва Мікалаевіча Ясеніна.

Кніг жа шмат ля кантэйнераў для смецця валяецца. Як народ інтэрнэт займеў, так і пачаў ад іх пазбаўляцца, хоць у ранейшыя гады па блаце даставаў. У мяне ў капцёрцы цэлая бібліятэка набралася. Вось я і гляджу, што яны панапісвалі... Як быццам ведалі, што гэта ўсё да мяне прыйдзе…

 

 

Зуфар ЗАРЫПАЎ

 

На пляжы

 

Пляж мясцовы — не Карыбы,

І ўсё ж лепей тут, чым дзе:

Няма столькі ў рэчцы рыбы,

Колькі на пяску людзей.

Гэты лёг на санцапёку,

Той хаваецца ў цяньку.

Сеў і я непадалёку,

На купальшчыкаў гляджу.

За буйкі не заплывае

Муж вучоны, кандыдат.

Кажуць, і ў навуцы мае

Нешырокі далягляд.

Граззю Сабірзян кідае

Ў тых, каго лягчэй дастаць.

І на сходзе гэтак, знаю,

Ён прывык крытыкаваць.

Тахір скокнуў без страховак —

Вынырнуў хвілін праз пяць.

Ў апараце ён гандлёвым

Навучыўся так «ныраць».

Глей на дне знайшоў Мяфодзій

І давай яго мясіць:

Жыць з людзьмі не ўмее ў зго дзе,

Ваду любіць замуціць.

Захлынуўся, як купаўся,

Ў рэчцы балбатун-Салім:

Рот закрыць не здагадаўся,

Мелі клопату мы з ім.

У ваду Парфір не скача,

А здзяйсняе мацыён.

Рэпутацыю, няйначай,

Падмачыць баіцца ён.

Вось такі надзейны спосаб

Чалавека «раскусіць»:

Днём спякотным трэба проста

Разам з ім на пляж схадзіць!

 

 

Рафіс ГІЗАТУЛІН

 

Крыжаванка

 

У кабінет дырэктара ўвайшоў вусаты хлопец. Ханан Ханавіч на імгненне падняў галаву і зноў стаў нешта пісаць.

— Добры дзень, — сказаў наведвальнік. — Я чуў, што вам шафёр патрэбен...

— Пачакай, — адказаў Ханан Ханавіч. — Зараз... Та-ак... Віно, пяць літар. «Партвейн»? Не, тут восем...

Хлопец ажывіўся:

— Можа, «Агдам»?

— А-г-д-а-м... Глядзі ты, правільна, — згадзіўся дырэктар.

— А на літару «эр» віно не ведаеш? Сем літар...

— «Рыслінг»?

— Падыходзіць! А з дзевяці літар не падкажаш? Таксама сухое. Апошняя — «і».

— Ну, тут і думаць няма чаго: «Ркацытэлі».

Хлопец зазірнуў у крыжаванку праз плячо дырэктара і стаў вадзіць пальцам па клетках.

— Трэцяе па гарызанталі — «Вермут», сёмае па вертыкалі

— «Хванчкара»... Восьмае — «Санцадар»...

— Малайчына, — сказаў Ханан Ханавіч. — Можаш ісці.

— Куды? — не зразумеў хлопец. — Я чуў, вы шафёра шукалі...

— Шукаў, — уздыхнуў дырэктар. Ды разумееш, мне такі шафёр патрэбен, каб гэтую крыжаванку разгадаць не мог...

 

 

Людміла УЛАНАВА

 

Прадчуванні

 

Так жыць на свеце цяжка мне, сябры,

Чакаю я з усіх бакоў падману.

Як добра зранку — гэта да пары:

Увечары напэўна дрэнна стане.

Не адключылі ні святло, ні газ,

Надвор’е — проста супер! Што за здзекі?

А, ведаю! Буран ідзе на нас!

Паветра нават пахне небяспекай.

Калега кампліментаў цэлы воз

Мне выдаў, а за вочы, пэўна, лае.

Зарплату сёння павялічыў бос,

Відаць, кагось пры гэтым скарачае.

Ў аўтобусе ўсміхнуўся кантралёр,

Народу мала і білецік шчасны.

Не парушае ПДР шафёр…

Дзе ўсё-ткі гадасць? Дзе яна захрасла?

Майму прыходу радая сям’я,

Не падгарэлі смачныя катлеты.

І гэта ўсё, дакладна знаю я,

Якіхсьці непрыемнасцей прыкметы.

Відаць, чакае нас благое штось…

Я сплю. Пад’ём на працу будзе ранні.

Паганы сон мне сніцца. Вось жа! Вось!

Ізноў не падманулі прадчуванні.

 

Пераклады з рускай Веранікі МАНДЗІК.

 

«Вожык» №3, 2016 год.

Дадаць каментар

Выбар рэдакцыі

Палітыка

Прэзідэнт паўдзельнічаў у выбарах і адказаў на пытанні журналістаў

Прэзідэнт паўдзельнічаў у выбарах і адказаў на пытанні журналістаў

За каго аддаць свой голас, якога кандыдата лепей абраць у дзень выбараў у мясцовыя Саветы дэпутатаў? 

Калейдаскоп

Як прайшоў фінал нацыянальнага адбору на «Еўрабачанне»

Як прайшоў фінал нацыянальнага адбору на «Еўрабачанне»

Беларусь на конкурсе прадставіць украінец ALEKSEEV.

Культура

«Бум культурных стартапаў стане новым вітком эканомікі»

«Бум культурных стартапаў стане новым вітком эканомікі»

Некалькі месяцаў таму адна з найпапулярнейшых сталічных вуліц Кастрычніцкая ўзбагацілася на яшчэ адно «тусовачнае» месца — «Ок16».

Калейдаскоп

Вясёлыя гісторыі чытачоў

Вясёлыя гісторыі чытачоў

Праславіў Някрасаў рускую жанчыну, на вякі праславіў!