26 Верасень, серада

Вы тут

У Мінску расце канкурэнцыя за працоўныя месцы


Сёлета ў эканоміцы горада склаўся адмоўны баланс руху кадраў, і прыём новых работнікаў не замяшчаў колькасць звольненых. І хоць лік вакансій скарачаецца, актыўна прымаюцца меры па дапамозе грамадзянам падчас уладкавання на працу, паведаміла намеснік старшыні камітэта па працы, занятасці і сацыяльнай абароне — начальнік упраўлення занятасці насельніцтва Мінгарвыканкама Таццяна КУДЗЕВІЧ.


Замест рабочых — менеджары

Апошнім часам знізіліся попыт на кадры і забяспечанасць працоўнымі месцамі. Пры гэтым высокімі тэмпамі скарачаецца колькасць работнікаў будаўнічай і прамысловай сфер. Увогуле ж узровень занятасці насельніцтва ў Мінску складае 77%.

Між тым колькасць вакансій у сталіцы таксама скарачаецца, а колькасць людзей, якія звяртаюцца ў службу занятасці, павялічваецца. Колькасць беспрацоўных сёння ў Мінску ўжо каля 8 тысяч чалавек. Узровень зарэгістраванага беспрацоўя на 1 сакавіка складаў 0,7% да колькасці эканамічна актыўнага насельніцтва і быў самым нізкім у краіне.

— Калі ў ранейшыя часы мы казалі пра недахоп кадраў, попыт на працоўную сілу з боку эканомікі быў каля 20—24 тысяч, то цяпер колькасць заяўленых наймальнікамі вакансій складае каля шасці тысяч, — адзначыла Таццяна Кудзевіч.

Змянілася і структура попыту на працоўную сілу. Калі раней у гарадской службе занятасці каля 70% вакансій складалі рабочыя прафесіі, то цяпер яны складаюць да 40%. Найбольшае зніжэнне колькасці вакансій — у сферах транспарту, сувязі, будаўніцтва, камунальных паслуг. Таццяна Кудзевіч паведаміла, што горад мае патрэбу ў менеджарах і кіраўніках сярэдняга звяна. Увогуле ж пералік запатрабаваных прафесій размешчаны на сайце камітэта па працы, занятасці і сацыяльнай абароне Мінгарвыканкама. Што да аплаты па вакансіях, то яе сярэдні ўзровень не перавышае 5 млн рублёў.

Што прапануе дзяржава

Тыповы сталічны беспрацоўны — мужчына 40 гадоў, паведаміла Таццяна Кудзевіч. Па яе словах, служба занятасці з пачатку года дапамагла 2,6 тысячы беспрацоўных мінчан. З іх на пастаянную работу ўладкаваны 1,6 тысячы чалавек. На перыяд пошуку працы прапаноўваліся і аплатныя грамадскія работы — больш за 800 чалавек прынялі ў іх удзел. У сярэднім узровень аплаты ў дзень на такіх працах складаў 120-130 тысяч рублёў.

Яшчэ каля 400 беспрацоўных накіраваны на навучанне, 28 чалавек атрымалі субсідыі на арганізацыю прадпрымальніцкай дзейнасці. Гэта аднаразовая дзяржаўная грашовая дапамога ў памеры да 11-разовай велічыні бюджэту пражытковага мінімуму. Сёлета яна складае 17,5 млн рублёў. У гэтым годзе плануецца прадаставіць субсідыі 180 беспрацоўным (летась фінансавую падтрымку на арганізацыю прадпрымальніцкай дзейнасці атрымалі 150 беспрацоўных мінчан). З пачатку года такім правам ужо скарысталіся 28 беспрацоўных. Яны адкрылі ўласную справу ў запатрабаваных на рынку працы сферах дзейнасці (аддзелачныя і будаўнічыя работы, транспарт, гандаль, цырульніцкія паслугі).

— Каб беспрацоўныя ацанілі свае магчымасці і павысілі фінансавую асвету, мы накіроўваем іх на навучальныя курсы па прадпрымальніцтве. Не ўсе пасля іх праходжання адкрываюць уласную справу. На курсах беспрацоўныя складаюць тэхніка-эканамічнае абгрунтаванне — бізнес-план, у якім улічваюць свае магчымасці. Ацэньваюць мэтазгоднасць і рызыкі па адкрыцці ўласнай справы. Беспрацоўныя, якія адкрываюць уласную справу, ідуць на гэты крок свядома, — падкрэсліла намеснік старшыні камітэта.

Сёлета камітэт па працы, занятасці і сацыяльнай абароне амаль удвая павялічыў аб'ёмы фінансавання на рэалізацыю праграм садзейнічання занятасці. Сярод прыярытэтных кірункаў для камітэта на гэты год — працаўладкаванне грамадзян на створаныя прадпрыемствамі працоўныя месцы, садзейнічанне беспрацоўным у прадпрымальніцкай і рамесніцкай дзейнасці, навучанне па запатрабаваных прафесіях, а таксама стымуляванне наймальнікаў у прыёме на працу сацыяльна ўразлівых груп насельніцтва (моладзі, інвалідаў, вызваленых з месцаў пазбаўлення волі).

— Мы не супраць забяспечыць 100-працэнтную занятасць. Для гэтага павінны быць пэўныя ўмовы. Але і людзі мусяць быць матываванымі на працу і валодаць неабходнымі кампетэнцыямі, — рэзюмавала спецыяліст.

seradzyuk@zvіazda.by

Загаловак у газеце: Час не спаць у шапку

Дадаць каментар

Выбар рэдакцыі

Палітыка

Уладзімір Андрэйчанка расказаў пра найбольш значныя законапраекты

Уладзімір Андрэйчанка расказаў пра найбольш значныя законапраекты

 «Толькі агульнымі намаганнямі мы зможам супрацьстаяць няпростым выклікам часу».

Грамадства

Як у Беларусі абясшкоджваюць боепрыпасы

Як у Беларусі абясшкоджваюць боепрыпасы

​Колішняя Беларуская ваенная акруга лічылася адной з самых магутных у СССР.

Грамадства

Шчырая размова з вядомым педагогам пра бацькоўскія сумненні і страхі

Шчырая размова з вядомым педагогам пра бацькоўскія сумненні і страхі

«Калі ў вас адкрыўся рот, каб накрычаць на дзіця, спыніцеся хоць на секунду…» 

Грамадства

Чым здзівіў сёлета «Кліч Палесся»

Чым здзівіў сёлета «Кліч Палесся»

Этнафэст стаў вядомым далёка за межамі Беларусі.