20 студзеня, субота

Вы тут

Ці можна на размеркаванні пачуць кожнага выпускніка?


У той час, як студэнты выпускных курсаў многіх беларускіх ВНУ працягваюць ліхаманкава шукаць арганізацыю, якая пагадзілася б узяць да сябе на працу маладога спецыяліста (а сёлета гэтая задача ўскладнілася), выпускнікоў педагагічных спецыяльнасцяў разбіраюць на рынку працы, як гарачыя піражкі ў базарны дзень. Больш за тое, за імі нават выстройваюцца ў чэргі працадаўцы... Журналіст «Звязды» наведаў Беларускі дзяржаўны педагагічны ўніверсітэт імя Максіма Танка, каб пераканацца ў гэтым на ўласныя вочы.


Ваш тавар — наш купец

На парадку дня — размеркаванне выпускнікоў двух факультэтаў: прыродазнаўства і філалагічнага. У папярэднія гады гуманітарыям, якія жадалі застацца працаваць у Мінску, але вакантнага месца па атрыманай спецыяльнасці не было, прапаноўвалі працу на іншых педагагічных пасадах. Чакаем паўтарэння гэтага сцэнарыя, тым больш што ў горадзе кадравая праблема ў дашкольных установах зусім не страціла сваёй актуальнасці. Але ўжо ў першыя хвіліны даводзіцца пераканацца, што... памыляемся.

Сярод «купцоў», якія прысутнічаюць на размеркаванні, два дырэктары школ. Прычым абодва прыйшлі сюды з надзеяй атрымаць у сваю навучальную ўстанову менавіта філолага.

— Я ведаю, што да красавіка звычайна ўжо на ўсіх выпускнікоў ёсць заяўкі, але раптам мне пашанцуе, — усміхаецца дырэктар Зеленаборскага вучэбна-педагагічнага комплексу дзіцячы сад — сярэдняя школа, што ў Смалявіцкім раёне, Таіса Анатолеўна Калбасенка, — тым больш што і я не з пустымі рукамі. Магу забяспечыць маладога спецыяліста жыллём. У нас для настаўнікаў ёсць свабодная двухпакаёвая арэндная кватэра за сімвалічную плату. Можна ўзяць адразу двух педагогаў, і ў кожнага з іх будзе свой асобны пакой. У Зеленаборскай школе працуе шмат былых вучняў. І я — выпускніца школы, якую цяпер узначальваю, і мой намеснік... У нас цудоўны калектыў.

Віктар Францішкавіч Савіцкі, дырэктар Азярцоўскай сярэдняй школы з Мінскага раёна, таксама спадзяецца знайсці для сваёй навучальнай установы настаўніка рускай мовы і літаратуры. Да Мінска — рукой падаць. А жыллёвыя праблемы педагогаў абяцаюць вырашыць...

Без сюрпрызаў

Але першымі размяркоўваюцца будучыя настаўнікі хіміі, біялогіі і геаграфіі... Праўда, большасць з іх ужо мае педагагічны досвед і яшчэ падчас вучобы сталі ў школе выкладаць. Таму многія прынеслі персанальныя заяўкі са сталічных школ, дзе іх ужо цудоўна ведаюць.

— Надзея Кашуба працуе ў 212-й сталічнай школе, адтуль ёсць запыт. Прапануем размеркаваць яе па месцы працы, — просіць дэкан факультэта.

— Гэта прэтэндэнт на першую катэгорыю, наша «зорачка», — канстатуе прадстаўнік сталічнага Камітэта па адукацыі.

Высвятляецца, што дзяўчына зусім нядаўна выступала ў фінале гарадскога конкурсу прафесійнага майстэрства «Сталічны настаўнік — сталічнай адукацыі 2016» у намінацыі «Педагагічны дэбют», дзе стала ўладальніцай дыплома першай ступені. Канешне, заяўку школы задавальняюць...

Камісія зачытвае прозвішчы выпускнікоў і месцы, што прапануюцца для працаўладкавання. Адразу становіцца зразумелым, што для маладых людзей размеркаванне не з'яўляецца непрыемным сюрпрызам. Мінчане застаюцца ў Мінску — для ўсіх у сталічных школах знаходзяцца месцы. Студэнтка платнай формы навучання (мінчанка) таксама пажадала размеркавацца і атрымаць статус маладога спецыяліста. Ёй прапанавалі планавае месца ў Партызанскім раёне сталіцы.

А вось іншагароднія выпускнікі, як правіла, вяртаюцца на радзіму, бліжэй да бацькоўскага дому. За Мінск ніхто не трымаецца... Выпускніца з Брагінскага раёна едзе дамоў.

— Там настаўнікі вельмі патрэбныя! — падтрымліваюць усе яе выбар.

Яшчэ адна цікавая тэндэнцыя — многія студэнты свядома змяняюць свой рэгіён пражывання на іншы.

Так, выпускніца родам са Шчучына выбрала Валожынскі раён.

— Правільна, пакуль маладая, трэба вывучаць геаграфію краіны, — падбадзёрвае першы прарэктар БДПУ Святлана КОПЦЕВА.

Дзяўчына з Докшыц пажадала працаваць у Вілейскім раёне, выпускніца з Баранавічаў едзе працаваць у Дзяржынскі раён, а хлопец з Оршы — у Нацыянальны дзіцячы адукацыйна-аздараўленчы цэнтр «Зубраня».

Гамяльчанка выбірае Мінскі раён.

— Вы ведаеце, што жыллё давядзецца самастойна арандаваць? — цікавяцца ў яе члены камісіі па размеркаванні.

— Так!

— Калі вас усё задавальняе, то і мы не супраць.

Будучы муж — яшчэ не аргумент

А вось жаданне яшчэ адной выпускніцы быць размеркаванай у Ліду не выклікае аптымізму ў прадстаўнікоў сістэмы адукацыі Мінскай вобласці, якія прысутнічаюць на размеркаванні.

— А чаму менавіта ў Ліду?

— Будучы муж адтуль.

— Такога паняцця, як «будучы муж», Палажэнне аб размеркаванні не ўтрымлівае...

— У дзяўчыны вельмі высокі сярэдні бал 8,79. І навукай яна займалася, у навуковых канферэнцыях удзельнічала. У яе ёсць права выбару. Кіраўнік дзяржавы — таксама за сям'ю. Дык не будзем ствараць для яе перашкоды, — заступаюцца за сваю студэнтку прадстаўнікі факультэта.

— Мінскай вобласці такія выпускнікі таксама патрабуюцца, — з жалем канстатуюць заказчыкі са сталічнага рэгіёна, разумеючы, што ўсё ж такі давядзецца саступіць...

А вось іншай студэнтцы з Мінскай вобласці, якая прывезла запыт на сябе з Лідскага раёна, пашанцавала менш.

— У нас ёсць для вас планавае месца ў Любанскім раёне.

— Але мы з сям'ёй пераязджаем у Ліду, да таго ж там мяне чакае малады чалавек.

— Гэта ўсё толькі эмоцыі. Мы лічым, што трэба размяркоўвацца ў Любань. Іншая справа, калі б вы ехалі да мужа. Калі ўступіце ў шлюб, у вас з'явяцца падставы для пераразмеркавання, а запыты з іншых абласцей мы задавальняем, толькі калі запоўнены ўсе планаваныя месцы ў Мінскай вобласці — нашага галоўнага заказчыка.

Дзяўчына відавочна засмучана, бо яна свядома адмовілася ад месца ў Мінску, дзе зараз працуе настаўнікам хіміі, і аддала вакансію аднакурсніку. Прыняцце рашэння адкладваюць да 26 красавіка...

Апошнім размяркоўваецца студэнт-завочнік спецыяльнасці «Геаграфія. Ахова прыроды». Малады чалавек падлягае абавязковаму размеркаванню з той прычыны, што большасць часу навучаўся на дзённай бюджэтнай форме, а потым перавёўся на завочную. Зараз ён індывідуальны прадпрымальнік, аднак прыняў рашэнне працаваць у школе. У тых жа, хто не хоча працаваць па атрыманай спецыяльнасці, ёсць выйсце — кампенсаваць выдаткі за час свайго навучання на бюджэтным месцы...

Не з пустымі рукамі

...Шэрагі выпускнікоў, якія чакаюць сваёй чаргі, паступова радзеюць, але дырэктары школ, што асабіста прыехалі па кадры, усё ж не застаюцца з пустымі рукамі. Камісія па размеркаванні дапамагае ім знайсці аргументы, каб зацікавіць выпускнікоў....

— Вам, маладому спецыялісту, ужо і кватэру прапануюць. Калі першы раз заплаціце за жыллё, адчуеце розніцу.

— Ад школы да Жодзіна — усяго 20 хвілін. А там дарога адкрыта хоць да Масквы, хоць да Мінска... Яшчэ прыедзеце і скажаце «дзякуй», што ўгаварылі...

— Мне з самай раніцы не шанцавала, але справы ўжо наладжваюцца, — з задавальненнем канстатуе, уводзячы за сабой студэнтку, дырэктар Азярцоўскай сярэдняй школы Віктар Францішкавіч Савіцкі.

— Дык вы раней прыязджайце і нагледжвайце для сябе маладых спецыялістаў.

— Ужо ўсіх нагледзелі. Кожны год бяром ад вас на працу 6—8 чалавек. Але тут проста ўзніклі непрадбачаныя абставіны...

Попыт і прапанова

— Адзін з прынцыпаў работы камісіі па размеркаванні — зрабіць усё для таго, каб працоўная дзейнасць выпускнікоў пачыналася ў максімальна камфортных для іх умовах. Натуральна, не парушаючы пры гэтым заканадаўства, — запэўнівае начальнік аддзела кадраў БДПУ Валерый АЛАВЯННІКАЎ. — Проста выдатна, калі выпускнік размяркоўваецца ў школу, дзе ён праходзіў педагагічную практыку або ўжо працаваў там настаўнікам, у камфортную псіхалагічную атмасферу. Прашу заўважыць, што цяпер магчымасць працаўладкавання ў Мінску і абласных цэнтрах не залежыць ад наяўнасці рэгістрацыі ў гэтых населеных пунктах, а вызначаецца толькі самім наймальнікам.

Сёння ў сталіцы найбольш запатрабаваныя настаўнікі пачатковай школы і выхавальнікі дашкольных устаноў. У нас ужо прайшло размеркаванне выпускнікоў факультэта пачатковай адукацыі. Патрэба мінскіх школ у настаўніках пачатковых класаў — 153 чалавекі, а мы размеркавалі ў сталіцу 31 выпускніка. Гэта, між іншым, 38% ад агульнай іх колькасці — зусім нямала. Асноўныя нашы заказчыкі — установы адукацыі Мінска і Мінскай вобласці, куды мы размяркоўваем да 80% нашых выпускнікоў. Але ўсе роўна задаволіць усе заяўкі Камітэта па адукацыі Мінгарвыканкама па пачатковай школе не можам. На многіх спецыяльнасцях у нашых выпускнікоў — вялікі выбар. Можна ўсё абдумаць і, з улікам сваіх сямейных абставін, прыняць найбольш узважанае рашэнне.

Увогуле, ёсць шмат папулярных у моладзі спецыяльнасцяў, на якія мода прыходзіць і сыходзіць, а прафесія педагога заўсёды будзе запатрабаваная грамадствам.

nіkalaeva@zvіazda.by

Фота Сяргея НІКАНОВІЧА

Загаловак у газеце: Настаўнік — вельмі запатрабаваная прафесія

Дадаць каментар

Выбар рэдакцыі

Грамадства

Звычайная настаўніца фізікі трапіла на адронны калайдар

Звычайная настаўніца фізікі трапіла на адронны калайдар

Што насамрэч адбываецца на мяжы Швейцарыі і Францыі, дзе на глыбіні каля ста метраў размяшчаецца Вялікі адронны калайдар?

Грамадства

Як мы наведалі курсы перападрыхтоўкі для беспрацоўных

Як мы наведалі курсы перападрыхтоўкі для беспрацоўных

Не так даўно навукоўцы выявілі, што стрэс ад страты або змены месца працы ўваходзіць у топ-3 самых моцных негатыўных перажыванняў сучасных людзей. 

Грамадства

Як беларускія дзяўчаты частавалі ліванцаў стравамі з бульбы

Як беларускія дзяўчаты частавалі ліванцаў стравамі з бульбы

Ваенныя медыкі Вера Паўлянковіч і Вольга Яхнавец  былі ў Ліване з міратворчай місіяй.