Сталы форум кінааматараў — Міжнародны фестываль кароткаметражнага кіно Cіnema perpetuum mobіle — адкрыўся ўчора канцэртам Сяргея Пукста, а з гэтага дня пачынае конкурсныя і пазаконкурсныя паказы, майстар-класы і ўвогуле канцэнтруе ў сабе займальныя кінапраграмы. Cіnema perpetuum mobіle — альтэрнатыва «акадэмічнаму», прафесійнаму фестывальнаму руху. За пяць гадоў свайго існавання CPM зацвердзіў фармат аматарскага, у добрым сэнсе — вольнага ад умоўнасцяў, фестывалю з акцэнтам на маленькіх формах. Наяўнасць асобнага конкурсу эксперыментальнага кіно і праграмы «Дзэн/трэш» (эксперымент эксперыментам) — такая пікантная асаблівасць, як класіка нямога кінематографа пад суправаджэнне аркестра на кінафестывалі «Лістапад». Розныя формы, а любоў да кіно — тая ж.
Сёлета арганізатараў можна павіншаваць з пяцігадовым юбілеем. За пяць гадоў, як за пяць хвілін, — «разабрацца калі строга, зрабіць можна вельмі многа».
Створаны беларускім таварыствам «Kіnaklub.org» як некамерцыйны праект для прасоўвання незалежнага кіно і паказу яго новых форм, фестываль CPM стаў чаканай штогадовай падзеяй, якая збірае на адной пляцоўцы сапраўдных прыхільнікаў кінамастацтва.
У гэтым годзе з дэвізам «Пагружэнне ў кіно». Сёлета арганізатары не праводзілі глядацкіх перадпраглядаў, зыходзячы з якіх фарміравалася конкурсная праграма ў мінулыя гады, а сфарміравалі склад уласнымі намаганнямі.
На Cіnema perpetuum mobіle пяць конкурсаў — ігравога, дакументальнага, анімацыйнага, эксперыментальнага кіно і фільмаў беларускіх аўтараў. Апошні адбудзецца толькі другі раз, у мінулым годзе ў яго склад трапілі ігравыя, дакументальныя і анімацыйныя фільмы незалежных вытворцаў, выпускнікоў беларускіх ВНУ. Тады найлепшай ігравой карцінай стаў «Дзень нараджэння ў Мінску» Мікіты Лаўрэцкага — аўтара, фільм якога («Беларускі псіхапат») пазней стаў пераможцам Нацыянальнага конкурсу «Лістапад».
Гэтым разам конкурсная праграма беларускага кіно ўключае ў сябе сем ігравых і дакументальных, ужо без анімацыі, кароткаметражак, іх будзе ацэньваць міжнароднае журы (для кожнай секцыі фарміруецца яго асобны састаў).
Тут і ўладальнік «Бронзавай бульбы» мінулага фестывалю Bulbamovіe «Кансьерж» Роберта Сенекі, і навела «Таямніца гарбатай ямы» Януша Гаўрылюка з праекта «Хранатоп», і карціна «Пад іншым вуглом» Вольгі Лабоўкінай у жанры відэаданс («іранічная візуалізацыя змяненняў гравітацыі»). Беларуская конкурсная праграма будзе паказана сёння а восьмай гадзіне ўвечары ў кінатэатры «Перамога».
Кожная з праграм, як конкурсных, так і пазаконкурсных, разлічана прыкладна на паўтары гадзіны. Апошнія аб'яднаны ў секцыі не па відах кінематографа, а па пэўных канцэпцыях. У асобнае відовішча адабраны чатыры карціны маладых расійскіх рэжысёраў, у якіх персанажы паказваюцца ў стасунках з сацыяльнай, палітычнай і эканамічнай расійскай рэчаіснасцю. Героямі трох карцін з Беларусі, Ірака і Украіны праграмы «Прымаючы гвалт» сталі людзі, што атрымалі адпаведны досвед (беларуская карціна Ягора Ганарацкага «Асколкі лёсу» расказвае пра двух ветэранаў афганскай вайны). Вартыя ўвагі паказ «Дзэн/трэш» (пяць карцін: дзевяціхвілінная гісторыя болціка альбо кароткаметражка пра вяроўку, што апускаецца і пачынае гуляць з мінакамі) і праграма музычнага відэа «Vіsual musіc». Сёння а першай гадзіне ў Літаратурным музеі Петруся Броўкі будзе паказана праграма дзіцячай анімацыі з Францыі, Германіі, Вялікабрытаніі, Іспаніі, Аргенціны, Беларусі і іншых краін.
Увогуле Cіnema perpetuum mobіle пакажа фільмы прыкладна ста краін (для параўнання летась геаграфія ахоплівала толькі сямнаццаць), арганізатары атрымалі больш за тысячу заявак на ўдзел. Супрацоўніцтва з іншымі фестывалямі дазваляе паказваць найлепшыя фільмы на замежных пляцоўках, а ў свой план уключыць шэраг партнёрскіх паказаў — гэтым разам будуць дэманстравацца карціны польскага фестывалю анімацыі «O!PLA», праграмы форумаў DOKUfest (Косава) і Grenzland-Fіlmtage Selb (Германія).
Пятаму па ліку фестывалю Cіnema perpetuum mobіle аказаў падтрымку Цэнтр візуальных і выканальніцкіх мастацтваў «Арт карпарэйшн» (арганізатар такіх буйных культурных мерапрыемстваў, як тэатральны форум «ТЭАРТ» і міжнародны кінафестываль «Лістапад»).
У Мінску CPM будзе праходіць да
17 красавіка, але яго заканчэнне ў сталіцы будзе азначаць пачатак у іншых гарадах Беларусі. Расклад паказаў у абласных і раённых цэнтрах можна глядзець на сайце fіlmfest.by.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
