Вы тут

Магчымасці знойдзеныя і страчаныя


Адной з самых доўгачаканых падзей мінулага тыдня была сустрэча ў горадзе Доха (Катар), на якой разглядалася магчымасць замарозкі здабычы нафты найбуйнейшымі вытворцамі ў мэтах павышэння цаны.

Брокеры на фондавых біржах выказвалі з яе нагоды пэўны аптымізм — перад сустрэчай у нядзелю цэны на нафту выйшлі на ўзровень, на якім даўно ўжо не былі, — больш як 43 долары за бараль. Рост цэн на нафту дапамог бы і беларускаму бюджэту, паколькі Беларусь прадае за мяжу сотні пазіцый нафтахіміі, якія ўпалі ў цане ўслед за самой нафтай. Але цэнтральнай праблемай сустрэчы і магчымай дамоўленасці былі супярэчнасці паміж пазіцыямі Саудаўскай Аравіі, якая была гатова замарожваць здабычу, толькі калі гэта зробяць усе асноўныя гульцы на рынку, і Ірана, які паслядоўна заяўляў, што не будзе замарожваць здабычу, пакуль не выйдзе на дасанкцыйны ўзровень здабычы, што зойме яшчэ шмат месяцаў. У выніку цуду не адбылося, абодва бакі не адмовіліся ад сваіх раней агучаных пазіцый (Іран нават не стаў удзельнічаць у сустрэчы), і здзелка па замарозцы здабычы нафты не была дасягнута. Больш за тое, некаторыя краіны АПЕК, якія ўдзельнічалі ў сустрэчы, вылучылі новыя патрабаванні аб тым, каб акрамя Ірана здабычу замарозілі і нейкія іншыя буйныя вытворцы, якія не ўваходзяць у арганізацыю. Ужо ў першыя хвіліны таргоў панядзелка рынак адрэагаваў падзеннем цаны на нафту адразу на шэсць працэнтаў.

Вынікі выбараў у парламент у Сірыі аказаліся чаканымі.

Нягледзячы на тое, што да самой ідэі выбараў у ваюючай краіне Захад паставіўся адмоўна, яны адбыліся, і кааліцыя «Нацыянальнага адзінства» (якая ўключае кіруючую партыю Баас) атрымала 200 з 250 месцаў у сірыйскім парламенце. Адметна, што выбары прайшлі ў 13 з 15 правінцый краіны, што гаворыць пра грунтоўнасць улады ў Сірыі.

Для прэзідэнта Бразіліі Дзілмы Русеф насталі чорныя часы. 12 красавіка спецкамісія бразільскага Кангрэса з удзелам прадстаўнікоў усіх палітычных партый краіны ўхваліла імпічмент прэзідэнту Дзілме Русеф.

Спецкамісія паверыла ў тое, што падчас першых прэзідэнцкіх выбараў спадарыня Русеф прыцягвала незаконнае фінансаванне на сваю выбарчую кампанію са сродкаў буйной нафтавай кампаніі Petrobras, старшынёй савета дырэктараў якой была. У нядзелю пазіцыю спецкамісіі падтрымала і ніжняя палата парламента дзвюма трацінамі галасоў. Наступным крокам з'яўляецца галасаванне ў Сенаце, дзе спатрэбіцца толькі простая большасць галасоў.

Як вядома, супрацьстаянне Расіі і Турцыі з прычыны збітага турэцкай ваеннай авіяцыяй расійскага бамбардзіроўшчыка ўжо мела сваімі наступствамі мільярды долараў страт у тавараабароце дзвюх краін. На мінулым тыдні намеціўся новы нечаканы паварот, які ў будучыні можа нанесці ўзаемнаму гандлю дзвюх краін яшчэ больш моцны ўдар.

Прэзідэнт Ірана Хасан Роухані заявіў пра гатоўнасць Ірана стаць гарантам энергетычнай бяспекі Турцыі, забяспечыўшы усе патрэбы краіны па нафце і газе.

У дадзены момант 60 працэнтаў усяго спажыванага газу Турцыя купляе ў Расіі, што прыносіць расійскаму бюджэту вялікія сродкі. Адзінай надзеяй на захаванне статус-кво для расійскага экспарту газу з'яўляецца той факт, што ў Турцыі з Іранам ёсць не меншыя супярэчнасці, чым з Расіяй.

Для беларускай знешняй палітыкі галоўнай падзеяй стаў візіт Прэзідэнта Беларусі на саміт Арганізацыі ісламскага адзінства.

Сама па сабе гэта арганізацыя яшчэ не раскрыла той патэнцыял, які мог бы ў яе быць, улічваючы, што складаецца яна з 57 дзяржаў з насельніцтвам больш як мільярд чалавек. Галоўныя праблемы — дыспрапорцыі, якія ёсць у яе ўдзельнікаў. Адны з іх з'яўляюцца казачна багатымі, як Саудаўская Аравія і Катар, іншыя — зусім беднымі, як Сенегал. Вельмі малы ўзаемны гандаль, што заўсёды з'яўляецца негатыўным фактарам для збліжэння пазіцый. Вялікая геаграфічная аддаленасць найбуйнейшых па насельніцтве краін — удзельніц арганізацыі. Ёсць шмат супярэчнасцяў наконт тлумачэння ісламу з пункту гледжання той ці іншай пануючай плыні, па яго інтэрпрэтацыі ў асобных краінах. Але галоўным для Беларусі з'яўляецца той факт, што на саміце, які праводзіцца раз у тры гады, прысутнічаюць лідары краін-удзельніц, што дае бясцэнныя магчымасці для асабістых перагавораў па развіцці адносін. Улічваючы шматвектарную палітыку Беларусі, гэта цудоўная магчымасць дамовіцца аб новых кірунках супрацоўніцтва і нарошчванні беларускага экспарту ў сітуацыі, калі галоўныя рынкі збыту беларускай прадукцыі — Расія і Украіна — па прычыне эканамічных праблем больш не могуць забяспечыць ранейшыя аб'ёмы збыту беларускай прадукцыі. Аляксандр Лукашэнка правёў паспяховыя перамовы з вышэйшымі службовымі асобамі Турцыі, Казахстана, Пакістана, Афганістана, Катара, Інданезіі і шэрагу іншых краін.

Сяргей КІЗІМА, доктар палітычных навук
 

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.