Вясной мы актыўна набываем расаду, саджанцы дрэў, кустоў, кветак. Вельмі хочацца, каб нашы расліны добра прыжыліся, як мага менш хварэлі і хутчэй прынеслі ўраджай.
Але каранёвая сістэма пры перасадцы ўсё ж такі пакутуе, бо выкопваючы расліны, як бы мы ні стараліся ўсё зрабіць акуратна, далікатныя маленькія тоненькія карэньчыкі пашкоджваюцца, а ў перыяд транспарціроўкі і пасадкі падсыхаюць. Расліна расходуе шмат сіл для прыжывання. Каб дапамагчы ёй у гэтым цяжкім працэсе, мы можам прыгатаваць пажыўны гель для абвалаквання каранёвай сістэмы. Што гэта дае? Гель пакрывае ўсе карані і захоўвае пажыўную вільгаць да 10-14 дзён, а гэтага перыяду як правіла дастаткова, каб расліна прыжылася і пачала ўтвараць маладыя карэньчыкі.
Прыгатаваць пажыўны гель даволі проста. Для гэтага нам спатрэбіцца 10 г садовага гідрагелю (дробная фракцыя), 1000—1200 мл халоднай вады, 2 каўпачкі гумату.
У ёмістасць наліваем 1 літр вады, дадаём туды 2 каўпачкі вадкага гумату.
Паступова, пры бесперапынным памешванні насыпаем гідрагель, робім гэта так, як быццам варым манную кашу.
Размешваем да аднастайнай кансістэнцыі і пакідаем на 15-20 хвілін для поўнага набракання гелю. Калі гель стаў вельмі густы, разводзім яго вадой. У розных вытворцаў розны гель, таму ваду рэгулюем. Гель павінен быць не занадта вадкі, але і не камякамі, з каранёвай сістэмы не павінен сцякаць, а трымацца на карэньчыках.
Калі расліна была ў гаршку, напрыклад расада, акуратна вымаем абвіты каранямі земляны камяк, апускаем на некалькі секунд у гель і высаджваем на пастаяннае месца. Калі расліна без землянога камяка, то таксама апускаем карані ў гель, вымаем і высаджваем расліну ў грунт.
Важна! Выкарыстоўваючы пажыўны гель, паліваем мы гэтак жа, як і без яго. Гель усяго толькі дапамагае раслінам прыжыцца на новым месцы, але пры недастатковым паліванні ні адзін гель не ўратуе расліну ад гібелі.
Існуюць строгія патрабаванні да месцаў для купання.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.
