Вы тут

Cамы лепшы рэцэпт даўгалецця — вітамінныя салаты


Пенсіянеры Віктар і Ірына Вайтовічы самым лепшым рэцэптам даўгалецця (абое ідуць на восьмы дзясятак) лічаць вітамінныя салаты. Яны круглы год у меню сужэнцаў, прычым усе прадукты са свайго агарода. А як заканчваецца ў склепе гародніна, пенсіянеры збіраюць ежу пад нагамі. Толькі палезла з зямлі першая траўка — адразу едуць на лецішча па крапіву, дзьмухаўцы, лебяду, падбел. Можа, нездарма прырода пасяліла гэтае пустазелле побач з жытлом чалавека? З яго і лекі выдатныя, і стравы карысныя.


Дзікія расліны могуць выратоўваць, пакуль не нарасло культурнага зеляніва на градцы. Лебяда заменіць шпінат, крапіва пойдзе ў боршч. У лісты лопуху ці падбелу можна заварочваць галубцы — атрымаецца не горш, чым з капусты ці салаты. Прычым тыя ж лісты дзьмухаўца ці крапівы можна нават марозіць на зіму. Трэба толькі перад замарозкай патрымаць іх у кіпені.

Крапіву, дзьмухавец, трыпутнік (як паасобку, так і разам) можна дабавіць у амлет. Пустазелле на гадзіну замачыце, здрабніце з зяленівам кропу, пятрушкі, цыбуляй. Дамяшайце сумесь з узбітых яек і малака — і на разагрэтую патэльню.

Каб крапіва «не кусалася», яе лепш апарыць ці крыху паварыць. Вымочваць «дзікуноў» трэба, каб пазбавіцца ад гаркаты. Між іншым, дзьмухавец у Еўропе — у вялікай пашане, яго (як, дарэчы, і лебяду) вырошчваюць на агародах. У Францыі нават вывелі спецыяльныя культурныя віды гэтай расліны, якія не гарчаць.

Калі лісце дзьмухаўца ідзе на салаты, гарніры, дык з кветак робяць віно і вараць варэнне.

Як толькі распусцяцца жоўтыя галоўкі, збярыце 300 штук для варэння. Выдаліце кветаножкі, пялёсткі прамыйце ў друшляку пад праточнай вадой. У кіпень (паўлітра) выкладзіце дзьмухаўцы. Як сумесь закіпіць, варыце каля 15 хвілін. Здымайце з агню і дайце пастаяць 8-10 гадзін. У працэджаны праз некалькі слаёў марлі настой дадайце 1—1,5 кг цукру, ускіпяціце і варыце яго, пакуль не пачне гусцець. За дзесяць хвілін да заканчэння варкі дадайце сок лімона. Можна паспрабаваць варыць дзьмухавец з лімонамі і апельсінамі (разам з лупінамі іх наразаюць кубікамі ці таркуць на тарцы, здрабняюць блэндарам).

Для віна можна выкарыстоўваць кветкі з кветаножкамі (тады смак будзе з гарчынкай) альбо толькі жоўтыя пялёсткі дзьмухаўца. Зноў жа існуюць рэцэпты, дзе дабаўляюцца лімоны і апельсіны. Гатовае віно павінна яшчэ пастаяць, каб быць смачнейшым, — дайце яму «дажыць» хаця б да Новага года.

Карэнне дзьмухаўца (як і лопуху), сабранае вясной, можа пайсці на напоі. Высушыце яго ў духоўцы (яшчэ можна падсмажыць), здрабніце ў парашок і заварвайце як альтэрнатыву каве (альбо выкарыстоўвайце як дабаўку ў каву ці напой з цыкорыю).

Вясенняе пустазелле ў салатах можна камбінаваць з традыцыйнымі кампанентамі — капустай, кропам, пятрушкай, агуркамі, памідорамі, радысам, цыбуляй, варанымі яйкамі, арэхамі. Запраўляць смятанай, алеем, маянезам, сокам лімона, воцатам.

Хочаце здзівіць сямейнікаў новымі рэцэптамі першых страў? Падайце боршч з крапівой і шчаўем, халаднік з зяленівам, зялёныя супы-пюрэ. Каб не страціць у час варкі вітаміны, кладзіце зяленіва ў кіпень і не варыце больш за 10-15 хвілін.

Рабіць супы з крапівы (ці лебяды) можна на мясным булёне, спалучаць з іншым зеленівам (напрыклад, шчаўем і шпінатам), гароднінай. Напэўна, самы папулярны рэцэпт — крапіўнае бацвінне: у булён пакладзіце нарэзаную бульбу, маладую крапіву, кроп, пятрушку, чорны перац гарошкам, соль. Узбоўтайце яйка і тонкім струменчыкам уліце ў каструлю. Падаваць трэба са смятанай.

Некаторыя гаспадыні, перш чым пакласці крапіву ў булён, тушаць яе з цыбуляй. Можна дабавіць абсмажаную муку, сок лімона, пакласці ў талерку палову варанага яйка.

Зяленіва дадаюць у начынку для пірагоў, пельменяў, піражкоў, у рагу, фарш, соусы.

А на дэсерт можаце пакаштаваць ачышчаныя сцябліны рэвеню з цукрам альбо зварыце з іх кампот.

Загаловак у газеце: Вітаміны пад нагамі

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.