Сёлета на конкурс падалі заяўкі 648 дызайнераў. У фінал жа прайшло толькі 88 калекцый. Арганізатары «Млына моды» пацвярджаюць: адбор быў жорсткім. Але за прызы, якія чакалі пераможцаў, — замежныя стажыроўкі і ўдзел у міжнародных выстаўках — варта было пазмагацца.
Сярод удзельнікаў фестывалю — студэнты каледжаў і ўніверсітэтаў, навучэнцы цэнтраў дадатковай адукацыі дзяцей і моладзі. Праца з канкурсантамі вялася на працягу цэлага года. Для дызайнераў-пачаткоўцаў арганізоўвалі семінары, дзе давалі рэкамендацыі па стварэнні калекцый, вучылі, як рэжысіраваць паказы і правільна фатаграфаваць свае ўборы.
— Многія ўстановы адукацыі выпускаюць вузкіх спецыялістаў: тэхнолагаў, канструктараў. Але ж дызайнер мусіць умець усё: быць і краўцом, і мастаком, — кажа член Беларускага саюза дызайнераў і старшыня журы Святлана ГНЯДЗЁНАК. — Працу з мадэльерамі мы пачынаем з таго, што шукаем крыніцу натхнення, і ўжо потым на працягу двух-трох месяцаў увасабляем гэту ідэю ў калекцыю.
Маладыя таленты спаборнічалі ў намінацыях «Школа моды» і «Майстар моды». У першай удзельнічалі навучэнцы. Найлепшую жаночую калекцыю ў гэтай катэгорыі прадставіла студэнтка Інстытута сучасных ведаў імя Шырокага Настасся Самусік, найлепшую мужчынскую — Алеся Кушчанка з Віцебскага дзяржаўнага тэхналагічнага ўніверсітэта. Вераніка Лахавец з Гродзенскага дзяржаўнага ўніверсітэта імя Янкі Купалы падрыхтавала найбольш цікавае адзенне для падлеткаў, а з дзіцячым касцюмам лепш за астатніх справілася Таццяна Карпалава, якая займаецца ў Цэнтры творчасці дзяцей і моладзі Цэнтральнага раёна Гомеля. У намінацыі «Майстар моды» (тут удзельнічалі мадэльеры, якія ўжо працуюць у сферы) першае месца заняла лідчанка Дар'я Барко.
Пераможцы паедуць стажыравацца ў Італію, Расію, Польшчу, Літву. Яшчэ адзін падарунак — міжнародныя творчыя майстэрні. У сярэдзіне чэрвеня найлепшыя калекцыі «Млына» пакажуць у навучальных установах Кракава і Прагі.
Зразумела, што моладзь, якая толькі пачынае ствараць адзенне, яшчэ не мае патрэбнага вопыту і акадэмічнага ўзроўню. Але менавіта дзякуючы гэтаму ім удаецца прадставіць на подыуме новы погляд на сучасную моду. «Калекцыі на конкурсе неверагодна крэатыўныя. Ідэі, з якімі прыходзіць моладзь, яшчэ нават не дэманструюцца на тыднях моды. Такога не ўбачыш на паказах ні ў Мілане, ні ў Лондане», — заўважае Святлана Гнядзёнак.
Цяперашні ўзровень конкурсу высока ацэньваюць і замежныя эксперты.
— Памятаю, калі першы раз прыязджалі, гадоў 20 таму, на творы мадэльераў немагчыма было глядзець без слёз. Калекцыі тады складаліся проста з сукенак рознага колеру, але аднаго фасону. Прыблізна так працавалі дызайнеры. Сёння ж мы ў захапленні. Мяне заўсёды ўражвае, што на фестывалі вельмі шмат мужчынскіх калекцый. На расійскіх конкурсах гэта рэдкасць, — кажа прэзідэнт дабрачыннага фонду «Рускі сілуэт» Таццяна МІХАЛКОВА.
Саніта БЛАМНІЕЦЭ, кіраўнік міжнароднага конкурсу маладых мастакоў моды Habіtus Baltja (Латвія), адзначыла дзіцячыя калекцыі. Дызайнера адной з іх запросяць на прафесійную модную выставу ў Рыгу, якая адбудзецца ў сакавіку наступнага года.
Арганізатары «Млына моды» спадзяюцца, што фестываль будзе дыктаваць у краіне маладзёжную моду і папулярызаваць адзенне ад айчынных вытворцаў.
Фота Надзеі БУЖАН
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
