Вы тут

Пачалася праходка вертыкальных ствалоў


Праграмай развіцця мінеральна-сыравіннай базы Рэспублікі Беларусь, зацверджанай урадам краіны, прадугледжана ўзвядзенне Петрыкаўскага горна-ўзбагачальнага камбіната, які ўвойдзе ў аб'ядненне «Беларуськалій». Учора на Петрыкаўскім радовішчы калійных соляў, што у Гомельскай вобласці, ва ўрачыстай абстаноўцы дадзены старт праходцы вертыкальных ствалоў будучага рудніка. Усяго іх будзе тры — скіпавы для пароды, клецявы для пад'ёма людзей і абсталявання і паветрападавальны. Глыбіня кожнага складзе прыкладна 850 метраў.


Унікальныя па сваёй тэхналогіі работы выконвае Cалігорскае ААТ «Трэст Шахтаспецбуд». Прадпрыемства — адзінае ў свеце, якое будуе вертыкальныя ствалы на грунтах са складанай гідрагеалогіяй. Работы пачаліся пасля працяглай па часе і працаёмістай штучнай замарозкі абводненых грунтаў вакол першага з будучых ствалоў — скіпавага — і выканання цэлага шэрагу іншых падрыхтоўчых мерапрыемстваў, у тым ліку водапаніжэння.

У свой час менавіта гэты калектыў узвёў такія ж складаныя інжынерныя збудаванні — вертыкальныя ствалы будучых шахт — на Чырвонаслабодскім і Бярозаўскім рудніках, а цяпер прымае самы актыўны ўдзел ва ўзвядзенні Гарлыкскага горна-ўзбагачальнага камбіната ў Туркменістане. Там ён прыйшоў на выручку туркменскім сябрам пасля няўдалай спробы турэцкай кампаніі «раскупорыць» багатыя залежы калійных соляў пад Гарлыкам. Аб працоўных справах славутага калектыву нядаўна расказаў у сваім інтэрв'ю «Звяздзе» старшыня савета дырэктараў акцыянернага таварыства Валерый Старцаў (гл. нумар за 27 красавіка).

Крыху раней у гутарцы з айчыннымі журналістамі генеральны дырэктар трэста Дзяніс Дзіулін падкрэсліў: мы робім усё, каб з першых крокаў гэта была самая сучасная будоўля; пакажам лепшае, што ўмеем.

Наша газета будзе сачыць за ходам надзвычай важнай для эканомікі краіны новабудоўлі і трымаць сваіх чытачоў у курсе.

Уладзімір Хількевіч

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».