Іван Іванавіч Астроўскі, кандыдат тэхнічных навук, дацэнт, намеснік загадчыка кафедры Белдзяржуніверсітэта інфарматыкі і радыёэлектронікі.
«Звязду» я выпісваю «сто гадоў» — з тых самых часоў, калі служыў у войску. Малады, здавалася б, быў, але выбар зрабіў свядома — выбраў газету найперш з-за мовы. А потым да яе паступова дадаліся завочныя спаборніцтвы па шашках, складанне прыпевак, удзел у конкурсе «Хто каго?»... Заўсёды любаваўся здымкамі Анатоля Клешчука, чытаў «Фотасловы» Яўгена Пясецкага, смяяўся і, часцяком здаралася, пераказваў іншым «вясёлыя і праўдзівыя гісторыі» з рубрыкі «...Народ на провадзе!», суперажываў думкам Алены Ляўковіч, Святланы Яскевіч... Жонка (а яна, дарэчы, настаўніца беларускай мовы і літаратуры), апроч гэтага, досыць уважліва чытала і, што называецца, брала на ўзбраенне парады з «Краіны здароўя», «Крынічкі», «Хатняй энцыклапедыі»... Нас цікавіла і цікавіць усё!
Але ж галоўнай адметнасцю «Звязды» была і застаецца мова.
Што рабіць: ад роднай, ад матчынай горад, а тым больш вялікі, прымушае адмаўляцца — хочучы-няхочучы «пераводзіць» людзей на рускую. Менавіта на ёй — і, можна сказаць, адной, хоць афіцыйна ў нас двухмоўе — вырасла ўжо некалькі пакаленняў гараджан. Таму не дзіва, што многія з іх не разумеюць першай з дзяржаўных, горш за тое — пагарджаюць ёй...
І як жа прыемна са старонак «Звязды», «Чырвонкі» даведвацца, што сярод моладзі ўсё больш папулярнай становіцца беларуская, што ёсць цікавасць да нашай гісторыі і культурнай спадчыны...
А зрэшты, прозай можна пісаць доўга, вершаваным радком — карацей:
На мове дзяцінства чытаць, гаварыць
Зусім адвучылі: «Нязвыкла...»
Але
наша слова гучыць і гучыць,
Але
наша мова не знікла!
І жыць яна будзе, паверце, заўжды:
Мы звязаны з роднай навекі!
Прымайце ж яе са старонак «Звязды»,
Як водар духмяны, як лекі!
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.