Вы тут

Мікрахвалі для медыцынскіх адходаў


Комплекс абсталявання для абясшкоджвання фармацэўтычных адходаў і цытастатычных фармацэўтычных прэпаратаў распрацаваны ў БДУ. Работа выканана навукоўцамі Інстытута ядзерных праблем БДУ пад кіраўніцтвам загадчыка лабараторыі радыёфізічных даследаванняў Віктара Карповіча.


Гэты комплекс дазволіць абясшкоджваць прэпараты, якія валодаюць высокатаксічным і актыўным дзеяннем і адносяцца да небяспечных адходаў. Іх утылізацыя патрабуе альбо спальвання пры высокай тэмпературы, альбо захавання ў герметычнай металічнай капсуле на спецыялізаваных палігонах. Дзеянне новага комплексу дасць магчымасць вырашыць гэтую праблему шляхам абясшкоджвання медыцынскіх адходаў і пераводу іх у групу бытавых. Пасля гэтага адпрацаваны фармацэўтычны матэрыял можна будзе ўтылізаваць без шкоды і пагрозы для навакольнага асяроддзя.

Абсталяванне заснавана на тэхналогіі мікрахвалевага ўздзеяння. Рабочая ёмістасць аб'ёмам 100 літраў з адходамі змяшчаецца ў спецыяльную камеру і награваецца да 650 градусаў. У выніку ўтвараюцца пірагаз і попел. Пасля гэтага адбываецца фільтраванне пірагазу і яго разлажэнне на бяспечныя складнікі пры тэмпературы 1100 °С. Яны выкідваюцца ў атмасферу, не наносячы ёй шкоды. Попел жа падлягае захаванню на звычайным палігоне.

Варта адзначыць таксама і эканамічную выгаду новага комплексу. Акрамя электрычнасці яна не патрабуе дадатковых выдаткаў. Кошт абясшкоджвання 1 кілаграма медыцынскіх адходаў складзе не больш за 3,5 долара.

— У Беларусі штогод утвараецца каля 30 тысяч тон медыцынскіх адходаў. Сёння для цэнтралізаванага і своечасовага абясшкоджвання фармацэўтычных прэпаратаў патрабуецца 25 комплексаў для краіны, — тлумачыць Віктар Карповіч. — Падчас правядзення доследна-тэхналагічных работ супрацоўнікі Інстытута ядзерных праблем БДУ паспяхова абясшкодзілі больш за 10 тон адходаў з анкалагічных цэнтраў.

Комплекс вучоных БДУ распрацаваны ў адпаведнасці з беларускімі, расійскімі і еўрапейскімі нарматывамі па абясшкоджванню фармацэўтычных прэпаратаў. Ужо атрымана ліцэнзія Міністэрства прыродных рэсурсаў і аховы навакольнага асяроддзя на работу гэтага абсталявання, ёсць заключэнне Навукова-практычнага цэнтра гігіены аб экалагічнай бяспецы і еўразійскі патэнт.

На Міжнароднай выставе-кангрэсе "Высокія тэхналогіі. Інавацыі. Інвестыцыі" ў Санкт-Пецярбургу комплекс Інстытута ядзерных праблем БДУ заваяваў сёлета залаты медаль і заняў трэцяе месца ў намінацыі "Энергазберагальныя экалагічныя тэхналогіі" на Беларускім прамысловым форуме. Распрацоўкай навукоўцаў Белдзяржуніверсітэта зацікавіліся ў Расіі і Ізраілі.

Надзея НІКАЛАЕВА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».