22 верасня, аўторак

Вы тут

Сама сабе начальнік


У глыбінцы паслугі «Белпошты» адпавядаюць сучаснаму ўзроўню, а іх спектр у вёсках не адрозніваецца ад гарадскога.

На Шуміліншчыне нашаму карэспандэнту пашчасціла пазнаёміцца з прафесіяналамі ў сферы паштовых паслуг з вялікай літары. Начальнік аддзялення ў вёсцы Дабея Вольга Несцярэнка паспяхова выступіла на прафесійным конкурсе — яна ў «топавым спісе» па вобласці. Акрамя таго, яна адначасова і паштальён.


— Нядаўна ў Віцебску на галоўным паштамце адбыўся абласны конкурс прафесійнага майстэрства. Спачатку журы трэба было прадставіць асабістую прэзентацыю. Канкурсанты творча распавядалі пра працоўныя будні. Было і тэсціраванне, і практычныя заданні. Я зрабіла адпраўленне «Па шляху» з дакументамі, аформіла страхоўку на аўто. Пры гэтым трэба было вызначыць сапраўднасць дакументаў. Акрамя таго, адправіла электронны грашовы перавод за мяжу — у Расію... Па выніках нялёгкіх выпрабаванняў, бо ўсе канкурсанткі былі моцныя ў прафесійным плане, заняла 8-е месца, — падзялілася яна ўражаннямі.

Абаяльная жанчына аказвае паштовыя паслугі ў Дабеі і населеным пункце Прыазёрны. Маё пытанне, як жа яна спраўляецца з такім вялікім «фронтам работ», — выклікала ў жанчыны ўсмешку. Сказала, што любіць сваю работу, таму і спраўляецца адна. За ўсе гады скаргаў не было. Галоўнае — усё ведаць дасканала і загадзя планаваць працоўны час.

— Ва ўсім паспее той, хто, як кажуць, ад «а» да «я» ведае сакрэты прафесійнага майстэрства. Мой агульны паштовы стаж прыкладна гадоў 10. Раней працавала паштальёнам. Каля 3-х гадоў — на цяперашняй пасадзе. Так, яна вельмі адказная. Землякі і госці раёна ведаюць, што пошта працуе надзейна круглы год. І пры самым капрызным надвор'і ім акажуць паштовую паслугу, — гаворыць Вольга.

Вольга Савельеўна на сваім «пасту» — у аддзяленні паштовай сувязі ў Дабеі з 8.00 да 12.30 і з 15.30 да 17.00 гадзін. А калі яе няма ў памяшканні пошты пасярод рабочага дня, значыць яна ў вёсцы. Усяго абслугоўвае больш за 540 чалавек!

У асноўным у аддзяленне прыходзяць, каб адправіць ліст ці пасылку, купіць тавары штодзённага попыту, аплаціць камунальныя паслугі, мабільную сувязь... Калі пералічваць усё, што можна зрабіць у гэтым утульным памяшканні, бадай, не хопіць газетнай старонкі. У наш час пошта — «шматпрофільны сэрвісны цэнтр», дзе аказваюць дзясяткі паслуг. Напрыклад, можна заказаць тавары беларускіх вытворцаў (па каталогу), аформіць страхоўку, аплаціць за кватэрны тэлефон... І якасць, аператыўнасць абслугоўвання — высокія, незалежна ад месцазнаходжання аддзялення паштовай сувязі.

— Сярод кліентаў ёсць і адзінокія. Напрыклад, 90-гадовая бабулька часта просіць харчовыя тавары прынесці. А ў нас дастаткова багаты выбар і прымальныя цэны. Можаце параўнаць кошт цукру, напрыклад, макаронных вырабаў, кансерваў, — працягвае Вольга.

Пенсіянеркі любяць яе, як дачку. І вельмі сумуюць, калі яна ў адпачынку. Але, канешне, пошта працуе і ў гэтыя дні. Бо Вольгу падмяняе «дублёр».

Удвая прыемна пісаць менавіта пра Вольгу і таму, што яе свякроў — падпісчыца «Звязды» з вялікім стажам. Любоў Васілеўна Несцярэнка наогул любіць чытаць беларускамоўныя выданні і кнігі. Ёсць упэўненасць, што і 6-класнік, яе ўнук, сын Вольгі, таксама будзе паважаць роднае слова. Хлопец вучыцца ва ўнікальнай гімназіі ў Ляскавічах.

Калі ёсць трохі вольнага часу, яна шые вопратку сабе і сваякам. Вучылася ў Віцебску ў індустрыяльна-педагагічным каледжы. Мае дыплом майстра вытворчага навучання і тэхнолага. Але звязала сваё працоўнае жыццё з поштай і не шкадуе. Бо і праца прэстыжная, і штодня служыць людзям — для яе гонар. Робіць усё, каб яе кліентам заўсёды было што чытаць, каб своечасова атрымлівалі лісты, адчувалі сабе літаральна на сувязі з усім светам.

На памяць шаноўнай Вользе і яе свекрыві перадаў фірмовыя падарункі ад «Звязды». Не забыў пакінуць і сувеніры для іншых падпісчыкаў старэйшай дзяржаўнай беларускамоўнай газеты.

Нагадаю, у наступным годзе «Звяздзе» споўніцца 100 гадоў! І заўсёды падчас камандзіровак хочацца ўбачыць тых, хто агітуе за наша выданне, выпісвае яго. У Шумілінскім раёне такіх дзясяткі!

pukshanskі@zvіazda.by

Шумілінскі раён

Выбар рэдакцыі

Грамадства

Конкурс прафесiйнага майстэрства WorldSkills Belarus 2020 прайшоў у Мiнску

Конкурс прафесiйнага майстэрства WorldSkills Belarus 2020 прайшоў у Мiнску

Конкурс прафесiйнага майстэрства WorldSkills Belarus 2020 прайшоў у Мiнску ў Індустрыяльным парку «Вялiкi камень» з грандыёзным размахам. 

Культура

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

Пра калег — настаўнiкаў, старэйшых таварышаў, паплечнiкаў распавядае доктар педагагiчных навук, прафесар матэматыкi, заслужаны дзеяч навукi Рэспублiкi Беларусь.

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.