Смак і водар сапраўднага лета

Вось і дачакаліся! Учора ўпершыню ўбачыў і, вядома ж, пакаштаваў менавіта сакавітыя велізарныя клубніцы! Ды ці толькі я адзін!

Да прадаўцоў ягад выстройваліся чэргі, і кожны пакупнік адыходзіў ад прылаўка з ладным пакетам (а то і не адным) цёмна-чырвонага смакоцця. Нават у транспарце лунаў гэты непаўторны і такі доўгачаканы водар... У прыватнасці, масава пайшла прадукцыя з клубнічнага краю Беларусі — Лунінеччыны. Хто не чуў пра тамтэйшы знакаміты кірмаш у Дварцы, адкуль і вязуць пастаўшчыкі салодкую ягаду як па ўсёй краіне, так і за яе межы?! Думаю, не памылюся, калі назаву клубніцы сапраўдным сімвалам лета. Вядома, потым будуць і іншыя прысмакі, але ж менавіта яны сімвалізуюць, што лета прыйшло — канчаткова і беспаваротна! І мы верым, што яно будзе такім жа яркім на ўражанні, як колер клубніц, такім жа «смачным» на новыя знаёмствы, як іх водар, такім жа карысным для цела і душы, як і спажыўныя ўласцівасці ягады! Клубніцы — гэта пачатак новага невялікага жыцця. Дзякуй, лета, малайца, за ягады з Дварца!

Сяргей СТАРЫНАЎ

Фота БЕЛТА