У Дзень Незалежнасці сталіца акунулася ў святочную атмасферу. Ва ўсіх раёнах Мінска праходзілі ўрачыстыя мерапрыемствы. На радасны настрой мінчан у 25-годдзе незалежнасці Беларусі не паўплывалі ні спякота, ні праліўны дождж. Увесь горад насыціўся духам народных гулянняў на канцэртах, кірмашах і спартыўна-забаўляльных шоу. А ў Дзяржаўным музеі гісторыі Вялікай Айчыннай вайны ў гэты дзень адкрыўся адмысловы праект — мабільная экспазіцыя пад назвай «Вызваленне Беларусі. Верасень 1943 г. — ліпень 1944 г.».
Праект рэалізаваны сумесна з Пасольствам Кітая ў Беларусі пры фінансавай падтрымцы кітайскай кампаніі. Музей, што змясціўся на 30 квадратных метрах перасоўнага паўпрычэпа, здольны зрабіць даступнай гераічную гісторыю беларускага народа для ахвотных у многіх гарадах краіны.
Як адзначыў падчас урачыстай цырымоніі адкрыцця перасоўнай экспазіцыі намеснік кіраўніка Адміністрацыі Прэзідэнта Ігар Бузоўскі, гэты праект з'яўляецца доказам таго, што Беларусь і Кітай не толькі выбудоўваюць свае адносіны ў эканамічнай плоскасці, але і ўзбагачаюць адзін аднаго культурай. Ігар Бузоўскі лічыць, што гэты знакавы праект будзе нагадваць беларусам, наколькі важнай з'яўляецца палітычная, эканамічная, культурная і гістарычная незалежнасць для краіны. «Дзякуючы гэтаму праекту мы зможам лепш захаваць наша гістарычнае мінулае і прымножыць веды моладзі. Усё гэта мае каласальнае значэнне для пабудовы незалежнай дзяржавы», — адзначыў намеснік кіраўніка Адміністрацыі Прэзідэнта.
Па словах Надзвычайнага і Паўнамоцнага Пасла Кітая ў Беларусі Цуй Цыміна, Другая сусветная вайна — гэта агульная памяць Кітая і Беларусі.
«Сёння, праз 72 гады, абодва бакі падымаюць кітайска-беларускае сяброўства да новых вяршыняў. Гэты праект дазволіць шматлікім беларусам азнаёміцца з гісторыяй вайны, якая закранула ўсе народы. У гэтай экспазіцыі ёсць спецыяльны стэнд пад назвай «Вялікі кітайскі народ у Другой сусветнай вайне», і я ўпэўнены, што ён дазволіць усім жыхарам пазнаёміцца з гісторыяй супраціву Кітая», — адзначыў Цуй Цымін.
Прадстаўленая экспазіцыя адлюстроўвае доўгі і нялёгкі шлях воінаў Чырвонай Арміі і беларускіх партызан да вызвалення Беларусі. Таксама да новых пакаленняў яна данясе памяць пра герояў і звычайных людзей, якія абаранялі Радзіму ў перыяд вайны.
Экспазіцыя складаецца з чатырох раздзелаў. Першыя два прысвечаны пачатковаму этапу вызвалення Беларусі і Беларускай стратэгічнай наступальнай аперацыі «Баграціён». Трэці раздзел адлюстроўвае адну з асаблівасцяў аперацыі «Баграціён» — узаемадзеянне часцей і злучэнняў Чырвонай Арміі з партызанскімі фарміраваннямі. У чацвёртым распавядаецца аб трыумфе народа-пераможцы на партызанскім парадзе, які адбыўся 16 ліпеня 1944 года ў вызваленым Мінску. Уся экспазіцыя дапоўнена картамі, газетамі, улёткамі і асабістымі рэчамі ўдзельнікаў вызвалення Беларусі.
У Дзень Незалежнасці нямала жыхароў сталіцы вырашылі наведаць Музей Вялікай Айчыннай вайны. Мінчук Дзмітрый лічыць, што гэта вельмі важнае для ўсёй краіны свята, бо менавіта 3 ліпеня беларускі народ здзейсніў вялікі подзвіг і вызваліў Мінск ад нямецка-фашысцкіх акупантаў. Ён расказаў, што яго дзед быў партызанам, удзельнічаў у падпольнай дзейнасці ў Мінскай вобласці. Каб ушанаваць яго памяць, вырашыў пачаць святкаванне з паходу ў музей. Успамінае, што калісьці і яго таксама вадзілі ў музей яго бацькі. Выконваючы традыцыю, узяў з сабой сюды і сваіх дзяцей.
Сярод тых наведвальнікаў музея, хто аднымі з першых убачылі перасоўную экспазіцыю, не толькі мінчане, але і госці сталіцы. Валянціна Сяргееўна з Санкт-Пецярбурга прыехала да сваёй сястры Людмілы Пятроўны, каб даведацца болей пра Мінск і такое знамянальнае для ўсіх беларусаў свята. Вырашылі пачаць знаёмства менавіта з гісторыі перамогі беларускага народа. А ў Людмілы Пятроўны свята асацыюецца са словам «свабода», бо за гады Вялікай Айчыннай вайны ўся яе сям'я зведала нямала: памятае яна і пасляваенную разруху, і тое, як аднаўляўся ў тыя гады Мінск.
Юрый з Ніжняга Ноўгарада са сваёй сям'ёй сабраўся ў беларускую сталіцу падчас адпачынку і прыехаў акурат у Дзень Незалежнасці. Таму пытанняў з экскурсійнай праграмай у яго не ўзнікла — вырашыў наведаць парад і музей Вялікай Айчыннай вайны, пра які чуў шмат добрых водгукаў. Музей яму вельмі спадабаўся. Ён быў здзіўлены сабраным тут вялізным аб'ёмам інфармацыі і афармленнем экспазіцыі. Таксама прыемным сюрпрызам стала наведанне перасоўнага музея, які здзівіў яго не менш, бо падобнага праекта ён яшчэ нідзе не бачыў.
Фота Сяргея НІКАНОВІЧА
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.