Вы тут

Адкрыўся восьмы Усебеларускі фестываль народнага гумару


Гэта ўжо гісторыя: надоечы, восьмага ліпеня, на раздарожжы паміж Малымі і Вялікімі Аўцюкамі адкрыўся восьмы Усебеларускі фестываль народнага гумару. Факт: яны, тыя Аўцюкі — вялікія і малыя (іх яшчэ завуць аўцючанятамі) прызнаныя восьмым цудам свету — пасля пірамід Хеопса, Александрыйскага маяка, вісячых садоў Семіраміды, статуі Зеўса...


Як Бог на небе: ёсць за што!

Вы ўжо чулі, напрыклад, што жыхары гэтых мястэчкаў (іх тут спрадвеку завуць каласкамі і калінкамі) садзяць бульбу ноччу і з рагаткі (каб жука абдурыць і зямлю не патаптаць)? Тады ведайце, што, паводле прагнозаў (у прыватнасці, нашага падпісчыка спадара Міколы Горба з Малых Аўцюкоў), у бліжэйшыя гады яе і капаць будуць ноччу, каб гаспадар не злавіў. Вы яшчэ збіраецеся адкрыць «Салон прыгажосці»? А там ужо ёсць і працуе ён пад дэвізам: «Заходзьце і вы сябе не пазнаеце!» Вы недзе чыталі, што ў тамтэйшых краях ніхто гарэлкі не гоне, але многія прадаюць? То самая лепшая — ведайце — у мясцовага ўчастковага. Вы яшчэ думаеце, як гэта пахудзець, пастрыгчыся, «намаляваць на мордзе твар» і ў што б такое прыбрацца, а там ужо вынайшлі цудоўнае люстэрка, у якое зірнуў і суцешыўся (бо на ім напісана мудрае «Іншыя не лепшыя!»). Вы толькі зайшлі ў аптэку, убачылі цэны на лекі і тут жа выйшлі? Аўцюкі ж пасля гэтага завіталі ў краму «Рытуальныя паслугі», убачылі цэны там і вярнуліся назад... у аптэку. Вы яшчэ думаеце, ці трэба мераць сем разоў, калі будзеш рэзаць праўду-матку, а там...

Там (і ўжо даўно) напісалі правілы для аўцюкоўскіх гасцей. Паводле гэтага дакумента, усе госці (колькасць насельніцтва падчас фестывалю павялічваецца прыкладна ў тры разы) маюць права свабодна швэндацца па аўцюкоўскіх вуліцах, дыхаць гаючым аўцюкоўскім паветрам, быць аблічанымі і абважанымі ў аўцюкоўскіх крамах.

Яны, тыя ж госці, абавязаны потым не раз наведваць Аўцюкі, нават калі ім гэтага не хочацца, лічыць аўцюкоўцаў самародкамі і ўслаўляць іх паўсюль, дзе толькі можна...

Гэтым, апошнім пунктам з правілаў з найбольшай прыемнасцю кіруецца бацька-заснавальнік фестывалю народнага гумару, пісьменнік Уладзімір Ліпскі, а таксама шмат хто з каманды аднадумцаў. У прыватнасці, гасцямі папярэдніх фестываляў у Аўцюках былі слынныя Ніл Гілевіч, Генадзь Бураўкін, Алесь Петрашкевіч, Мікола Чарняўскі, Віктар Казько, Анатоль Кудравец, Генадзь Аўсяннікаў, Міхась Дрынеўскі і многія, многія іншыя.

Аб тым, хто прыехаў гэтым разам, і што там было — у наступных нумарах «Звязды».

Валянціна Доўнар

Фота Васіля МІНІНА

Загаловак у газеце: «Без аўцюкоў, як цень — хадзіў у вечнай скрусе...»

Выбар рэдакцыі

Грамадства

Што паглядзець у Хоцімску?

Што паглядзець у Хоцімску?

У Хоцімску нават ёсць кола агляду.

Грамадства

«За больш чым сем год былі ўсяго адны суткі без баявога выезду»

«За больш чым сем год былі ўсяго адны суткі без баявога выезду»

Гісторыя кар'еры падпалкоўніка ў адстаўцы Генадзя Цімахоўцава.

Палітыка

Беларусь і ЕС падпішуць візавае пагадненне не пазней за 2 лютага 2020 года

Беларусь і ЕС падпішуць візавае пагадненне не пазней за 2 лютага 2020 года

Верагодна, гэта адбудзецца ўжо ў гэтым лістападзе. 

Грамадства

Як праходзіў ваенна-гістарычны фестываль «Мір-1812»

Як праходзіў ваенна-гістарычны фестываль «Мір-1812»

Трэці раз ваенна-гістарычны фестываль «Мір-1812» на два дні перанёс пасёлак больш чым на два стагоддзі назад.