Лёгка выбіраць універсітэт для паступлення, калі дакладна ведаеш прахадны бал. Увесь тыдзень абітурыенты і іх бацькі маглі сачыць анлайн за ходам прыёмнай кампаніі. У чацвер пасля 15.00 сайты ВНУ перасталі абнаўляць інфармацыю. Як змяняўся конкурс на факультэтах, заставалася толькі гадаць. Што многія і рабілі. У апошнія гадзіны, калі можна было падаць дакументы на бюджэтную форму навучання, бацькі, адпрасіўшыся з працы, хваляваліся ў калідорах універсітэтаў, выпускнікі з невысокімі баламі за ЦТ верылі ў цуд, а члены камісіі клапатліва падказвалі, дзе яшчэ засталіся свабодныя месцы. Мы ж дзяжурылі ў БНТУ, у сценах якога ад натоўпаў сем'яў абітурыентаў і шалёнага напружання было вельмі горача.
Эпіцэнтр падзей
Побач з галоўным корпусам універсітэта ўсе лаўкі занятыя. Яшчэ колькі сем'яў дзяжураць ля ўваходу: чарговы раз ацэньваюць шанцы свайго дзіцяці і прымаюць рашэнне аб будучым месцы вучобы. Цяпер ужо канчаткова. Але большасць прыехала ў эпіцэнтр абітурыенцкіх падзей проста адсочваць сітуацыю.
— Мы падалі дакументы адразу ж, у першы дзень, на энергетычны факультэт, — расказвае мама Галіна з Бабруйска, якая тут разам з сынам. — Думаю, паступіць на бюджэт. У сына 250 балаў, і на спецыяльнасці, якую ён выбраў, — «Прамысловая цеплаэнергетыка» — яшчэ ёсць месцы. Чаму такую прафесію? Гэта запатрабавана.
На прыступках заўважаем вясёлую кампанію. Усе трое — са Слоніма.
— Ужо аднеслі дакументы? — цікавімся ў нядаўніх школьнікаў.
— Не. Да пяці гадзін пачакаю, а потым вырашу, — прызнаецца Лёша. — Або ў БНТУ, або ў «наргас» пайду.
— А з баламі што?
— Так сабе. На рэпетыцыйным тэсціраванні было больш — 263 разам з атэстатам. А тут хоп — і 182 толькі.
Як вызначыць, які конкурс на факультэтах, калі інфармацыя на стэндах больш не абнаўляецца, Лёша ўжо прыдумаў. Паходзіць па аўдыторыях, паглядзіць, куды іншыя абітурыенты бягуць, і выбера.
У яго прыяцелькі Каці сітуацыя тая ж. Дзяўчына здавала тэсты па матэматыцы, рускай і англійскай мовах, збіраецца на эканоміку. Ваня, яе брат-блізнюк, сядзіць пад універсітэтам за кампанію. Сам ён з выбарам вызначыўся яшчэ ў сераду і спадзяецца, што 187 балаў хопіць, каб вывучаць масты і транспартныя тунэлі.
Сямейны ўніверсітэт
— Колькі ў вас балаў? 270? Вы пройдзеце, хвалявацца не варта, — супакойвае нечых бацькоў другакурснік Станіслаў Зайчанка.
Ён дапамагае прыёмнай камісіі факультэта інфармацыйных тэхналогій і робататэхнікі, дзе сам вучыцца. Дзяжурыць ля інфармацыйнага стэнда і кансультуе абітурыентаў і іх родных. «Пытанні стандартныя. Чым спецыяльнасці адрозніваюцца, якія будуць прахадныя балы... Тым, хто з баламі 170, тлумачу, што сюды на бюджэт трапіць няма шанцаў».
Чарга ў аўдыторыю, дзе прымаюць заявы ад будучых праграмістаў, велізарная. Але, па словах Стаса, дакументы з факультэта мала хто забірае.
Пад дзвярыма прыёмнай камісіі факультэта маркетынгу, менеджменту і прадпрымальніцтва разгаварыліся з абітурыентам Паўлам. Ён адзін з тых, хто перадумаў у апошні момант. Спачатку падаў дакументы ў БДТУ, але сёння зноў прымчаў у сталіцу з Ліды, каб перакінуць заяву ў іншы ўніверсітэт. «Тут спецыяльнасць больш падабаецца — «Гандлёвае абсталяванне і тэхналогіі». Хочацца з рэкламай працаваць. І па балах больш упэўнены». Са сваімі 193-ма баламі Паша лёгка абганяе ў рэйтынгу дванаццаць чалавек, якія прэтэндуюць на тую ж спецыяльнасць.
Бацькі Ігар і Наталля перажываюць за дачку. Заяву на факультэт яна даўно падала, але яны не ўпэўнены, што трапіць у лік бюджэтнікаў. Таму і дзяжураць тут. Пакуль іх Каця на спецыяльнасць «Кіраванне інавацыйнымі праектамі прамысловых прадпрыемстваў» праходзіць з запасам.
— Гэта табліца нічога не адлюстроўвае! У тры гадзіны ў кабінеце было чатыры абітурыенты, а іх сюды не ўпісалі, — раіць не давяраць бягучаму рэйтынгу адна з жанчын.
Ігар і Наталля смяюцца: канкурэнтаў не прапусцім у аўдыторыю. Сям'я жыве ў Гродне, але, хоць у мясцовым універсітэце ёсць падобная спецыяльнасць, выбар зрабілі на карысць БНТУ.
— Мы самі вучыліся ў гэтым універсітэце. Тут і пазнаёміліся, — настальгуе Ігар.
Не трэба істэрык
— Будаўнікоў цяпер — процьма! Дзяваць няма куды, — не разумее, навошта ісці на будаўнічы факультэт, адна з дам. А мы тым часам размаўляем з абітурыентамі, якія палічылі, што спецыялісты ў гэтай галіне з «вышкай» лішнімі не будуць.
Аня з Баранавіч прыехала паступаць у апошні дзень не таму, што заваліла ЦТ. Яе 297 балаў з улікам атэстату — добры вынік. Проста вучыцца дзяўчына планавала ў іншай ВНУ — Камандна-інжынерным інстытуце МНС. Для яе прыёмная кампанія пачалася яшчэ ў сакавіку. Аня праходзіла паглыбленае медыцынскае абследаванне, псіхалагічнае тэсціраванне, здавала нарматывы па фізпадрыхтоўцы. Нацэлілася на спецыяльнасць «Пажарная і прамысловая бяспека». Але там не засталося бюджэтных месцаў — амаль усе занялі хлопцы і дзяўчаты, якія праходзяць па-за конкурсам. Тады Аня ацаніла свае шанцы і вырашыла звязаць будучыню з экспертызай і кіраваннем нерухомасцю.
У апошні дзень падачы дакументаў на бюджэт абіту-
рыентаў заўсёды шмат, заў-
важае намеснік адказнага
сакратара прыёмнай камісіі БНТУ Андрэй ДЗЕРБАН. Калі ў сераду заявы прынеслі 900 чалавек, то ў чацвер — паўтары тысячы.
— Прахадныя балы ў апошнія гадзіны могуць змяніцца на працэнтаў 25-30, — дзеліцца назіраннямі Андрэй Мікалаевіч. — Але не трэба ўпадаць у істэрыку. Часам некаторыя абітурыенты з высокімі баламі пачынаюць сумнявацца ў сваіх шанцах, забіраюць дакументы, і ў выніку на факультэт залічаюць тых, хто набраў толькі сто з нечым балаў.
Што да спецыяльнасцяў, на якія конкурс стабільна вялікі, то гэта прафесіі эканамічнага блока, ІТ-галіны, энергетыкі. А самы высокі прахадны бал летась быў на напрамках «Бізнес-адміністраванне» (347), «Мытная справа» і «Кіраванне інавацыйнымі праектамі прамысловых прадпрыемстваў» (па 329).
Наталля ЛУБНЕЎСКАЯ
Фота аўтара
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.