Вы тут

У Салігорску будуецца ўнікальны цэнтр для дашкольнікаў


Самы вялікі на Міншчыне дашкольны цэнтр развіцця дзіцяці ў хуткім часе з'явіцца ў Салігорску. Установа ўзводзіцца на сродкі ААТ «Беларуськалій».


— Ужо пабудавана каробка, накрыты дах, выкананы электрамантажныя, сантэхнічныя работы, — уводзіць у курс справы начальнік будаўнічага ўпраўлення №123 ААТ «Будтрэст №3 ордэна Кастрычніцкай рэвалюцыі» Дзмітрый Картуз. — Будаўніцтва ідзе хуткімі тэмпамі: пачалося ў снежні мінулага года. Усе намаганні накіраваны на тое, каб здаць аб'ект у жніўні сёлета. Цяпер тут працуе больш як 400 чалавек.

Паралельна вядуцца добраўпарадкаванне тэрыторыі, азеляненне, вакол пасеяна трава. «Думаю, да адкрыцця паспеем зрабіць пару ўкосаў», — жартуе Дзмітрый Міхайлавіч.

Дзіцячы сад будуецца па індывідуальным праекце, распрацаваным інстытутам «Брэстпраект», з якім у акцыянернага таварыства склаліся дзелавыя стасункі. Па-першае, кошт паслуг абыходзіцца ў разы танней, чым у іншых аналагічных арганізацыях. Па-другое, тут да справы падыходзяць творча, заўсёды знаходзяць цікавыя архітэктурныя рашэнні. Дзіцячы цэнтр уяўляе сабой тры злучаныя паміж сабой карпусы, упрыгожаныя невялікімі вежамі, і нагадвае казачны церамок.

Кошт аб'екта 84 млрд рублёў. Напачатку яго планавалася пабудаваць за 14 месяцаў, затым вырашылі ўзвесці за 8,5 месяца. «Гэта будзе наш падарунак малым і іх бацькам да прафесійнага свята — Дня шахцёра, які адзначаецца 27 жніўня», — кажа намеснік генеральнага дырэктара па капітальным будаўніцтве ААТ «Беларуськалій» Іван Ждановіч.

Загадчыца дашкольнага цэнтра развіцця дзіцяці «Планета дзяцінства ААТ «Беларуськалій» г. Салігорска Іна Маршыцкая не ўтойвае сваіх эмоцый і радасці:

— Наш цэнтр разлічаны на 330 дзяцей. У ім адначасова размесціцца 17 груп. Ён адрозніваецца ад тыпавых дзіцячых дашкольных устаноў. Тут прадугледжаны інтэрактыўны пакой, легацэнтр, гульнявыя пакоі з лабірынтамі для дзяцей ад 1 года да 3-х і ад 3 гадоў да 7-мі. Задума галоўнага архітэктара праекта — зона рэкрэацыі ў 150 кв. метраў са сцэнай, прызначаная для сумесных мерапрыемстваў бацькоў і дзяцей, свят, «агеньчыкаў», ранішнікаў, творчых сустрэч. Яшчэ адна цікавінка — на падлозе шахматная дошка і шахматы ў рост дзіцяці. Тут будуць таксама створаны спецыяльныя ўмовы для дзяцей з асаблівасцямі псіхафізічнага развіцця, цяжкімі парушэннямі мовы. З імі будуць працаваць лагапеды, дэфектолагі. Практычна ўжо сфарміраваны штат супрацоўнікаў. З 1 жніўня да нас прыязджаюць маладыя спецыялісты, якіх мы адабралі на размеркаванні ў Дзяржаўным педагагічным універсітэце імя Максіма Танка. Гэта ініцыятыўныя дзяўчаты і хлопцы з цікавымі ідэямі, метадамі, якія яны прыўнясуць у работу ўстановы.

Дашкольны цэнтр размясціўся ў 17-м мікрараёне Салігорска, дзе пражывае практычна палова работнікаў флагмана айчыннай вытворчасці. Менавіта іх дзеці і будуць наведваць установу. Гэта вельмі зручна для бацькоў: не трэба рана будзіць выхаванца, каб адвезці ў сад і паспець на працу. Усё побач, пад бокам. Тым больш што на «Беларуськаліі» работа арганізавана ў тры змены.

— Клопат аб работніках і іх дзецях у нас на першым плане, — канстатуе Іван Ждановіч. — Летась у новы арэндны дом засялілі сем'і, якія стаялі на чарзе на паляпшэнне жыллёвых умоў на прадпрыемстве. Сёлета ў канцы мая да Дня хіміка здалі яшчэ адзін 160-кватэрны шматпавярховік. Абодва знаходзяцца побач з дзіцячым цэнтрам.

Акрамя таго, у падпарадкаванні прадпрыемства — санаторый «Бярозка», які, так бы мовіць, зжыў сябе фізічна і маральна. Замест яго ўзводзіцца новая здраўніца найвышэйшага класа па абслугоўванні і камфорце.

— Нашы людзі добра працуюць. Яны заслужылі таго, каб і добра адпачываць, — рэзюмаваў Іван Ждановіч.

З ходам будаўніцтва дзіцячага цэнтра азнаёміўся старшыня Палаты прадстаўнікоў Нацыянальнага сходу Беларусі Міхаіл Мясніковіч падчас рабочай паездкі ў Салігорск. Міхаіл Уладзіміравіч адзначыў, што Салігорск атрымае ўнікальную дашкольную ўстанову з цудоўнымі ўмовамі. І галоўнае — тут будзе ўдзяляцца вялікая ўвага ўсебаковаму развіццю дзяцей. «На V Усебеларускім народным сходзе ішла размова аб адукацыі праз усё жыццё, — адзначыў Міхаіл Мясніковіч. — Упэўнены, што гэты цэнтр дазволіць закласці добры падмурак для далейшай адукацыі яго выхаванцаў».

Таццяна ЛАЗОЎСКАЯ

lazovskaya@zviazda.by

Фота БЕЛТА

Загаловак у газеце: Нібы казачны церамок

Выбар рэдакцыі

Грамадства

Як сучасныя палешукі рыхтуюцца да свята Уваскрэсення Хрыстовага

Як сучасныя палешукі рыхтуюцца да свята Уваскрэсення Хрыстовага

Аўтар «Звязды» расказвае на прыкладзе сваёй сям'і.

Культура

ЗЕНА: Ад сцэны не стамляюся!

ЗЕНА: Ад сцэны не стамляюся!

Графік у артысткі вельмі насычаны.

Грамадства

Звыклыя выключнасці. Ці можна зразумець «лічбавае племя»?

Звыклыя выключнасці. Ці можна зразумець «лічбавае племя»?

Даследаванне «Пакаленне «Z» у пытаннях і адказах» было прадстаўлена падчас навуковага стэндапа, арганізаванага для навучэнцаў профільных педагагічных класаў у БДПУ.

Грамадства

Ежа ці сімвал? Самы час зацікавіцца роспісам яек

Ежа ці сімвал? Самы час зацікавіцца роспісам яек

Карэспандэнт «Звязды» схадзіла на майстар-клас па стварэнні «пісанак».