Правільнае харчаванне пры язве

Калі пасля прыёму ежы ўверсе жывата з'яўляецца боль, непакояць пякотка, адрыжка, цяжар, млосць, ваніты, дый нават калі нічога такога няма, а вам за 40, трэба абследаваць страўнік і дванаццаціперсную кішку.

Раптам выявіцца Helіcobacter pylorі (хелікабактар пілары)? Гэтыя бактэрыі выпрацоўваюць шкодныя для слізістай ферменты і таксіны. У выніку можа ўзнікнуць запаленне, а пасля і ўтварэнне язваў, вядомых сваімі цяжкімі ўскладненнямі.

— Не спрабуйце лячыць язвавую хваробу самастойна, — падкрэслівае намеснік галоўнага ўрача па медыцынскай частцы 2-й цэнтральнай раённай паліклінікі г. Мінска Крысціна МІХАЛЁНАК-ВАРАНЕЦКАЯ. — Толькі пад наглядам урача неабходна спачатку поўнасцю вынішчыць бактэрыі, а пасля зажывіць дэфект слізістай. Для выдалення Helіcobacter pylorі прымяняюцца прэпараты групы інгібітараў пратоннай помпы — для зніжэння выпрацоўкі салянай кіслаты клеткамі страўніка, а таксама два віды антыбіётыкаў. Пры адсутнасці бактэрыі для падтрымання аптымальнага рН у страўніку і хутчэйшага зажыўлення язваў прапісваюцца толькі інгібітары пратоннай помпы. Не забывайце пры гэтым правільна харчавацца...

• Не ўжывайце надта халодную і надта гарачую ежу.
• Абмяжуйце соль.
• Сачыце за разнастайнасцю (бялкі, тлушчы, вугляводы, мінеральныя солі, вітаміны).
• Ешце часта, але пакрысе (праз 3-4 гадзіны).
• Апошні прыём ежы — шклянка малака перад сном.

Рэкамендуецца:

• хлеб белы пшанічны ўчарашняй выпечкі, сухары, бісквіт, няздобнае пячэнне;
• супы ненаварыстыя, з крупаў, гародніны, малочныя, супы-пюрэ;
• малочныя прадукты: малако цэльнае, згушчанае, тварог, нятлустая смятана, нявостры сыр;
• яйкі ўсмятку, паравыя амлеты;
• мяса і рыба нятлустыя, адвараныя і на пары (катлеты, суфле, фрыкадэлькі);
• гародніна вараная;
• фрукты мяккія, салодкія, вараныя, працёртыя або запечаныя;
• масла і алеі;
• ягады, адвар шыпшыны, нямоцны чай, мінеральная вада без газу, кісель, кампот.

Не рэкамендуецца: наварыстыя супы, смажанае, вострае, салёнае, кансерваванае, квашанае і марынаванае, таматы, гарох, фасоля, цытрусавыя, здоба, чорны хлеб, алкаголь, кіслы сок, газіраваная вада.

Святлана БАРЫСЕНКА