Вы тут

Алімпійскія Гульні-2016 завяршыліся ў Бразіліі


Маляўнічая цырымонія закрыцця адбылася на легендарным стадыёне «Маракана». Святочнага карнавальнага настрою не сапсаваў нават праліўны дождж, які суправаджаў мерапрыемства.


Мінулі два тыдні напружанай спартыўнай барацьбы тысяч атлетаў, і вось у нядзельны вечар спартсмены і трэнеры маглі выдыхнуць і расслабіцца — усе медалі ўжо раздадзеныя. На цырымоніі закрыцця прысутнічалі каля 80 тысяч чалавек. Спачатку ўсе ўдзельнікі Гульняў прайшлі шэсцем (сцяганосцам нашай зборнай быў Іван Ціхан, сярэбраны прызёр Алімпіяды-2016), а затым пачалося маляўнічае шоу. Сцэна на стадыёне «Маракана» расцвіла дзіўнымі кветкамі, з якіх склаліся спачатку галоўныя славутасці Рыа-дэ-Жанэйра, уключаючы гару Каркавада, увянчаную статуяй Хрыста, а затым алімпійскія кольцы. Цырымонія закрыцця, як і мае быць у Бразіліі, была падобная да бясконцага карнавалу, прычым не толькі на сцэне, але і за кулісамі.

У завяршэнні на стадыёне пагасілі алімпійскі агонь, які гарэў на працягу ўсіх 16 дзён спаборніцтваў, а сцяг Міжнароднага алімпійскага камітэта быў афіцыйна перададзены Токіа, дзе пройдуць наступныя Алімпійскія гульні 2020 года.

Апошні акорд

У заключныя дні Алімпіяды нашы атлеты дабавілі ў скарбонку зборнай яшчэ тры ўзнагароды. Сярэбраным прызёрам стаў вопытны беларускі легкаатлет Іван Ціхан. У сваёй найлепшай спробе ён паслаў молат на 77 м 79 см. Перасягнуць Івана змог толькі Дылшад Назараў з Таджыкістана, вынік чэмпіёна — 78 м 68 см.

— Сярэбраны медаль Рыа ў мяне, можна сказаць, з залатым адлівам. Заўзятары, якія ўважліва сачылі за маёй гісторыяй з адлучэннем ад удзелу ў турнірах, выдатна разумеюць, чаму я даў такую ацэнку свайму выступленню. Пройдзены вялікі шлях. Пасля Пекіна ў 2008 годзе, здавалася, я ўжо шмат чаго дамогся, але памыляўся. Давялося пачынаць сваю кар'еру наноў, — сказаў Ціхан. — У апошняй спробе шукаў у сабе сілы і магчымасці пераадолець адзнаку ў 80 м. Усё ж такі гэта гросмайстарскія лічбы сярод кідальнікаў. Я змагаўся да канца, хацелася паказаць больш высокі вынік, — дадаў Іван.

Беларускі экіпаж байдаркі-чацвёркі заваяваў «бронзу» алімпійскай рэгаты. У фінальным заездзе на дыстанцыі 500 м Маргарыта Махнева, Надзея Ляпешка, Вольга Худзенка і Марына Літвінчук паказалі вынік 1 хв. 36,908 сек.

— Для мяне гэты медаль вельмі каштоўны, таму што ён алімпійскі, — адзначыла кармавая вяслярка Маргарыта Махнева. — Хоць, што душой крывіць, усе дзяўчаты настройваліся на перамогу. Але паколькі алімпійская ўзнагарода ў мяне першая, то я бязмерна шчаслівая. Упэўнена, што і ў маіх напарніц такое ж меркаванне.

Нагадаем, да гэтага поспеху беларускія весляры на алімпійскім канале «Лагуна» не заваявалі ніводнай узнагароды.

Барэц вольнага стылю Ібрагім Саідаў стаў бронзавым прызёрам у вагавой катэгорыі да 125 кг. Адзначым, што ўпершыню з 1996 года прадстаўнікі Беларусі на Алімпійскіх гульнях заваявалі тры ўзнагароды ў барцоўскім турніры. У Рыа акрамя Ібрагіма Саідава медалістамі таксама сталі барэц грэка-рымскага стылю Джавід Гамзатаў, які выйграў «бронзу» ў вагавой катэгорыі да 85 кг, і Марыя Мамашук, на рахунку якой «серабро» ў спаборніцтвах жанчын у вагавой катэгорыі да 63 кг.

На жаль, упершыню за доўгія гады па-за п'едэсталам засталіся беларускія грацыі. Галоўная надзея нашай каманды Меліціна Станюта заняла толькі 5-е месца, другі нумар зборнай, Кацярына Галкіна, размясцілася на 6-й выніковай пазіцыі. Не змаглі заваяваць медалі беларускія дзяўчаты і ў групавым практыкаванні (5-е месца).

Яшчэ адна прэтэндэнтка на ўзнагароды Марына Арзамасава не здолела дацягнуцца да п'едэстала, у фінальным забегу на 800 м яна была толькі 7-й.

У выніку беларуская зборная заняла 40-е месца ў агульным медальным заліку, на рахунку нашых спартсменаў 9 алімпійскіх узнагарод.

Трыумф гаспадароў

У апошнія дні Алімпіяды завяршыліся спаборніцтвы ў гульнявых алімпійскіх турнірах. Мужчынскія зборныя Бразіліі па валейболе і футболе заваявалі алімпійскія тытулы. Найлепшымі ў гандбольным турніры ўпершыню сталі датчане, якія ў фінальным паядынку абгулялі зборную Францыі. Алімпійскім чэмпіёнам па баскетболе стала зборная ЗША.

Жаночая каманда Расіі па гандболе выйграла алімпійскі турнір у Бразіліі, у фінале расіянкі былі мацнейшымі за францужанак. Наймацнейшымі сярод баскетбалістак сталі спартсменкі з ЗША, у валейбольным турніры перамагла зборная Кітая.

Дар'я Лабажэвіч

lobazhevich@zviazda.by

Загаловак у газеце: Пагас алімпійскі агонь

Выбар рэдакцыі

Культура

Як  мастак Май Данцыг ствараў свае карціны

Як мастак Май Данцыг ствараў свае карціны

Наватар, «шасцідзясятнік», ваяўнічы аптыміст — гэта ўсё пра яго.

Грамадства

Як ператварыць звычайны ўрок беларускай літаратуры у творчую майстэрню?

Як ператварыць звычайны ўрок беларускай літаратуры у творчую майстэрню?

Настаўнікі ўпэўнены: ці будуць вучні чытаць, у многім залежыць ад іх саміх. 

Эканоміка

Петришенко: Называть ЕАЭС экономическим союзом сегодня можно только авансом

Петришенко: Называть ЕАЭС экономическим союзом сегодня можно только авансом

Однако наша страна надеется, что это временные трудности.

Грамадства

Апублікаваны поўны тэкст Канцэпцыі інфармацыйнай бяспекі Беларусі

Апублікаваны поўны тэкст Канцэпцыі інфармацыйнай бяспекі Беларусі

Дзяржаўным органам і іншым арганізацыям даручана кіравацца палажэннямі канцэпцыі ў практычнай дзейнасці.