Спецыялісты падлічылі, што летась нашы суайчыннікі з грашыма пабывалі ў 115 краінах свету. Сярод самых папулярных — Расія і Вялікабрытанія, але сустракаюцца і экзатычныя напрамкі, накшталт Каба-Вердэ, Сінгапура і Макаа. Пра гэта нам паведамілі ў адным з беларускіх банкаў, дзе спасылаюцца на маркетынгавае даследаванне замежных транзакцый з выкарыстаннем прэміум-картак (Gold, Platіnum, Іnfіnіte).
Увогуле, нашы людзі ў апошнія гады сталі значна часцей плаціць банкаўскімі карткамі як унутры краіны, так і за мяжой. Уладальнікі прэміяльных картак трапілі ў лік самых актыўных прыхільнікаў безнаяўных плацяжоў. Напрыклад, эксперты аднаго з банкаў сабралі інфармацыю пра тое, у якіх краінах за мінулы год ажыццяўляліся транзакцыі з дапамогай прэміум-картак.
Ад Расіі да Латвіі
Самай папулярнай краінай для мясцовых багацеяў прадказальна апынулася Расія — на яе прыходзіцца пятая частка ўсіх транзакцый уладальнікаў «голдавых» картак. Другое месца займае Вялікабрытанія, у якой праходзіць 15% замежных аперацый з удзелам беларускіх прэміум-картак. На трэцім месцы — Польшча з 10% замежных транзакцый.
У топ-5 самых-самых краін таксама ўвайшлі Літва і ЗША. Акрамя таго, забяспечаныя беларусы часта карыстаюцца прэміум-карткамі ў Люксембургу. Папулярнымі напрамкамі для падарожжаў з'яўляюцца таксама Італія і Іспанія. За імі ідзе Украіна, а апошняе месца ў першай дзесятцы заняла Латвія.
Кітай, Бразілія і Барбадас
І хоць часцей за ўсё беларусы расплачваюцца прэміум-карткамі ў Еўропе, наведваюць яны і азіяцкія краіны, у тым ліку ААЭ, Казахстан, Кітай і Індыю. Значна радзей нашы заможныя землякі падарожнічаюць па Афрыцы (Егіпет не ўвайшоў нават у 30-ку), нячаста іх сустрэнеш і ў краінах Паўднёвай Амерыкі, дзе нашым людзям больш за ўсё імпануе Бразілія. Сярод экзатычных краін спецыялісты адзначаюць Каба-Вердэ, Макаа, Сінгапур, Кубу і Ямайку. Беларусаў з дастаткам таксама прыцягваюць карлікавыя дзяржавы, у тым ліку Ватыкан, Манака, Андора, Ліхтэнштэйн, Маўрыкій і Барбадас.
Без наяўных, увогуле
«Геаграфія падарожжаў уладальнікаў «залатых» картак вельмі шырокая — ад Бразіліі да Нарвегіі. Паказальна, што ў спісе самых папулярных краін апынуліся няблізкія нам па адлегласці Вялікабрытанія, ЗША і Люксембург, — адзначае куратар партнёрскай праграмы Golden Alfa Анастасія Пятровіч. — Пры гэтым колькасць замежных транзакцый пастаянна расце, бо людзі аддаюць перавагу браць у паездку картку і не рызыкаваць вялікай сумай папяровых грошай. Акрамя таго, трымальнік прэміяльнай карткі мае шэраг пераваг. Прыярытэтны доступ у VІP-залы аэрапортаў, асабісты кансьерж-сэрвіс, медыцынская і юрыдычная падтрымка дазваляюць адчуваць сябе больш упэўнена нават у самым экзатычным падарожжы».
Таксама банкаўскія аналітыкі паведамляюць пра тое, з якімі запытамі часцей за ўсё звяртаюцца ў кансьерж-службу. Высветлілася, што часта ўладальнікі прэміум-картак просяць забраніраваць нумар у гатэлі, замовіць білет на самалёт і дапамагчы ўзяць напракат аўтамабіль за мяжой. Сярод незвычайных просьбаў — зняць апартаменты ў французскім замку, выбраць пінжак, знайсці ўрача ўначы або разбудзіць раніцай.
Сяргей КУРКАЧ
Мерапрыемства праводзіцца на добраахвотнай аснове.
Не выявіць ні секунды абыякавасці.
