03 снежня, чацвер

Вы тут

У Дзень горада жыхароў Мінска чакае паўмарафон


Многія памятаюць, якім маштабным ён быў летась, калі сабраў каля 20 тысяч удзельнікаў! А што цікавага, незвычайнага чакаць бегунам і гледачам ад забегу сёлета? Аб гэтым мы і пагутарылі з Аляксандрам Бут-Гусаімам, генеральным сакратаром Беларускай федэрацыі лёгкай атлетыкі.


— Адчуваецца, што людзі ў нашай краіне пачынаюць даволі актыўна бегаць, — кажа спадар Аляксандр. — Яшчэ гадоў пяць таму ўбачыць чалавека, які бегае ў парку, было рэдкасцю. Многія лічылі яго за дзівака. А цяпер усё мяняецца. Людзі не саромеюцца, займаюцца здаровым ладам жыцця. Дзякуючы гэтаму ў нас пашыраецца каляндар спаборніцтваў, з'яўляюцца новыя бегавыя клубы. І мы разлічваем, што на старт мінскага паўмарафону выйдзе прыблізна 20 тысяч чалавек. На 18 жніўня на дыстанцыю ў 21 кіламетр ужо зарэгістравалася больш за 2 тысячы чалавек, на 10 — больш чым 1,2 тысячы ўдзельнікаў. Колькасць зарэгістраваных на пяць кіламетраў назваць пакуль складана, але мы плануем, што гэтую адлегласць прабягуць звыш 14 тысяч чалавек. І гэта яшчэ не канчатковыя лічбы. Многія пакідаюць рэгістрацыю на апошні момант. Кожны ўдзельнік, які фінішуе, атрымае памятны медаль. Акрамя таго мы правядзём асобную спартыўную праграму для дзетак.

— Ці шырокая геаграфія ўдзельнікаў сёлетняга паўмарафону?

— Пабягуць прадстаўнікі звыш 30 краін. Сярод іх будуць даволі моцныя замежныя спартсмены — з Кеніі, Эфіопіі, Украіны... Пабяжыць і Вольга Мазуронак, пераможца мінулага забегу. Нядаўна яна заняла пятае месца на Алімпійскіх гульнях і чарговы раз даказала, што з'яўляецца спартсменам высокага ўзроўню з сур'ёзнымі вынікамі. Плануецца, што пабягуць даволі моцныя Марына Даманцэвіч і Настасся Пузакова, Ніна Савіна... Мы ўжо маем шэсць заявак ад мужчын, чые вынікі лепшыя за леташнія. Напярэдадні паўмарафону мы абвесцім імёны элітных спартсменаў.

— Іх спрабуеце зацікавіць найперш матэрыяльна?

— Тры тысячы долараў за перамогу — гэта даволі сур'ёзныя грошы для паўмарафону. Спартсменам ёсць за што змагацца. Таму і маем заяўкі ад даволі моцных бегуноў, на якіх выходзілі праз менеджараў. Мы не зацікаўлены, каб у нас беглі выключна афрыканцы. Аднак, калі чалавек зарэгіструецца самастойна, ніхто не будзе перашкаджаць ягонаму ўдзелу. Але бегуны ўсё роўна павінны прадстаўляць розныя краіны. У наступным годзе мы плануем падаць заяўку ў Міжнародную федэрацыю лёгкай атлетыкі на атрыманне нашым паўмарафонам прэстыжнага бронзавага статусу. І ўдзел вядомых спартсменаў на прыняцце падобнага рашэння таксама можа паўплываць. Мы павінны быць прадстаўлены на бронзавы ўзровень спартсменамі з эліты з розных краін.

— Калі не памыляюся, якасць мінскай трасы ўжо прынята на міжнародным узроўні.

— Так, наша траса прайшла сертыфікацыю ў 2005 годзе і атрымала сертыфікат ІAAF- AІMS (Міжнароднай федэрацыі лёгкай атлетыкі і Асацыяцыі міжнародных марафонаў і прабегаў. — Аўт.). І калі ў Мінску ўстановяць рэкорд, гэта толькі пойдзе на карысць нашаму паўмарафону. Людзі зразумеюць, што траса даволі хуткая і на ёй можна добра прабегчы. І я, як удзельнік многіх паўмарафонаў і марафонаў, пацвярджаю яе добры ўзровень.

— Пытанні з медыцынскай дапамогай і аховай правапарадку ўжо вырашылі?

— Так. Рух будзе абмежаваны на ўсёй адлегласці трасы падчас забегу. Плануем, што яго перакрыюць за гадзіну да пачатку спаборніцтваў. На трасе запрацуюць чатыры пункты аказання медыцынскай дапамогі. Валанцёры — навучэнцы медыцынскага каледжа — будуць перамяшчацца на веласіпедах і сачыць за станам здароўя ўдзельнікаў. Абавязкова арганізуем і пункты харчавання. Бегунам плануем прадаставіць бананы і пітную ваду. Пасля фінішу ўсім удзельнікам зробяць масаж ног. Будуць працаваць душавыя кабінкі.

— Якія «фішкі» рыхтуеце для ўдзельнікаў і гледачоў?

— Безумоўна, зладзім канцэртную праграму, адбудзецца выстаўка прадукцыі нашых партнёраў... На вялікіх экранах каля Палаца спорту плануем правесці жывую трансляцыю паўмарафону. Уздоўж трасы падрыхтуюць спецыяльныя забаўляльныя пляцоўкі. Некаторыя з іх падчас леташняга паўмарафону карысталіся папулярнасцю. Напрыклад, каля цырка, дома-музея І з'езда РСДРП. Мы іх вырашылі пакінуць. Але раскрываць усе карты не буду. Лепш прабегчы і ўбачыць усё на свае вочы. Навінак сапраўды шмат.

 

Забег адбудзецца 4 верасня ў 11:00. Зарэгістравацца, падрабязна азнаёміцца з умовамі і аплаціць стартавы ўнёсак можна на сайце mіnskhalfmarathon.by Для школьнікаў, пенсіянераў удзел ў пяцікіламетровай дыстанцыі будзе бясплатным.

Тарас ШЧЫРЫ

Фота Надзеі БУЖАН

Загаловак у газеце: Сталіца «абуе» красоўкі

Выбар рэдакцыі

Грамадства

Ежа як лякарства. Што з'есці, каб стаць здаравейшым?

Ежа як лякарства. Што з'есці, каб стаць здаравейшым?

Мы вырашылі распытаць спецыяліста.  

Грамадства

Міністр ЖКГ Андрэй Хмель: Спажыўца паслугі трэба пачуць і зразумець

Міністр ЖКГ Андрэй Хмель: Спажыўца паслугі трэба пачуць і зразумець

Аб за­крыц­ці па­лі­го­наў, уплы­ве ка­ра­на­ві­ру­са, за­клі­ках да не­пла­ця­жу за ка­му­наль­ныя па­слу­гі і най­блі­жэй­шых перс­пек­ты­вах.

Грамадства

У Гродне завяршаецца першы этап рэстаўрацыi Старога замка

У Гродне завяршаецца першы этап рэстаўрацыi Старога замка

Стары замак нiколi не меў завершанага выгляду. Яго неаднаразова аднаўлялi i рэканструявалi, таму яго архiтэктура ўтрымлiвае ў сабе стылi некалькiх эпох.

Грамадства

Непаўналетнiя ў крымiнальным працэсе: практычныя нюансы

Непаўналетнiя ў крымiнальным працэсе: практычныя нюансы

Пра асаблiвасцi абароны правоў дзяцей-правапарушальнiкаў (затрыманне, прымяненне мер стрымлiвання, следчыя дзеяннi) расказалi эксперты падчас аднаго з вэбiнараў, якiя сумесна з Рэспублiканскай калегiяй адвакатаў Дзiцячы фонд ААН (ЮНIСЕФ) у Беларусi арганiзаваў яшчэ летам.