Вы тут

Беларускія прысмакі, якія дайшлi да Еўропы


Беларускія стравы тры гады таму былі ўнесены ў Спіс культурнай спадчыны Еўропы.


Усё больш упэўнена крочыць па планеце інтэрнацыянальная кухня, у любой краіне сёння вам прапануюць італьянскую піцу або французкія круасаны, турэцкую шаўрму ці кракаўскія каўбаскі. Пры гэтым вядомыя рэцэпты становяцца ўсё больш універсальнымі, губляюцца адметнасць і сапраўднасць скарыстаных прадуктаў. А многія мясцовыя стравы, што былі папулярнымі ўсяго некалькі дзясяткаў гадоў таму, захаваліся, у лепшым выпадку, як рэцэпты ў бабуліным нататніку. Каб змяніць сітуацыю, была арганізавана Еўрапейская сетка кулінарнай спадчыны. Гэта грамадская ініцыятыва, накіраваная на папулярызацыю нацыянальных кулінарных асаблівасцяў, традыцыйных рэцэптаў і страў, выкарыстанне мясцовых прадуктаў пры іх гатаванні. Сёння ў Еўрапейскай сетцы кулінарнай спадчыны прадстаўленыя ўжо больш за 1500 прыватных гатэляў, вясковых аграсядзібаў, нацыянальных рэстаранаў і кафэ з 32 еўрапейскіх рэгіёнаў, уключаючы Германію, Данію, Латвію, Літву, Нарвегію, Польшчу, Украіну і Швецыю. Ад Беларусі ініцыятыву першымі падтрымалі кулінары Віцебскай вобласці. І традыцыйныя стравы Беларускага Паазер’я сталі часткай Еўрапейскай сеткі кулінарнай спадчыны. Сярод рэцэптаў, якія ўнесены ў Спіс культурнай спадчыны Еўропы, тыповыя для беларускай кухні стравы з бульбы: запяканка «Сарока» (аграэкасядзіба «Запаведны востраў» Глыбоцкага раёна), «Бабка бульбяная з салам» (ад «Сядзібы Бабы Мароз» Міёрскага раёна), бульбяныя каўбаскі «Налівашкі» (аграсядзіба «Лука» Полацкага раёна), боршч летні «Бацвінне» (аграсядзіба «Родны кут» Глыбоцкага раёна), аладкі «Бурачковыя» (сядзіба «Фартуна» Верхнядзвінскага раёна).

Раім вам прыгатаваць гэтыя старадаўнія беларускія стравы!

Бабка з салам

Нацерці на дробнай тарцы бульбу, дабавіць у цеста яйкі, муку, цыбулю, соль і дробна нарэзанае сала – абавязкова з мясной праслойкай! Усё добра вымешаць. Запякаць у печы або духоўцы. Перад падачай бабку змазваюць зверху сметанковым маслам або густой смятанай. На Дзісненшчыне традыцыйна такую бульбяную бабку падаюць са свежым сметанковым маслам, змяшаным з тварожным сырам. Часам пры перамешванні масла і сыра ў страву дадаюць зеляніну: маладое пяро цыбулі, кроп, пятрушку, мяту.


Боршч «Бацвінне»

Звычайна бярэцца марынаванае бацвінне ад чырвоных буракоў. Калі гатаваць са свежага бацвіння, то абавязкова дабаўляецца трохі лімоннай кіслаты ці воцату. Традыцыйны булён варыцца на свіных падвэнджаных вушах (можна ўзяць хрыбетныя косткі). Затым у булён кладзецца кмін, бульба, морква, у канцы – зеляніна і варанае яйка. Пасля гэтага варыцца яшчэ з паўгадзіны. Да баршча гатуецца падліва: муку падсмажыць на дробна парэзаных салёных скварках, затым дабавіць смятану. Падліва падаецца на стол асобна – для запраўкі бацвіння. Вельмі старажытная страва з Глыбоччыны.


Бурачковыя аладкі

Адварыць сталовыя чырвоныя буракі (доўга, на працягу 1 гадзіны). Астудзіць, ачысціць ад лупіння і прапусціць праз мясарубку. Дабавіць пшанічную муку (4 ст. л. на 500 г цёртых буракоў), 2-3 яйкі, соль. Асобна падсмажыць цыбулю на алеі, усё добра перамяшаць. Бурачковыя аладкі пякуць толькі на сланечнікавым або рапсавым алеі. Падаюць гарачымі са смятанай, прастаквашай, сметанкова-тварожнай масай.


«Налівашкі»

Сырую бульбу нацерці на дробнай тарцы. Асобна заскварыць нутраное сала з цыбуляй. Змяшаць гэта з дранкай, дабавіць соль, прыправы і добра перамяшаць. Масу наліць у тоўстыя свіныя кішкі (якія папярэдне акуратна вычышчаюцца і вымочваюцца ў растворы солі). Кішку завязаць ніткай, «налівашка» павінна быць напоўнена дранкай, не напята. «Налівашкі» запякаюць у печы або духоўцы пры 180 градусах каля 1,5 гадзіны. Пры запяканні кішку пракалоць у 2-3 месцах іголкай. Падаваць са смятанай, прастаквашай, кіслай капустай ці агурком.


Запяканка «Сарока»

Бульбу нацерці буйна – на "бурачковай" тарцы. Адцадзіць, дабавіць яйкі, соль. Для начынкі ўзяць грыбны або мясны фарш, які папярэдне злёгку падтушыць з цыбуляй і прыправамі. Бульбяное цеста (2\3 часткі) выкласці на разагрэтую і добра памазаную алеем вялікую патэльню ці паднос з бляхі, палажыць фарш для начынкі, затым зверху закрыць пластом бульбянога цеста. Запякаць каля гадзіны ў духоўцы. Падаецца са смятанай, свежай зелянінай (цыбуля (пяро), пятрушка, кроп, можна агурок). Лёгкая ў прыгатаванні і вельмі смачная, пажыўная страва.

Друкуецца ў часопісе "Алеся"

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».