Каб абмеркаваць актуальныя пытанні кнігавыдання, кнігагандлю, падзяліцца вынікамі даследаванняў у галіне вывучэння кніжнай культуры і літаратуры, у Беларускім дзяржаўным тэхналагічным універстэце сабраліся вядучыя спецыялісты галіны з Беларусі і Украіны. Адметна, што ўдзел у форуме поруч з вядомымі навукоўцамі бяруць таксама вучні, настаўнікі, таму можам быць упэўненымі, што айчынная кніжная справа ў будучыні не застанецца ў забыцці.
БДТУ невыпадкова стаў установай, якая вось ужо другі год запар ладзіць «Скарынаўскія чытанні». Гэты ўніверсітэт — адзін з вядучых цэнтраў падрыхтоўкі спецыялістаў у галіне рэдакцыйна-выдавецкіх і паліграфічных тэхналогій у СНД. Яго паважаюць, на навуковыя здабыткі яго супрацоўнікаў арыентуюцца спецыялісты з многіх краін.
Падчас пленарнага пасяджэння рэктар БДТУ Ігар ВОЙТАЎ зазначыў:
— Гісторыя кнігадрукавання арганічна ўключана ў агульны культурна-гістарычны працэс. Кожная эпоха знаходзіць дакладнае адлюстраванне ў мастацтве стварэння кнігі, але і кніга ў пэўныя часы адыгрывала вядучую ролю ў фарміраванні новага стылю ў мастацтве. Развіццё кнігавыдання, клопат пра яго стан мае не толькі маральны сэнс, але і вялікае практычнае значэнне. Спадзяюся, што форум «Скарынаўскія чытанні», які ўжо становіцца штогадовым, зробіць свой важкі ўнёсак у пошук адказаў на пытанні пра шляхі развіцця сучаснай кнігі як феномена культуры, мастацтва і тэхналогіі.
Пра важнасць правядзення «Скарынаўскіх чытанняў» у сваім выступленні гаварыў і першы намеснік міністра інфармацыі Ігар ЛУЦКІ:
— Кнігавыданне — адзін з прыярытэтных напрамкаў нашай дзяржавы ў галіне культуры. Леташнія «Скарынаўскія чытанні» сталі прыкметнай з'явай у навуковым і культурным жыцці не толькі нашай сталіцы, але і далёка за яе межамі. Значнасць падобных мерапрыемстваў вызначаецца многімі фактарамі. Кніга — сапраўдны феномен у жыцці грамадства і кожнага чалавека. І вельмі важна, што падчас форуму закранаюцца розныя аспекты галіны, мы абмяркоўваем не толькі пытанні, звязаныя з мовай твораў, аўтарскім стылем, афармленнем, тыражамі, але і маркетынг, сістэму распаўсюджвання, сучасныя тэхналогіі і вытворчую базу кнігавыдання.
І сапраўды, падчас форуму яго ўдзельнікамі закранаюцца самыя разнастайныя пытанні, звязаныя з кнігай. Гэта і рукапісныя аўтарскія кнігі, і дзіцячая літаратура, і творчасць класікаў, і вузкатэхнічныя адметнасці паліграфічнай вытворчасці. Натуральна, не засталася без увагі і постаць нашага першадрукара. Аўтары дакладаў пра яго звярнулі ўвагу на вечныя каштоўнасці, якія паўстаюць у сувязі са згадкай пра Скарыну, а таксама паспрабавалі разгледзець яго асобу як пэўнага кшталту міф. Разважаюць удзельнікі форуму і пра адметнасці фарміравання культуры чытання, пра хатнія бібліятэкі і дзіцячую літаратуру як першую прыступку ў вялікі свет кнігі.
Марына ВЕСЯЛУХА
Канцэрт для дзяцей і моладзі, пластычны спектакль Ягора Дружыніна і «Рок-панарама».
Выбар саджанца для садавода — той момант, значнасць якога складана пераацаніць.
Актрыса НАДТ імя М. Горкага — пра шлях да сцэны і натхненне.
Тата і мама — два самыя важныя чалавекі ў жыцці кожнага дзіцяці.