Сталічных першакурснікаў запрашае квэст-гульня "Хагсмід"

Міжуніверсітэцкая квэст-гульня “Хагсмід” для першакурснікаў сталічных ВНУ адбудзецца 22 верасня ў парку імя М. Паўлава. Пачатак у 17.00.

Ініцыятарам мерапрыемства выступіў Студэнцкі гарадок БДУ. Правядзенне прыгодніцкага спаборніцтва скіравана на адаптацыю першакурснікаў да ўніверсітэцкага жыцця і арганізацыйнае забеспячэнне іх вольнага часу.

Удзельнікамі гульні стануць 20 каманд з БДУ, БДПУ ім. М.Танка, БДМУ, МДЛУ, БДУІР і БНТУ. У аснову квэста пакладзены сюжэт кніг пра Гары Потэра брытанскай пісьменніцы Джоан Роўлінг. Студэнтам трэба будзе прайсці 12 этапаў выпрабаванняў і прадэманстраваць логіку, інтэлектуальныя здольнасці, хуткасць і зладжаную камандную працу.

Збор гульцоў прызначаны ва ўнутраным дворыку інтэрната №11 БДУ (праспект Дзяржынскага, 87), паведамілі ў прэс-службе ўніверсітэта.

Дадатковая інфармацыя па тэлефонах: (033) 661 36 52, (029) 310 37 24, (017) 209-52-99 (Яўгенія Кашлей) або ў групе сацыяльнай сеткі “УКантакце” https://vk.com/coordination_bsu/.

Сяргей РАСОЛЬКА.