На Віцебшчыне кіраўнікі на месцах павінны дасягнуць канкрэтных паказчыкаў па развіцці прадпрымальніцтва. Аблвыканкам давёў адпаведнае заданне. У прыватнасці, па аб'ёме выручкі ад рэалізацыі прадукцыі і паслуг. Напрыклад, у Талачынскім раёне ён павінен перавышаць 84%, у Аршанскім — каля 46%, у Віцебскім раёне — больш за 38%. Для параўнання, у абласным цэнтры — 23%. Даведзены і планавыя заданні па колькасці суб'ектаў прадпрымальніцтва на 1 тысячу занятых у эканоміцы.
Разуменне ёсць
Што тычыцца падаткаў, дзякуючы суб'ектам малога і сярэдняга прадпрымальніцтва, бюджэт вобласці напаўняецца на чвэрць. У Віцебску — на ўзроўні 17—18%.
Развіццё малога і сярэдняга бізнесу на чарговым Усебеларускім народным сходзе вызначана адным з прыярытэтаў.
— Гэта паспрыяе рэалізацыі праграмы сацыяльна-эканамічнага развіцця краіны на 2016—2020 гады. Кіраўнік дзяржавы ў сваім выступленні падкрэсліваў, што органы ўлады ўсіх узроўняў абавязаны спрыяць падтрымцы дзелавой ініцыятывы, — нагадвае выканаўчы дырэктар грамадскай арганізацыі «Асацыяцыя наймальнікаў і прадпрымальнікаў» Ніна Лук'янава.
Яна падкрэсліла, што мясцовая ўлада канструктыўна супрацоўнічае са структурамі, якія садзейнічаюць прадпрымальнікам. Хай пакуль не так плённа, як магло б быць у ідэале, але разуменне ёсць. Менавіта недзяржаўны сектар эканомікі — гэта важнейшы інструмент і для самазанятасці, і для творчай рэалізацыі людзей.
Дарэчы, згаданая вышэй асацыяцыя выйграла конкурс малых грантаў амерыканскага міжнароднага прыватнага цэнтра прадпрымальніцтва. У верасні-лістападзе запланаваны «круглыя сталы» для бізнесменаў, па іх выніках вызначаць блокі праблем, рашэнне якіх у кампетэнцыі мясцовай улады і рэспубліканскіх органаў кіравання. Члены экспертнага савета асацыяцыі — паспяховыя бізнесмены — будуць бясплатна кансультаваць прадпрымальнікаў і пачаткоўцаў.
...І стартап-школы
А Цэнтр падтрымкі прадпрымальніцтва і трансферу тэхналогій таварыства с дадатковай адказнасцю «Віцебскі бізнес-цэнтр» у ліку іншага спецыялізуецца на арганізацыі стартап-школ.
— Гэта новы некамерцыйны праект, які спрыяе запуску і развіццю бізнесу. Большасць бізнесаў ва ўсім свеце «пачынаюцца з нуля» — гэта значыць стартуюць уверх. Стартап-школа спрыяе рэалізацыі праграмы сацыяльна-эканамічнага развіцця краіны, дзе асаблівая ўвага — папулярызацыі навукова-тэхнічнай творчасці, вынаходніцтва, інавацыйнага прадпрымальніцтва, — расказвае дырэктар цэнтра Леанід Шур.
Базавы прынцып такіх школ агульны: бізнесу можа навучыць толькі прадпрымальнік. Таму эксперты — людзі, якія на ўласных поспехах і памылках «раскруцілі» бізнес і кіруюць ім. Да канца года ў стартап-школах апрабуюць 60 дзелавых ідэй. І кожная можа стаць паспяховым бізнесам.
Адзін з яскравых прыкладаў рэалізацыі ўдалай ідэі — праект маладога гараджаніна, якога падтрымаў вядомы бізнесмен.
— Дапамагаю вельмі ініцыятыўнаму хлопцу, які захацеў займацца прадпрымальніцтвам. Ён прапанаваў ідэю ў галіне перапрацоўкі другасных матэрыяльных рэсурсаў. Афішаваць падрабязнасці пакуль што не буду. Я ўжо ўзяўся за фінансаванне і суправаджэнне праекта, — удакладняе першы намеснік старшыні савета «Асацыяцыі наймальнікаў і прадпрымальнікаў», намеснік старшыні гарадскога савета па прадпрымальніцтве Васіль Ламакін. Ён — заснавальнік некалькіх прадпрыемстваў, займаецца інвеставаннем.
Са школьнай парты
Сёлета ў Віцебску адбыўся тэматычны форум «Першы крок у бізнесе». Удзельнікі падзяліліся вопытам і праблемамі.
— Мы вучым школьных педагогаў, у тым ліку і будучых, а яны — дзяцей. Але на такія «кампаніі» няма сродкаў у бюджэце. Як і схемы работы... Наогул, нашы вопыт і кваліфікацыя ў якасці трэнераў, кансультантаў, маркетолагаў мала запатрабаваныя на Віцебшчыне. Таму працуем у іншых рэгіёнах, — сказаў Леанід Шур.
Паводле яго слоў, добрая перспектыва ў школьных бізнес-кампаній экалагічнага кірунку. На Віцебшчыне іх ужо больш за 20. Экалагічны праект рэалізуецца на базе ўстаноў адукацыі Віцебскага раёна.
Развіццё эколагаарыентаванага бізнесу можа істотна змяніць экалагічную сітуацыю ў Беларусі. Гэта магчымасць вырашыць праблемы рацыянальнага выкарыстання прыродных рэсурсаў і аховы навакольнага асяроддзя. У свеце назапашаны найбагацейшы вопыт экалагічнага прадпрымальніцтва. І ён даказвае не толькі яго жыццёвую неабходнасць, але і эканамічную выгаду.
Аляксандр ПУКШАНСКІ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
