Вы тут

Сын Якуба Коласа: і фізік, і лірык


У межах экспазіцыі «Мілыя вобразы», што да 15 кастрычніка працуе ў Літаратурным музеі Янкі Купалы, можна пабачыць партрэты вядомых пісьменнікаў — Якуба Коласа, Янкі Маўра, Міхася Лынькова, Максіма Танка, замалёўкі з іх сямейнага жыцця, фотаздымкі вясковых краявідаў і гарадскіх вуліц... Кожная з работ Міхася Канстанцінавіча выклікае згадкі ў яго памяці, ён распавядае вясёлыя і сумныя гісторыі, звязаныя з гэтымі фота.


Мі­хась Міц­ке­віч прад­стаў­ляе вы­стаў­ку «Мі­лыя воб­ра­зы».

Новая фотавыстаўка — ужо трэцяя ў творчым лёсе майстра. Першая прайшла ў Літаратурна-мемарыяльным музеі Якуба Коласа, другая — у Мар'інагорскай карціннай галерэі. На выстаўцы прадстаўлена толькі частка багатага фотаархіва Міхася Міцкевіча. Майстар валодае сапраўдным дарам убачыць, схапіць і зафіксаваць хуткаплыннае імгненне, зрабіць яго жывым і цёплым, блізкім да нас. Многія фотаздымкі маюць дасціпныя назвы, часам іх суправаджаюць і эпіграмы, складзеныя самім фотамастаком.

Асоба Міхася Міцкевіча — прыклад спалучэння розных талентаў. Ён — доктар тэхнічных навук, яго аўтарству належаць больш як 250 навуковых работ, звыш 20 вынаходніцтваў. Праявіў сябе і ў спорце. Майстар спорту па стэндавай стральбе, прызёр адной з першых спартакіяд народаў СССР. Адно з яго хобі — паляванне. Таксама Міхась Канстанцінавіч выдатна валодае словам. Ён аўтар успамінаў «Пад бацькоўскім дахам», «Слова пра Юрку, Коласава сына». Але здаецца, што менавіта фотамастацтва стала тым звяном, што паяднала рысы фізіка і лірыка.

— Неяк я праходзіў практыку ў лабараторыі электрафізікі, дзе мне вельмі дапамагаў у рабоце вядомы оптык Барыс Бойка, ён стаў пазней акадэмікам, — расказвае Міхась Міцкевіч пра вытокі свайго захаплення. — Барыс Барысавіч мне шмат дапамог у разуменні працэсу фотаздымкі, апрацоўкі фота. Мне многа гадоў даводзілася афармляць справаздачы, здымаць дэталі, чарцяжы. Дзякуючы гэтай рабоце, а таксама выдатнай тэхніцы, якая была ў лабараторыі, — тут я карыстаўся высакахуткаснай камерай — змог развіваць захапленне.

Міхась Канстанцінавіч ахвотна дзеліцца ўспамінамі пра занакавыя моманты, якія ён захаваў на фотаздымках. Расказвае і пра здымкі, якія былі ў задумцы, але, на жаль, так і не былі зробленыя:

— Мне добра запомніўся прыезд Купалы да Коласа ў Падбярэжжа, дзе мы праводзілі лета 1936 года. Купала прыехаў з цёткай Уладзяй. Пакуль жанчыны купаліся ў Свіслачы, Купала з Коласам за добрай гамонкай пілі каньяк. Ужо пад вечар пайшлі лавіць рыбу. Закінулі вуды, дзядзька Янка злавіў некалькі акунькоў, а Колас вывудзіў язя мо з кілаграм вагой, а потым і яшчэ адну рыбіну грам на 800. Мне даручылі несці рыбу ў дом. Ужо пазней, памятаючы тое выдатнае лета, я вярнуўся ў Падбярэжжа, хацеў сфатаграфаваць і той дуб на беразе рэчкі, пад якім сядзеў Купала, і паварот ракі. Але на тым месцы ўжо не было дрэва: рака выпрастала рэчышча і знесла дрэва.

Цікава, што на фотавыстаўцы «Мілыя вобразы» можна пабачыць не толькі самі здымкі. Тут прадастаўлена і фотатэхніка Міхася Міцкевіча, тыя фотаапараты, з дапамогай якіх былі зроблены гэтыя знакавыя работы.

Марына ВЕСЯЛУХА

vesіaluha@zvіazda.by

Фо­та Ана­то­ля КЛЕ­ШЧУ­КА

Загаловак у газеце: І фізік, і лірык

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.