Вельмі важна, каб горад або вёска, дзе ты жывеш, былі ўтульнымі, зручнымі для штодзённага жыцця. Як правіла, пытанні горадабудаўніцтва вельмі актуальныя для жыхароў мегаполісаў — нездарма ж план развіцця сталіцы выносіўся на грамадскае абмеркаванне. Але і ў невялікіх населеных пунктах гэтаму ўдзяляецца ўвага. Так ці інакш, крытыкі заўсёды шмат. Але ёсць, чым і пахваліцца.
З'едзецца ўвесь свет
У гэтым месяцы ў Кіта, сталіцы Эквадора, пройдзе Канферэнцыя Арганізацыі Аб'яднаных Нацый па жыллі і ўстойлівым гарадскім развіцці «Хабітад ІІІ». З гэтай нагоды Надзвычайны і Паўнамоцны Пасол Эквадора ў Беларусі Карлас Ларэа ДАВІЛА сустрэўся з беларускімі журналістамі.
Ён паведаміў, што 10 верасня быў прадстаўлены тэкст новай павесткі дня гарадскога развіцця, які павінен быць прыняты падчас канферэнцыі.
— Павестка мае асаблівыя характарыстыкі, адрозныя ад тых, якія былі прыняты на канферэнцыях «Хабітад І» і «Хабітад ІІ», — адзначыў пасол.
Калі коратка расказаць пра асноўныя прынцыпы, якія знайшлі адлюстраванне ў гэтым дакуменце, то адзін з першых прысвечаны выкараненню беднасці ва ўсіх яе праявах, у тым ліку крайняй галечы. Другі прынцып новай павесткі дня — гэта ўстойлівая гарадская эканоміка, заснаваная на высокай прадукцыйнасці, канкурэнтаздольнасці і інавацыях. Трэці прынцып — забеспячэнне экалагічнай бяспекі.
2,8 кіламетра над узроўнем мора
Карлас Ларэа Давіла, расказваючы пра сталіцу Эквадора, адзначыў, што горад мае шмат спецыфічных рысаў.
— Кіта размешчаны на вышыні дзве тысячы восемсот метраў над узроўнем мора, — звярнуў увагу ён. — Адпаведна, горад мае свае адмысловыя характарыстыкі. Кіта доўгі час развіваўся, разрастаўся перш за ўсё ў даўжыню, займаючы падножжа гары. Адсюль узніклі праблемы з незаконным захопам і выкарыстаннем зямлі, з гарадскім тэрытарыяльным дзяленнем, з упарадкаваннем, з арганізацыяй руху гарадскога транспарту. Так, адна з галоўных задач, якая стаіць перад горадам сёння, — заканчэнне будаўніцтва метро ў горадзе Кіта. У свой час у нас таксама праводзілася вялікая работа па гарадскім устойлівым развіцці. Быў прыняты шэраг нарматыўных актаў, над якімі працаваў і цэнтральны ўрад, і мясцовыя органы ўлады. Гэтыя законы робяць вельмі вялікі ўнёсак у развіццё горада, адкрываюць новыя магчымасці для яго жыхароў.
Экспарт тэхналогій
Плануецца, што ўдзел у канферэнцыі ў Кіта прымуць прадстаўнікі больш чым 190 краін. Нашу дэлегацыю ўзначаліць Дзмітрый Семянкевіч, намеснік міністра архітэктуры і будаўніцтва.
Кажучы пра ўражанні ад наведвання беларускіх гарадоў і вёсак, пасол Эквадора не хавае свайго захаплення.
— Беларускі падыход да планавання гарадоў, да іх арганізацыі можа стаць вялікім унёскам у работу канферэнцыі ААН, — упэўнены ён. — Мяне ўражвае, як размеркаваны вёскі па тэрыторыі краіны, як будуюцца аграгарадкі. Думаю, што гэта цудоўны прыклад, які павінен быць прааналізаваны падчас пасяджэння канферэнцыі «Хабітад ІІІ». Мінск — адзін з найлепшых гарадоў, якія я бачыў, з пункту гледжання ўрбаністычнай арганізацыі. Тут вельмі важны таксама экалагічны аспект, напрыклад, якасць паветра — яна ў вас вельмі высокая. Вельмі добра, згодна з нормамі, выкарыстоўваецца зямля. Лічу, што Беларусь, яе дэлегацыя падчас працы канферэнцыі можа зрабіць значны ўнёсак у работу канферэнцыі.
Карлас Ларэа Давіла таксама нагадаў, што ў красавіку бягучага года ў Эквадоры адбылася землетрасенне.
— Беларусь у маі накіравала нам вялікую, шчодрую гуманітарную дапамогу, — паведаміў ён. — Цяпер гаворка ідзе аб магчымым удзеле Беларусі ў аднаўленні разбураных падчас землетрасення раёнаў. Нам бы хацелася, каб у нас таксама ўлічваліся крытэрыі і прынцыпы, па якіх будуюцца беларускія дамы. Магчымасці, варыянты, праекты аднаўлення зон, што пацярпелі ад землетрасення, абмяркоўваліся з некалькімі беларускімі прадпрыемствамі, і мы ўскладаем на вынікі перамоў вялікія спадзяванні.
Надзея ЮШКЕВІЧ
З усіх куточкаў Беларусі.
Яе песні займаюць першыя радкі ў музычных чартах краіны, пастаянна гучаць на радыё і тэлебачанні.
